InfoHub Logo

وقۋ – جادى مەن ەستە ساقتاۋ پروسەسىمەن بايلانىستى ەڭ ماڭىزدى ادامي داعدىلاردىڭ ءبىرى. پيتەر براۋن، گەنري روديگەر جانە مارك ماكدەنيەل اقپاراتتى دۇرىس ەستە ساقتاۋ تاسىلدەرى جايلى «بارلىعىن ەستە ساقتاۋ» كىتابىن جازعان.

ءوز كەزەگىمىزدە اتالعان كىتاپقا كوز جۇگىرتىپ، ەستە ساقتاۋعا ارنالعان ءتيىمدى تاسىلدەر ءتىزىمىن نازارلارىڭىزعا ۇسىنامىز.

1. ەسكە ءتۇسىرۋ: جادىمىزدان ىزدەيمىز

بۇل ادىستە ەستە ساقتاۋعا كومەكتەسەتىن كارتوچكالار ءتيىمدى. ولار كارتوچكادا بەينەلەنگەن سۋرەتپەن بايلانىستى ويلاردىڭ ساناڭىزدا قايتا جاڭعىرۋىنا ىقپال ەتەدى.

ەسكە ءتۇسىرۋ بەلگىلى ۇعىمداعا قاتىستى نەيروندى وتكىزگىش جولداردى نىعايتاتىندىقتان، اتالعان ءادىس – وتە ۇتىمدى. سونىمەن قاتار ول تەستىلەۋ نەگىزى بولىپ سانالادى. ءدال وسى سەبەپتى مەكتەپتەگى ەمتيحاندار وقۋشىلاردىڭ ءبىلىمىن باعالاۋ ءادىسى عانا ەمەس، وقىتۋ قۇرالۋ بولۋى ءتيىس.

2. ءمان-ماڭىزىن ءتۇسىنۋ: تىڭ ويلاردى جيعان بىلىمىمىزبەن بايلانىستىرامىز

«تىڭ اقپاراتتى ساناڭىزدا بار بىلىممەن بايلانىستىرا بىلسەڭىز، جاڭا اقپاراتتى تولىق تۇسىنە الاسىز ءارى ەسكە ءتۇسىرۋ دە جەڭىل تۇسەدى»، - دەيدى كىتاپ اۆتورلارى.

مىسالى، فيزيكا ساباعىندا جىلۋ بەرىلىسىنىڭ نە ەكەنىن ءتۇسىنۋ ءۇشىن، بۇل ۇعىمدى ومىرلىك تاجىريبەڭىزبەن بايلانىستىرىپ كورىڭىز. ىستىق شاي نە كوفە شىنىسىن ۇستاعاندا قولىڭىزدىڭ جىلىناتىنىن ەسكە الىڭىز. تۇسىنۋگە جەڭىل ەمەس پە؟

3. كەزەكتەستىرۋ: ءتۇرلى تاپسىرمالاردى كەزەكتەستىرەمىز

ءبىر تاقىرىپتان ەكىنشىسىنە اۋىتقىعان كەزدە، الدەبىر زاتتى زەرتتەۋ وڭاي تۇسەدى.

«ءتۇرلى تاپسىرمالاردى كەزەكتەستىرە ورىنداۋ ارالارىنداعى ايىرماشىلىعى مەن ۇقساستىعىن تانۋعا مۇمكىندىك بەرەدى. ەمتيحاندا نە ومىردە ماسەلەنىڭ دۇرىس شەشىمىن تابۋ ءۇشىن تۇپ-توركىنىنە بويلاۋ قاجەتتىلىگى تۋعاندا، بۇل ءادىستىڭ كومەگى زور بولماق»، - دەپ تۇسىندىرەدى كىتاپ اۆتورلارى.

4. تىڭ وي ىزدەستىرۋ: وزدىڭىزدەن جاۋابىن تابۋ

ەگەر ماسەلەنىڭ شەشىمىن، قانداي دا ءبىر سۇراقتىڭ جاۋابىن ءوزىڭىز تاپساڭىز، ول ساناڭىزدا ساقتالىپ قالادى. ال شەشىمىن تابۋ ءۇشىن الدەكىمنىڭ كومەگىنە جۇگىنسەڭىز، ناتيجەسى مۇنشالىق ءتيىمدى بولمايدى.

ەگەر ءسوز وقۋ جايلى بولسا، كوكەيىڭىزدە تۋىنداعان سۇراقتارعا ساباق باستالماس بۇرىن جاۋاپ بەرىپ كورىڭىز. ال جۇمىسىڭىزعا قاتىستى بولسا، ماسەلەنىڭ شەشىمىن باسشىڭىزبەن كەزدەسەر الدىندا ويلاستىرىپ قويعانىڭىز ءجون.

5. رەفلەكسيا: بولعان جايعا باعا بەرەمىز

جينالىستىڭ قالاي وتكەندىگىن نەمەسە جوباعا بايلانىستى جۇمىس قالاي ءجۇرىپ جاتقاندىعىنا باعا بەرۋ ءۇشىن، بىرنەشە مينۋت وي جۇگىرتىڭىز. وزىڭىزگە «بارلىعى جوسپارعا ساي ءوتتى مە؟»، «نەنى جاقسارتۋعا بولادى؟» ءتارىزدى سۇراقتار قويىڭىز.

گارۆارد بيزنەس مەكتەبىنىڭ زەرتتەۋشىلەرى جۇمىس كۇنىنىڭ سوڭىندا بايقاعاندارىڭىزدى جازىپ قويۋعا بولگەن 15 مينۋت ۋاقىت جۇمىس ونىمدىلىگىن 23%-عا ارتتىراتىنىن اڭعارعان.

6. منەمونيكالىق امالدار: ەسكە ءتۇسىرۋ ءۇشىن، امالدار قولدانامىز

قىسقارتۋ، ۇيقاستىرۋ نەمەسە سۋرەتتەر ارقىلى الدەنەنى ەستە ساقتاۋعا تىرىسقانىمىزدا منەمونيكالىق امالداردى قولدانامىز. منەموتەحنيكالار وزدىگىنەن وقۋ قۇرالى بولا المايدى. ءبىراق ولار وقىعانىمىزدى ەسكە تۇسىرۋگە جەڭىلدىك بەرەتىن كارتالار مەن كەستەلەر قۇرۋعا كومەكتەسەدى.

7. سۇرىپتاۋ: ءالسىز تۇستارىمىزدى اڭعارامىز

«سۇرىپتاۋ – جالعان ويدان ارىلىپ، وزىندىك پىكىرىڭىزدى شىندىققا جاناستىرۋ ءۇشىن ناقتى قۇرالداردى قولدانۋ»، - دەيدى كىتاپ اۆتورلارى.

ءبىز كوگنيتيۆتى يلليۋزيانىڭ قۇربانىنا ءجيى اينالاتىندىقتان، بۇل تارماق وتە ماڭىزدى. ءبىز الدەنەنى تۇسىنگەنىمىزگە سەنىمدى بولعانىمىزبەن، اقپاراتتى تولىق نە مۇلدەم تۇسىنبەيمىز. ءوزىڭىزدىڭ وسال تۇستارىڭىزدى انىقتاۋ ءۇشىن، تەست تاپسىرىپ كورىڭىز نەمەسە ارىپتەستەرىڭىزدەن جۇمىسىڭىزعا قاتىستى پىكىرىن سۇراڭىز.

---