InfoHub Logo

جالعىز بوز اتىنان باسقا ەشبىر كولىگى جوق ءبىر كەدەي بولىپتى. ونىڭ جايشىلىقتا بۇتا ارتار، كوشكەندە جۇك ارتار كولىگى دە وسى اتى ەكەن.

ول ءبىر كۇنى بار-جوعىن بوز اتىنا ارتىپ، كوشىپ بارا جاتسا، ءبىر اۋىلدا قالىڭ ادام جينالىپ اس بەرىپ، بايگە قوسىپ، دىر-دۋمان بولىپ جاتىپتى. ولاردىڭ تۇسىنان الگى ادام بوز اتىن جەتەكتەپ ءوتىپ بارا جاتقاندا، بوز اتى ءبىر كۇرسىنىپ قالعان ەكەن، تارتۋ ارقانى ءۇزىلىپ كەتىپتى. مۇنى كورگەن الگى كەدەي: «ە، جانۋار-اي، ىشىڭدە ونەرىڭ بار ەكەن عوي، سەنىڭ دە قارىزىڭنان ءبىر قۇتى لايىن» دەپ جۇگىن سول جەرگە ءتۇسىرىپ تاستاپ، اتتىڭ ىڭىرشاعىن الماستان، بايگە بولىپ جاتقان اۋىلعا بارىپتى، وعان ەشكىم قاراپ تا قويماپتى. تەك اتتاردى ايدايتىن كەزدە كەدەي: «اتىمنىڭ ارقاسى جايداق مىنۋگە كەلمەيدى، ىڭىرشاعىمەن بالام ءمىنىپ بارادى»، — دەپتى دە قالىڭ جۇيرىكتەردىڭ سوڭىنان ىلەستىرىپ جىبەرىپتى.

بايگە كەلەدى-اۋ دەگەن مەزگىلدە اتى بارلار دا، باسقالار دا كەزەڭگە شىعىپ، شاڭ كورىنگەن جاققا قاراۋمەن بولادى. ءبىرى انا ات كەلەدى دەسە، ءبىرى مىنا ات كەلەدى دەپ تۇرعاندا، جالعىز شىققان بوز ات ەكەنى انىق بولادى. ازدان سوڭ باسقا اتتاردان كوش بۇرىن ىڭىرشاعىن سۇيرەتىپ بوز ات كەلگەن ەكەن.

ۇستىندەگى بالاسى جىعىلىپ، ىڭىرشاعىمەن كەلگەن اتقا، جول بويىنشا ەكىنشى بايگە بەرىلىپتى. وسىدان باستاپ، بۇل كەدەيدىڭ كۇيسىز كولىگى — بوز اتقا ارنالىپ «ىڭىرشاقتى بوز» دەگەن كۇي شىعارىلعان ەكەن.

---