InfoHub Logo

بۇگىن ءبىلىم جانە عىلىم ءمينيسترى ەرلان ساعادييەۆ جەتى عالىمعا عىلىم سالاسىنداعى مەملەكەتتىك سىيلىقتار تابىستادى. سالتاناتتى شارا بارىسىندا راتباي مىرزاقۇلوۆ، ماينۇر بورىبايەۆا، گۇلناس احمەتوۆا، كۇلاش نۇرىمجانوۆا، ماكسيم زدوروۆەس، ولگا اندريۋششەنكو جانە نۇركەن كۇزەمبايەۆ قوعام مەن مەملەكەت الدىنداعى ەڭبەگى ءۇشىن جوعارى ماراپاتقا يە بولدى، دەپ حابارلايدى مينيسترلىكتىڭ باسپا ءسوز قىزمەتى.

«بارشاڭىزدى تاۋەلسىزدىكتىڭ 25 جىلدىعىمەن قۇتتىقتايمىن! مەملەكەت باسشىسى نۇرسۇلتان نازاربايەۆتىڭ تاپسىرماسىمەن قازاقستاندا عىلىم مەن ءبىلىم سالاسىندا بەلسەندى جۇمىستار جۇرگىزىلۋدە. بۇگىن قازاقستاننىڭ عىلىم سالاسىنداعى بەلگىلى عالىمدار مەن قايراتكەرلەرى ماراپاتتالدى. بارىڭىزگە باقىت تىلەيمىن، وتانىمىز تىنىش بولسىن»، - دەدى ەرلان ساعادييەۆ.

بيىل سىيلىققا 75 عالىم-ۇمىتكەردىڭ جۇمىستارى ۇسىنىلدى. ولاردىڭ ءارقايسىسى ءوزىنىڭ قىزمەت سالاسىندا قىزىقتى زەرتتەۋ جۇمىسىن جۇرگىزگەن. ءبىراق ساراپتامالىق تالداۋ مەن كوميسسيانىڭ تالقىلاۋلارىنان كەيىن ەڭ ۇزدىك 6 جۇمىس تاڭداپ الىندى.

عالىمدار ەڭبەكتەرى ءۇشىن 150 اەك مولشەرىندە م.و. اۋەزوۆ پەن د.ا. قونايەۆ اتىنداعى مەملەكەتتىك سىيلىققا، سونداي-اق، 350 اەك مولشەرىندە ق.ي. ساتبايەۆ، ش.ش. ءۋاليحانوۆ، ى. التىنسارين، كۇلتەگىن اتىنداعى مەملەكەتتىك سىيلىقتارعا يە بولدى.

«ءبىز جەڭىسكە جەتكەنىمىزگە قۋانىشتىمىز. قاتتى تولقىپ تۇرمىن. بارلىعىڭىزدى كەلە جاتقان تاۋەلسىزدىك كۇنىمەن قۇتتىقتايمىن، تاۋەلسىزدىك - بۇل باقىت، بارشاڭىزعا دەنساۋلىق پەن باقىت تىلەيمىن. كەرەمەت قوعامدا جانە مەملەكەتتە تۇرىپ جاتقانىمىز ءۇشىن ەلباسىمىزعا راحمەت»، - دەدى پروفەسسور، س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ پەداگوگيكا عىلىمدارىنىڭ دوكتورى گۋلناس احمەتوۆا.

«مەن وتە قۋانىشتىمىن، بۇگىنگى كۇن مەن ءۇشىن اسا ماڭىزدى. بۇل سىيلىقتى ستۋدەنت كەزىمنەن ارمانداعام. مىنە، ەندى قولىم جەتتى. وتانىمىزدىڭ يگىلىگى ءۇشىن زەرتتەۋلەردى جالعاستىراتىن بولامىز. بارشا قازاقستاندىقتاردى ۇلى مەرەكەمەن قۇتتىقتايمىن. تاريحشى رەتىندە تاۋەلسىزدىككە قالاي قول جەتكىزگەنىمىزدى جانە تاۋەلسىزدىكتىڭ قانشالىقتى ماڭىزدى ەكەنىن بىلەمىن»، - دەدى پاۆلودار مەملەكەتتىك پەداگوگيكالىق ينستيتۋتىنىڭ «قازاقستان مەن شەت مەملەكەتتەر تاريحى» كافەدراسىنىڭ دوسەنتى نۇركەن كۇزەمبايەۆ.

ەلىمىزدە اتاۋلى سىيلىقتار 2010 جىلدان باستاپ تابىستالىپ كەلەدى. جىل سايىن التى عالىم ماراپاتتالادى جانە 75 مەملەكەتتىك عىلىمي ستيپەنديا بەرىلەدى. سونىمەن قاتار، بيىل 25 جەتەكشى جانە 50 جاس تالانتتى عالىم مەملەكەتتىك عىلىمي ستيپەندياعا  يە بولدى. ستيپەنديا 2017 جىلدىڭ قازان ايىنا دەيىن اي سايىن تولەنەدى.

سونىمەن قاتار، ءبىلىم جانە عىلىم ءمينيسترىنىڭ قۇرمەت گراموتاسىمەن جانە باعالى سىيلىقتارمەن باعدارلاما جاساۋدان 17ء-شى بۇكىلرەسەيلىك كوماندالىق وليمپيادانىڭ جەڭىمپازدارى، استانا جانە الماتى قالالارىنىڭ ءبىلىم-يننوۆاسيا ليسەيلەرىنىڭ وقۋشىلارى سانجار بيدايبەك، اسحات جالعاسوۆ پەن نۇرباقىت ماديبەك ماراپاتتالدى. 

---