ەرلان ساعادييەۆ ءبىلىم سالاسىنىڭ ۇزدىكتەرىن ماراپاتتادى
ءبىلىم سالاسى قىزمەتكەرلەرى ءۇشىن بۇگىن قۋانىشتى كۇن بولدى. اتا-بابالارىمىز سان عاسىر بويى ارمانداپ وتكەن تاۋەلسىزدىككە قول جەتكىزگەنىمىزگە 25 جىل تولۋىنا وراي ۇيىمداستىرىلعان سالتاناتتى جيىندا ولار مەملەكەتتىك ناگرادالارعا يە بولدى. بۇل ماراپاتتار مەملەكەتتىك جانە قوعامدىق قىزمەتتە سىڭىرگەن ەڭبەگى، ەلدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەستەرى ءۇشىن تاپسىرىلدى، دەپ حابارلايدى BAQ.kz.
ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ءماجىلىس زالىندا وتكەن سالتاناتتى جيىندى ق ر ءبىلىم جانە عىلىم ءمينيسترى ەرلان ساعادييەۆ اشتى. وقۋ-اعارتۋ سالاسىندا تەر توگىپ جۇرگەن ارىپتەستەرىن قۇتتىقتاپ، زور تابىستار تىلەدى.
مەرەكەلىك باسقوسۋعا بۇعان دەيىن، ءتىپتى، كەڭەستىك زاماندا وقۋ-اعارتۋ سالاسىن باسقارعاندار، ونىڭ ىشىندە قازاق كەڭەس سوسياليستىك رەسپۋبليكاسىنىڭ اعارتۋ ءمينيسترى قىزمەتىن 13 جىل اتقارعان قوجاحمەت بالاحمەتوۆ، 90-جىلداردا مينيسترلىكتى باسقارعان مىرزاتاي جولداسبەكوۆ قاتىستى.
ولار ەڭبەگىمەن ەلەۋلى بولعان قىزمەتكەرلەرگە «پاراسات»، «قۇرمەت» وردەندەرىن تاپسىرسا، اكادەميك كەنجەعالي ساعادييەۆ ءبىر توپ قىزمەتكەردىڭ كەۋدەسىنە «ەرەن ەڭبەگى ءۇشىن» مەدالدارىن تاقتى. سونداي-اق تاعى بىرنەشە مامانعا «قازاقستاننىڭ ەڭبەك سىڭىرگەن قايراتكەرى» اتاعى بەرىلىپ، ق ر قۇرمەت گراموتالارى تاپسىرىلدى. ساحنا تورىندە ءبىرقاتار ۇزدىك قىزمەتكەرگە ناگرادالار تاپسىرا وتىرىپ، قۇتتى بولسىن ايتقانداردىڭ اراسىندا قوعام قايراتكەرى، ايگىلى عالىم جابايحان ءابدىلدين دە بولدى.
ءبىز ءوز كەزەگىمىزدە «قۇرمەت» وردەنىمەن ماراپاتتالعان ماڭعىستاۋ وبلىسىنىڭ ورتالىعى – اقتاۋ قالاسىنداعى №24 ورتا مەكتەبىنىڭ ءمۇعالىمى راۋشان جۇماجان قىزى نۇردى سوزگە تارتتىق.
«قازىرگى كەزدە ءبىلىم سالاسى قارىشتاپ دامىپ كەلەدى. ءمۇعالىم كادرلارىن دايىنداۋدا دا ىلگەرىلەۋشىلىك بار. وبلىستىق ءبىلىم باسقارماسى، قالالىق ءبىلىم ءبولىمى جانە ۇيلەستىرۋ ورتالىقتارى بىرىگىپ قىزمەت جاساپ وتىر. بۇگىندە بالالاردىڭ دامۋىنا بارلىق جاعداي جاسالعان. ينتەرنەتكە كىرۋگە مۇمكىندىك بار قازىردە، وقۋشىلار ءتۇرلى قۇرال-جابدىقتارمەن قامتاماسىز ەتىلگەن. مۇنداي جاعدايدا بالالاردىڭ ەشتەڭەگە الاڭداماي، تەك ءبىلىم الۋعا مۇمكىندىكتەرى بار دەپ ەسەپتەيمىن. وزىمە كەلەر بولسام، ەڭبەگىمنىڭ باعالانعانىنا سونداي ريزا بولىپ وتىرمىن. ماعان قولداۋ بىلدىرگەن ۇجىمىما، ماراپاتقا ۇسىنعان باسشىلىعىما راحمەتىمدى ايتامىن»، – دەپ اعىنان جارىلدى ۇستاز.
You Might Also Like
-
تۇيە - ءتورت تۇلىك مالدىڭ بىرەگەيى. دەنەلى، شولگە شىدامدى. كۇشىنە، توزىمدىلىگىنە قاراي حالىق ونى «قارا جەردىڭ كەمەسى» دەپ تە اتايدى. ەلىمىزدىڭ باتىس وڭىرىندە اقتاۋ، اتىراۋ، اقتوبە، المات...
-
قاي كەزەڭدە بولماسىن، كوپ ءتىلدى مەڭگەرگەن حالىقتار مەن ۇلتتار الدىڭعى قاتارلى ەلدىڭ قاتارىنا كىرىپ، ءوزىنىڭ كوممۋنيكاسيالىق جانە ينتەگراسيالىق قابىلەتىن كەڭەيتىپ وتىرعانى تاريحتان بەلگىلى. ماسەلەن، ...
