ولەڭ-ومىر
"لەنينشىل جاس" گازەتىنىڭ رەداكتورى ءابدىساتتار بولدەكبايەۆتان بىردە الاكول اۋداندىق گازەتىندە قىزمەت ىستەپ جۇرگەن جيىرما ءبىر جاسار ساكەن يماناسوۆ: "ءسىزدى گازەتىمىزگە قىزمەتكە شاقىرامىز. كەلىسىمىڭىزدى بەرسەڭىز، تەز حابارلاڭىز" دەگەن مازمۇندا جازىلعان جەدەلحات الىپ، توبەسى كوككە جەتكەندەي قۋانىشقا بولەنەدى. دەرەۋ الماتىعا جەتەدى. ءسويتىپ، جاستاردىڭ سۇيىكتى گازەتىنە قىزمەتكە تۇرادى. "جۇرت "لەنينشىل جاسقا" ينستيتۋتتا وقىپ، ۋنيۆەرسيتەتتى ءبىتىرىپ قىزمەتكە تۇرۋشى ەدى، قارشاداي مىنا ساكەن قاتارىنان وزىپ قايدا بارادى، ەي"... دەۋشىلەر دە بولماي قالعان جوق. ال ساكەن بولسا، بۇرقىراتىپ ماقالاسىن جازدى، جارقىراتىپ ولەڭدەرىن جاريالادى.
بىردە اقىن اعامىز ادىلبەك ءابايدىلدانوۆ بريگادير تۋرالى جازىلعان وچەركىمدى ءۇش رەت قاداعالاپ قاراپ. تۇزەتىپ، ءۇش رەت وزىمە قايت كوشىرتكىزىپ، "ەندى جاقسى بولدى" دەپ "جەتىسۋ" گازەتىنە جاريالاتقان ەدى. سونداعى ادىەكەڭنىڭ "جازعان سوڭ' ءسوزدى سويلەتىپ، ويدى ويناتىپ، جىر تۋدىرعان اقىن سياقتى، ءوزىمىزدىڭ ساكەن سياقتى جازۋ كەرەك" دەگەنى عۇمىر بويى جادىمنان شىقپاي-اق كەلەدى.
سول ساكەنمەن كەيىن تالدىقورعان وبلىستىق "وكتيابر تۋى" گازەتىندە بىرگە قىزمەت ىستەدىك. بۇل كەز ونىڭ گازەتتىڭ قارا جازۋىنان قاشقاقتاپ، جىر جازۋعا بۇتىندەي بەت بۇرعان قىزۋلى، قىزىقتى شاعى ەدى. ساكەن ولەڭدەرىن وقيتىن. پىكىرىڭدى بىلۋگە ىڭعاي بەرىپ، ىقىلاس تانىتاتىن. "وتىرىك ايتپا، وتىرىك ماقتاما؟" دەيتىن. كولگىرسىگەندى كوزشە ايتاتىن. جانىن ۇعار جاقسى جولداس، ونەردى، ولەڭدى سۇيەتىن ونەرپاز ىزدەيتىن. بۇل كۇندە ەسىمدەرى ەلگە تانىمال بولعان بەلگىلى اقىن عۇسمان جاندىبايەۆ پەن ابەن داۋرەنبەكوۆتى اۋىلدا جۇرگەن جەرىنەن گازەتكە سۇيرەپ، قىزمەتكە اكەلگەن دە وسى ساكەن ەدى.
اقسۋ وڭىرىندە تىرلىگىندە ادەبيەتكە تىك تۇرىپ قىزمەت ەتكەن مارقۇم اقىن، ءورى دراماتۋرگ قۇداش مۇقاشيەۆتىڭ 60 جىلدىق مۇشەلتويى بولىپ ءوتتى. اقىنعا ەسكەرتكىش ورناتىلدى، اۋىلدىڭ اتى بەرىلدى. تويعا رەسپۋبليكاعا بەلگىلى اقىن، جازۋشىلار قاتىسىپ، ارناۋ ولەڭدەر وقىلدى. وسى تويدىڭ وتۋىنە ۇيتقى بولىپ، ۇيىمداستىرۋشىلىق ءىس اتقارعان، اۋدان، وبلىس، وداق باسشىلارىن ءباتۋاعا كەلتىرىپ، باتاسىن العان ساكەن يماناسوۆ ەدى.
قىسقا ءجىپتى كۇرمەۋگە كەلتىرە الماي جۇرگەن مىنا ءبىر زاۋال شاقتىڭ وزىندە اقىن ساكەن:
"...الىدە
ءبىر جاقسىلىق جاساعىم-اق كەلەدى، ەلدىڭ بارىنە،
ريزا بولىپ جۇرسە دەيمىن، كۇلسە دەيمىن ءماز بولىپ،
ەڭبەكتەگەن بالاسى دا، ەڭكەڭدەگەن كارى دە"، —
دەيدى اعىنان اقتارىلىپ. اقىن اعالارى عالي ورمانوۆ پەن ادىلبەك ءابايدىلدانوۆتىڭ ەڭبەكتەرىنىڭ اتاۋسىز قالىپ بارا جاتقانىنا دا ەڭ الدىمەن سونىڭ قابىرعاسى قايىساتىن سياقتى.
استە دە ساكەن جالعىز جۇرە المايدى. ساپارعا شىعىپ، جول جۇرەر بولسا، جولداس ىزدەيدى. جاي جۇمىستا ءجۇرىپ تە، تۇسكى اسقا: "ءجۇر، ءبىزدىڭ ۇيگە بارايىقشى" دەپ، ءوتىنىش جاساپ جۇرگەنى. ال ەرتەلى-كەش ۇيىنە بارا قالساڭ، اقىن جارى اق جارقىن ماريامنىڭ ءوزى باستاپ، بالالارى گاۋھار مەن ولجاس قوستاپ، قۇراق ۇشىپ، كوپتەن كۇتكەن، قىرىمنان كەلگەن قوناقتارىنداي قۋانا قارسى الادى. بۇل ۇيگە جاتسىنۋ مەن جاتىرقاۋ مۇلدە جات.
بۇل كۇڭدە الاكولدەن شىققان الاشتىڭ اقسۇڭقار اقىنى اتالىپ، ابىروي-اتاعى شارتاراپقا تاراپ جاتقان يماناستىڭ ساكەنى، مىنە، اسقارالى اسۋلى الپىسقا دا كەپ قاپتى. ءتايىرى، اقىن ءۇشىن الپىس جاس — تال ءتۇس جاس ەمەس پە؟! ارداقتى اقىن دوسقا "جۇرەكتەن شىققان جىرلارىڭ جۇرەكتەرگە جەتە بەرسىن، ولەڭ-ومىرىڭ ۇزاق بولسىن!" دەگىم كەلەدى دە تۇرادى.
وكتيابر تۋى" گازەتىنەن، 1998 جىل
You Might Also Like
-
1938 جىلدى "رەپرەسسيا" دەگەن ءبىر اۋىز سوزگە سىيعىزىپ ءجۇرمىز. ۇلتىمىزدىڭ بەتكە ۇستار ازاماتتارى، جاقسىلارى مەن جايساڭدارى جاپپاي قۋدالاۋعا تۇسىگى، قولدى بولىپ، كوزى جويىلىپ، ءومىر اتاۋلىنىڭ...
