InfoHub Logo

وتىزىنشى جىلدارى قۇرىلعان قاراقۇم — ساعىز ءوندىرىسى مەكەمەسىنىڭ قاراجاتىن تالان-تاراجىعا سالدى دەگەن جالامەن ايىپتاپ، سول مەكەمەنىڭ باستىعى تاۋشايەۆ جاعال ون جىلعا سوتتالادى. سوت پروسەسى ارال قالاسىندا جۇرگىزىلەدى. سوتتىڭ ۇكىمى بويىنشا ايىپكەر ءتيىستى جەرگە شاعىم ارىز بەرىپ، شاعىنۋىنا جەتپىس ەكى ساعات قانا ۋاقىت بەرىلەدى. ول وسى ۋاقىتتىڭ ىشىندە ارىز بەرىپ ۇلگەرۋى كەرەك. كەش قالسا ارىز قابىلدانبايدى دەپ كورسەتىلەدى. ءبىراق حالىققا قادىرمەندى، ابىرويلى جاعالدى اۋداننىڭ بەلدى باسشىلارى ءبىر اي كەپىلدىككە سۇراپ الادى.

كەپىلدىككە شىققان سوڭ جاكەڭ سوتتىڭ ۇكىمىنىڭ كوشىرمەسىن الىپ، الماتىعا جوعارعى سوتقا جۇگىنۋگە كەتەدى.

ول كەزدەگى جولاۋشىلار پوەزى ءاربىر رازەزد بەن ستانسياعا توقتايتىن «ماكسيم» پوەزى. سول پوەزبەن ءۇش تاۋلىك جول ءجۇرىپ بارادى. ورىس ءتىلىن وتە جەتىك بىلەتىن جاكەڭ قولىنداعى ادرەسىمەن ەشكىمنەن سۇراپ اۋرەلەنبەي-اق، جوعارعى سوتتىڭ كەڭسەسىن تاۋىپ الىپ، سوتتىڭ كابينەتىنە كىرىپ بارادى.

توردە سوتتىڭ ءتوراعاسى وتىر ەكەن. كەسكىن-قياپاتى كەلىسكەن قازاقتىڭ كادىمگى موڭعول باس ازاماتى. اماندىق-ساۋلىقتان كەيىن جاكەڭ قولىنداعى سوت ۇكىمىنىڭ كوشىرمەسى مەن شاعىم ارىزىن بەرەدى دە، ءوزى تىنىش وتىرادى.

سوتتىڭ ءتوراعاسى ۇكىمدى بايىپتاپ وقىپ، ءار جەرىن قارىنداشپەن بەلگىلەپ، باسىن شايقاپ كوپ وتىرادى. شاماسى ۇكىم بۇزىلۋعا جاتپايتىن بولىپ زاڭدى جازىلعان بولۋى كەرەك. ءبىر ۋاقىتتا سوتتىڭ ءتوراعاسى تاعى دا باسىن شايقاپ:

— قاتپا بولعان تۇيەگە ويسىل قارا نە قىلسىن-اي! — دەپ

جاعالعا قارايدى. مۇنىسى ونىڭ ءىسىڭ اۋىر، قولىمنان كەلمەيدى دەگەنى ەدى.

سول كەزدە جاكەڭ ورنىنان ۇشىپ تۇرىپ:

— قاتپا بولماسا، ول تۇيە ويسىل قارانى نە قىلسىن-اي! — دەپ جاۋاپتى بىردەن سارت ەتكىزەدى.

ءتوراعا ەندى قايتىپ تىلگە كەلمەيدى. جاعالدىڭ قولىنا ءۇيىنىڭ ادرەسىن جازىپ بەرەدى دە:

— ۇيگە بارا بەرىڭىز. مەن كوپ كەشىكپەي جەتەمىن، — دەپ جاكەڭدى ۇيىنە جىبەرەدى. ارتىنان ءوزى دە كەلىپ جاعالمەن جاقىنىراق تانىسادى. ءۇي ەگەسى قازاقتىڭ ءسوز تىڭداۋعا قۇمار جانە اڭگىمە تاريحتى كوپ بىلەتىن قۇيماقۇلاق كىسى ەكەن. ەكەۋى بىرىنە-بىرى ساي كەلىپ، نەبىر شىرىن اڭگىمەلەردى قوزعايدى. تانىسادى، بىلىسەدى.

ءبىر جەتىنىڭ ىشىندە ءىستى قىزىلوردادان الدىرىپ، ونى قاراپ، كوتەرىلگەن ماسەلە دۇرىس ەمەس، جالا دەپ تاۋىپ، جاكەڭدى اقتاپ جىبەرەدى. سوت قاشان اقتاعانشا، جاكەڭدى ءوز ۇيىندە ساقتايدى.

اقتالىپ قايتىپ كەلگەن جاكەڭ ارمىسىڭ ايتا كەلگەن اعا-ىنىلەرى مەن زامانداستارىنا جوعارى سوت ءتوراعاسىنىڭ قازاقتىڭ كونە اڭگىمەسى مەن شەجىرەسىن كوپ بىلەتىنىن، ءتىلمار شەشەن ەكەنىن، جۇرەگى تازا، كىرشىكسىز ادال ازامات ەكەنىن كوپ اڭگىمە ەتىپ ايتىپ ءجۇرىپتى.

---