InfoHub Logo

قىزىلباس پاتشاسىنىڭ ابدۋللا دەگەن ءۋازىرى بار ەدى. سونىڭ زامانىندا جۇرت بۇزىلىپ، ءبىر كۇنى ءۋازىر پاتشاعا كەلە جاتقاندا حالىق قاماپ: دەگەنىمىزدى ىستە، ىستەمەسەڭىز ولتىرەمىز، — دەپ، ىشىندە ءبىر باتىرىراعى ءۋازىردى ساقالىنان الىپ جۇلىقتى. ءۋازىر اشۋ ەتپەدى. بۇلاردان شىققان سوڭ پاتشاعا بارىپ، جۇرتتىڭ تىلەگىن بەرىڭىز دەپ ءوتىنىپ، تىلەگەنىن پاتشادان الىپ بەردى جانە ءوزىنىڭ كورگەن كەمشىلىگى ءۇشىن ەشكىمگە جازا بەرمەڭىز دەپ ونى دا تىلەپ الدى. ەرتەڭىنە ۋازىرگە ءبىر ساۋداگەر كەلىپ:

— تاقسىر، كەشە ءسىزدى رەنجىتىپ، ساقالىڭىزدان جۇلىققان كىسىنى ايتايىن دەپ كەلدىم، ول ناعىم دەگەن مەنىڭ كورشىم ەدى، الدىرىپ جازا بەرىڭىز، — دەدى.

بۇل ءسوزدى ەسىتكەن سوڭ ءۋازىر ساۋداگەردى قايتارىپ، ناعىمدى شاقىرتىپ الدى. ناعىم: مەنىڭ كەشەگى ءىسىمدى بىرەۋ ايتىپ تانىتقان ەكەن، — دەپ قورىققانىنان ۇرەيى كەتىپ، كەلە-اق ءۋازىردىڭ اياعىنا جىعىلدى. ءۋازىر ناعىمدى جەردەن كوتەرىپ الىپ، ايتتى دەيدى:

— مەن سەنى جازالاندىرۋ ءۇشىن شاقىرمادىم. ءبىراق، كورشىڭ ساۋداگەر جاقسى كىسى ەمەس ەكەن. سەنىڭ بىلمەستىگىڭدى ماعان كەلىپ ايتتى. ەكىنشى رەت ول كورشىڭنەن ساقتانىپ جۇرگەندەي ەكەنسىڭ. سونى ايتايىن دەپ شاقىرىپ ەدىم. ەندى امان بول! — دەپ ىشكەرگى ۇيىنە كىرىپ كەتتى دەيدى.

---