ەرتەگى
- دوسان، تاڭنىڭ بەسىگىن تەربەتە تۇرشى، مىنا جەردى كىشكەنە جيناپ الايىن، - دەدى گۇلزيرا كۇيەۋىنە قاراپ.
دوسان بەسىكتەگى بالاسىنىڭ جانىنا كەلىپ وتىردى. كوزى جىلتىراپ جاتقان سابيىنە قاراپ:
- ەرتەگى ايتىپ بەرەيىن بە؟ - دەدى دوسان. سونان سوڭ:
- اكەڭ تىرلىك دەپ ءجۇرىپ ەرتەگىنى دە ۇمىتتى عوي. سوندا دا ايتىپ كورەيىن ەندى، - دەدى.
ەرتە، ەرتە، ەرتە زامانداردا حاننىڭ اي دەسە اۋزى، كۇن دەسە كوزى بار قىزى بولىپتى. ءوزى سۇلۋلىعىمەن بىرگە اقىلدى ەكەن. سوندىقتان با جانىنا ەشبىر جىگىتتى تەڭگەرە قويماپتى. وسىلاي ۋاقىت وتە بەرەدى. ءبىر كۇنى حاننىڭ قىزى ەل ايتىپ جۇرگەن اڭگىمەدەن دوساننىڭ ۇلى تاڭ دەگەن جىگىتتىڭ بار ەكەندىگىن ەستيدى.
گۇلزيرا كۇيەۋىنىڭ ايتىپ وتىرعان ەرتەگىسىنە ءوزى مەن بالاسىنىڭ اتىن دا قوسىپ جىبەرگەنىن ەستىپ كۇلىپ جىبەردى.
دوسان ەرتەگىسىن ءارى قاراي جالعادى:
ءبىر كۇنى قىز اكەسىنىڭ ۋازىرلەرىنە "مەن دوساننىڭ ۇلى تاڭدى كورگىم كەلەدى" دەيدى. ۋازىرلەر تاڭنىڭ ۇيىنە كەلگەندە، تاڭ ۇيدە جوق ەدى. تاڭنىڭ اناسى گۇلزيرا ۋازىرلەردى كورىپ ۋايىمداپ قالادى. ءبىراق ۋازىرلەردىڭ ءجۇزى جىلى ەدى. ولار تاڭدى حاننىڭ قىزى كورگىسى كەلەتىندىگىن جەتكىزەدى.
تاڭ ورداعا كەلەدى. حاننىڭ قىزى تاڭنىڭ كوركى مەن سىمباتىنا ىشتەي كوڭىلى تولىپتى. ءبىراق سىرتقا سىر بەرمەگەن كۇيى جىگىتتىڭ باتىلدىعىن سىناپ كورمەكشى بولادى. قىز قانداي سىناقتان وتكىزسە دە، تاڭ ءوزىنىڭ ەرجۇرەك، باتىلدىعىمەن قىزدى قايران قالدىرا بەرىپتى. قىز ەندى وسىناۋ كورىكتى دە باتىل جىگىتتىڭ اقىلى مەن ءبىلىمىن دە سىناپ كورمەكشى بولىپ، وعان شەشۋى قيىن سۇراقتار ۇسىنادى. قىز قانداي سۇراقتار قويسا دا، تاڭ ونى
زەرەكتىگىمەن، اقىل-بىلىمىمەن ءتانتى ەتە بەردى. جىگىتتىڭ كوركى مەن باتىلدىعىنا ءاقىل-بىلىمى دە ساي ەكەندىگىنە ابدەن كوزى جەتكەن قىز ەندى تاڭعا بىلاي دەيدى: "ماعان ونەرىڭدى كورسەت، جىگىت ادام ونەرلى بولۋى ءتيىس". تاڭ ونەرىمەن قىزدىڭ كوڭىلىن تولقىتتى. ىشتەي ىزدەگەنى وسى جىگىت ەكەندىگىن
تۇسىنگەن قىز اكەسىنە قاراپ: "اكە، مەنىڭ تەڭىم - وسى جىگىت، باتاڭىزدى بەرىڭىز" دەيدى. حان رۇقساتىن بەرەدى. تاڭ حاننىڭ قىزىن جەتەلەگەن كۇيى ۇيىنە الىپ كەلگەندە، تاڭنىڭ اناسى اۋەلدە تاڭىرقاپ قالادى. سولايشا حاننىڭ قىزىن كەلىن ەتىپ الىپ، حانمەن قۇدا بولعان ەكەن.
- حاننىڭ ايەلىمەن قۇداعي بولىپتى دەسەڭشى، - دەدى گۇلزيرا كۇلىپ. سونان سوڭ جەڭىل كۇرسىندى:
- شىركىن-اي، قالادا ءوز باسپانامىز دا بولاتىن ۋاقىت قاشان بولادى ەكەن؟
دوسان جارىن جۇباتا سويلەدى:
- وسىعان دا شۇكىر دە، جانىم. اۋىلدان قالاعا كەلگەنىمىز ەندى عانا عوي. وسى پاتەردىڭ پاتەراقىسىن ۋاقىتىلى تاۋىپ بەرە الىپ وتىرعانىمىزعا دا شۇكىر دە. ەرتەڭىمىز جارىق بولار، ايتەۋىر.
ەرلى-زايىپتىلار بەسىكتەگى ۇلدارىنا ءبىر ءتۇرلى ۇمىتپەنەن قارادى.
You Might Also Like
-
ءقازىر سۋىق ءتيۋدىڭ ناعىز ماۋسىمى، ءبىراق ەشكىم اۋىرعىسى كەلمەيدى. تانىمال دارىگەر ەۆگەنيي كوماروۆسكيي ۆيرۋستاردان قورعانۋدىڭ جانە ەگەر جۇقتىرىپ الساڭىز ودان ارىلۋدىڭ جولدارىن جازعان ەكەن.
