ءىنى تۋرالى بىرەر ءسوز
وسى تاياۋدا عانا "جازۋشى" باسپاسىنان تاسقا باسىلىپ شىققان "پارتيزان قاسىم قايسەنوۆ" دەيتىن كىتاپتاعى وسى اتتاس وچەركىڭدە ساكەن يماناسوۆ العاش رەت مەنىمەن تانىسقانى جايلى: "قاسىم قايسەنوۆتىڭ سىرىنا كوپتەن انىق بول سام دا ءتانىسىپ-بىلىسۋدىڭ ءساتى العاش رەت 1970 جىلدىڭ جازىندا ءتۇستى. تالدىقورعاندا تۇراتىن ءبىزدىڭ ۇيگە ءبىر كۇنى كەشتەتە قاسەكەڭ باستاپ ادىلبەك ءابايدىلدانوۆ، ورىس اقىنى سەرگەي كيسەليەۆتار كىرىپ كەلدى. ول كەزدە كوركەم ادەبيەتتى ناسيحاتتاۋ بيۋروسى دەگەن بولاتىن. سول بيۋرونىڭ اتىنان جازۋشىلار توپ-توپقا ءبولىنىپ، وقتىن-وقتىن ەل ارالاپ تۇرۋشى ەدى. بيۋرو ديرەكتورى قازىرگى ۇلكەن جازۋشىمىز سايىن مۇراتبەكوۆ قاسەكەڭ باستاعان الگى توپقا مەنى دە ىلىكتىرىپ، قۇجات، قاراجاتىن قوسا بەرىپ جىبەرىپتى. قاسەكەڭ باسشىلىعىمەن جارتى اي بويى اقسۋ، تالدىقورعان اۋداندارىنىڭ شارۋاشىلىقتارىن ارالاعان ەدىك..."
سول وچەركىندە ساكەن مەنىڭ اتىما بۇرىننان قانىق، ەكەنىن، كىتاپتارىمدى وقىعانىن، ءبىراق جۇزبە-جۇز تانىسۋ ءساتى ەندى تۇسكەنىن ايتادى. مەن دە جاس اقىن ساكەن يماناسوۆتىڭ اتىن زامانداستارى ايتۋىنان ەستىپ جۇرەتىنمىن. سول ادىلبەك، سايىندار اسا ءبىر تالانتتى اقىن دەپ الگى ساپار الدىندا تاعى قاداعالاي ايتقان.
ەل ءىشىن ارالاپ، كوپشىلىكپەن كەزدەسۋ كەزدەرىندە ءسوزىڭ دالەلدى بولماسا، ءوزىڭدى ەلەي قويمايدى جۇرت. ادىلبەك، سەرگەيلەردىڭ ەكپىندەپ وقىعان مانەرىنە ساكەننىڭ جىگەرلى زور داۋىسى قوسىلىپ، ءسوزىنىڭ سالماعى باسىم ءتۇسىپ، تىڭداۋشىلارعا اسا ۇناپ قالاتىنىن ءار كەزدەسۋدە بايقاپ ءجۇردىم.
سول ساپاردان كەيىن مەن اعا، ساكەن ءىنى بولىپ، كۇنى بۇگىنگە دەيىن ارالاس-قۇرالاس كەلە جاتىرمىز. ءبارىن دەپ ايتا الماسپىن، ايتەۋىر جازعاندارىن وقىپ وتىرام، ول تۋراسىنداعى جۇرت پىكىرىنە دە قۇلاق تۇرە جۇرەم. ءبورى دە ساكەننىڭ اقىندىعىن ازاماتتىعىنان ايىرماي، تازا كوڭىلمەن كوتەرە ماقتاپ جۇرەدى.
ءبىراق ول العا تۇسە قويايىنشى دەپ، ولەرمەندىكپەن ۇمتىلمايدى. مىنەزىندە دە جوپشەندىنى مەنسىنە قويمايتىن ەرلىك بار. سودان بارىپ كوبىنە ۇلەسىنەن قاعىلىپ جۇرەتىنىن بايقايمىن.
ءىنى بولعاسىن ماعان ىلعي بالا كورىنەدى عوي، تاياۋدا عانا ونىڭ دا الپىسقا كەلىپ قالعانىن ءبىلىپ، تەلەفون سوقتىم — "اۋ، ساكەن، سەن دە الپىسقا كەلىپ قالدىڭ با؟ اپىر-اي، ءا، ەندى ءبىرازدان سوڭ ءبىزدى قۋىپ تا جەتەتىن ءتۇرىڭ بار عوي جاس جاعىنان، مەن سەنى بالا ەكەن دەپ جۇرسەم!" — دەپ قالجىڭ ايتتىم.
ەكەۋىمىز دە كۇلىسىپ، ءماز بولىپ قالدىق.
نە دەۋگە بولادى. اعاسى ءاردايىم ءىنىسىنىڭ ءتاۋىر بولعانىن، ابىرويلى بولعانىن تىلەيدى عوي. تىنىسىما بالايتىن ساكەن ىنىمە دە مەن سونى تىلەيمىن.
You Might Also Like
-
سوناۋ 1968 جىلدارى وبلىستىق "وكتيابر تۋى" گازەتىنە قىزمەتكە كەلىپ، ساكەن يماناسوۆپەن ءبىر بولىمدە ىستەدىم. ءسويتىپ، ول مەنىڭ جۋرناليستيكاداعى العاشقى ۇستازىم بولدى. ۇساق-تۇيەكپەن ءىسى جوق، و...
