InfoHub Logo

ءقازىر سۋىق ءتيۋدىڭ ناعىز ماۋسىمى، ءبىراق ەشكىم اۋىرعىسى كەلمەيدى. تانىمال دارىگەر ەۆگەنيي كوماروۆسكيي ۆيرۋستاردان قورعانۋدىڭ جانە ەگەر جۇقتىرىپ الساڭىز ودان ارىلۋدىڭ جولدارىن جازعان ەكەن.

باستىسىن ەستە ساقتاڭىز: ۆيرۋس قالاي اتالسا دا، ءسىزدىڭ ارەكەتتەرىڭىز بۇعان نەگىزدەلمەۋى كەرەك. بۇل ماۋسىمدىق، شوشقا، ءپىل، پاندەميالىق بولۋى مۇمكىن – ماڭىزدى ەمەس. ماڭىزدىسى، بۇنىڭ ۆيرۋس ەكەنى جانە ول اۋا-تامشىلى جولمەن جۇعاتىنى، اۋا جۇتۋ مۇشەلەرىن زاقىمدايتىنى.

الدىن الۋ

ەگەر ەكپە جاساتۋ مۇمكىندىگى بولسا – ەكپە جاساتىڭىز، ءبىراق مىناداي شارتپەن: ۆاكسيناسيا جاساتۋ ءۇشىن ەمحانادا اۋرۋلاردىڭ ورتاسىندا وتىرماۋ. قازىرگى ۆاكسينالار بەلەڭ العان تۇماۋ ۆيرۋستارىنىڭ بارىنەن قورعاي الادى.

شۇعىل كومەكتەسەتىن ەشقانداي ءدارى نەمەسە حالىق ەمى جوق. ياعني ەشقانداي پياز، ەشقانداي سارىمساق، ەشقانداي اراق جانە ەشقانداي ءدارى ءسىزدى تىنىس جولدارىنىڭ، تۇماۋدىڭ ۆيرۋستارىنان قورعاي المايدى. بۇل دارى-دارمەكتىڭ ءبارى ادامنىڭ «بىردەڭە ىستەۋ كەرەك» دەگەن قاجەتتىلىگىن قاناعاتتاندىرادى. بۇل دارى-دارمەكتەردىڭ ءبىر عانا پايداسى – پسيحوتەراپيا.

ۆيرۋستىڭ قايناركوزى – ادام جانە تەك قانا ادام. ادام از بولسا، اۋىرىپ قالۋ مۇمكىندىگى دە ازايادى. ءبىر ايالداما جاياۋ ءجۇرۋ، سۋپەرماركەتكە ارتىق بارماۋ – دۇرىس شەشىم!

ماسكا – پايدالى زات، ءبىراق قورعان ەمەس. ەگەر اينالاسىندا ساۋ ادامدار جۇرسە اۋرۋ ادام كيگەنى دۇرىس: ول ۆيرۋستى توقتاتپايدى، ءبىراق ۆيرۋسقا باي سىلەكەي تامشىلارىن توقتاتادى. ساۋ ادامعا ول قاجەت ەمەس.

اۋرۋدىڭ قولى – اۋىز بەن مۇرنى سياقتى ۆيرۋستىڭ قايناركوزى. اۋرۋ بەتىن سيپايدى، ۆيرۋس قولىنا تۇسەدى، اۋرۋ اينالاسىن ۇستايدى، ونى بارىپ ءسىز ۇستايسىز – وسىلايشا ورۆي-گە تاپ بولاسىز. بەتىڭىزدى ۇستاماڭىز. قولىڭىزدى ءجيى جۋىڭىز، وزىڭىزبەن زالالسىزداندىراتىن گيگيەنالىق مايلىقتار الىپ ءجۇرىڭىز.

اۋانىڭ ساپاسىنا ءمان بەرىڭىز. ۆيرۋستىق بولشەكتەر قۇرعاق، جىلجىمايتىن اۋادا بەلسەندىلىگىن ساعاتتاپ ساقتاپ تۇرادى، ءبىراق سالقىن، ىلعال جانە جىلجىمالى اۋادا ءبىر ساتتە كۇيرەيدى. ءۇي ىشىندەگى اۋانىڭ وڭتايلى پارامەترلەرى: تەمپەراتۋرا — شامامەن 20 °س، ىلعالدىلىق — 50–70%. مىندەتتى تۇردە بولمەنى ءجيى ءارى مۇقيات جەلدەتىپ وتىرۋ قاجەت. ال سەرۋەندەۋ ۋاقىتى شەكسىز. سەرۋەندەپ ءجۇرىپ ۆيرۋس جۇقتىرىپ الۋ مۇمكىندىگى تومەن.

جوعارى تىنىس جولدارىندا ءاردايىم شىرىش بولىنەدى. شىرىش جەرشىلىكتى يممۋنيتەتتى جۇمىس ىستەتۋدى قامتاماسىز ەتەدى – شىرىش قاباتىن قورعايدى. ەگەر شىرىش پەن شىرىش قاباتى قۇرعاپ قالسا – جەرگىلىكتى يممۋنيتەتتىڭ جۇمىسى ناشارلايدى، ۆيرۋستار قورعانىش قاباتىن وڭاي باسىپ الادى دا، ادامنىڭ ۆيرۋستى جۇقتىرىپ الۋ مۇمكىندىگى ارتادى. شىرىش قاباتىن ىلعالداندىرىپ تۇرىڭىز. ءدارىحانادان ارنايى تۇز ەرىتىندىسىن ساتىپ الۋعا بولادى نەمەسە ءوزىڭىز جاساپ الساڭىز بولادى (1 شاي قاسىز تۇزدى 1 ليتر قايناق سۋدا ەرىتۋ).

ەمدەلۋ ەرەجەلەرى

جىلى كيىنۋ، ءبىراق بولمە سالقىن ءارى ىلعالدى بولۋى كەرەك. ءجيى ەدەندى جۋۋ، اۋانى ىلعالداندىرۋ، بولمەنى جەلدەتۋ.

اۋىرىپ قالعان ادامعا تاماق بەرىپ قيناماۋ. ەگەر قالاپ تۇرسا – جەڭىل، كومىرسۋعا باي، سۇيىق تاعام بەرىڭىز.

ءجيى سۋ ءىشۋ. سۇيىقتىقتىڭ تەمپەراتۋراسى دەنە تەمپەراتۋراسىنداي بولۋ كەرەك. سۋدان وزگە كومپوت، مورس، شاي، مەيىز بەن كەپتىرىلگەن ورىكتىڭ قايناتپاسى. رەگيدراتاسيا (رەگيدرون، حۋمانا ەلەكتروليت، گاستروليت، نورموگيدرونجانە ت.ب.) ءۇشىن دايىن قوسپالار بولسا ءتىپتى جاقسى.

مۇرىندى ءجيى تۇزدى سۋمەن جۋۋ

تەمپەراتۋراڭىز كوتەرىلسە پاراسەتامول نەمەسە يبۋپروفەن ءىشىڭىز. تەك اسپيرين ىشپەڭىز.

جوعارى تىنىس جولدارى اۋىرعاندا (مۇرىن، تاماق، جۇتقىنشاق) ەشقانداي قاقىرىق تۇسىرەتىن دارى-دارمەكتىڭ قاجەتى جوق: ولار جوتەلۋدى ۇدەتە تۇسەدى. تومەنگى تىنىس جولدارىنىڭ اۋرۋى (برونحيتتەر، پنيەۆمونتيالار) جەدەل تۇردە دارىگەرگە قارالۋدى قاجەت ەتەدى. ولاردى ءوز بەتىنشە ەمدەۋگە تىرىسپاڭىز.

ۆيرۋستىق ينفەكسيالار انتيبيوتيكپەن ەمدەلمەيدى. انتيبيوتيكتەر اسقىنۋ ءقاۋپىن تومەندەتىپ ەمەس، ۇدەتە تۇسەدى.

جەرگىلىكتى تۇتىنۋعا جانە ىشكە جۇتۋعا ارنالعان دارى-دارمەكتەردىڭ جاقسى اسەر ەتەتىنى ەش دالەلدەنبەگەن.

گومەوپاتيا — «بىردەڭە ىستەۋ كەرەك» دەگەن پسيحوتەراپيا سياقتى ءقاۋىپسىز ءادىس.

دارىگەردى قاشان شاقىرۋ كەرەك؟

ءارقاشان. ءبىراق بۇل مۇمكىن ەمەس. سوندىقتان دارىگەردى شاقىرتۋدى تالاپ ەتەتىن جاعدايلاردى قاراستىرايىق:

اۋرۋدىڭ جاعدايى اۋىرعان كۇننەن ءتورتىنشى كۇنى جاقسارماسا؛

اۋىرعان كۇنەن جەتىنشى كۇنگە دەيىن تەمپەراتۋرا تۇسپەسە؛

جاعدايى جاقسارىپ كەلە جاتىپ قايتا ناشارلاپ كەتسە؛

ءورۆي-دىڭ ءبىرقالىپتى بەلگىلەرىندە بويىنان اۋىرلىق سەزىمىن سەزىنۋ؛

ءشول قىسۋدىڭ، دەمىگۋدىڭ، قارقىندى اۋىرۋدىڭ، ءىرىڭ پايدا بولۋدىڭ ءوز بەتىنشە نەمەسە تەرىنىڭ بوزارۋىمەن بىرگە پايدا بولۋى؛

جوتەلدىڭ ۇدەۋى، ونىمدىلىگىنىڭ تومەندەۋى؛ تەرەڭ تىنىستاۋ جوتەل قىسۋعا اكەلۋى؛

قىزۋ كوتەرىلگەن كەزدە پاراسەتامول مەن يبۋپروفەننىڭ ءبىراز ۋاقىتقا نەمەسە مۇلدە كومەكتەسپەۋى.

مىناداي جاعدايلاردا دارىگەردى شۇعىل شاقىرۋ كەرەك:

ەسىنەن تانىپ قالۋ؛

تىرىسىپ قالۋ؛

تىنىس الۋدىڭ ناشارلاۋى (قيىن تىنىستاۋ، دەمىكپە، اۋا جەتىسپەۋشىلىكتى سەزىنۋ)؛

بارلىق جەردىڭ قاتتى اۋىرۋى؛

تۇماۋ بەلگىلەرى جوق، ءبىراق تاماقتىڭ ءبىرقالىپتى اۋىرۋى (تاماقتىڭ اۋىرۋى + قۇرعاق مۇرىن – بۇل باسپا بەلگىلەرى. مۇندايدا دارىگەر مەن انتيبيوتيك قاجەت بولادى)؛

لوقسۋمەن قاتار، ءبىرقالىپتى باس اۋرۋى؛

مويىننىڭ ءىسىنۋى؛

ۇستىنەن باسقاندا جوعالىپ كەتپەيتىن بورتپە؛

دەنە قىزۋىن باساتىن ءدارىنى ىشكەننەن كەيىن 30 مينۋتتان سوڭ دا تۇسپەيتىن دەنە تەمپەراتۋراسىنىڭ 39 °س-تان اسۋى؛

قالتىراۋ مەن بوزارۋمەن بىرگە جۇرەتىن تەمپەراتۋرانىڭ كوتەرىلۋى.

---