InfoHub Logo

ءۇش كىسى جالانعا شىعىپ، كۇن بويى قۇس اۋلاپ، جالعىز-اق شۇرەگەي ۇيرەك اتىپ الىپتى. كەشكە ءبىر جەرگە كەلىپ وتىرىپ سويلەسەدى: بۇل ۇيرەكتى ۇشەۋىمىز جەپ تويمايمىز، بىرەۋمىزگە ءجون بولمايدى، — دەپ. ىشىندە بىرەۋى قۋ جىگىت ەكەن، بۇل ايتتى:

— وعان اقىل تابىلادى. ۇيرەكتى ءپىسىرىپ، بەتىن جاۋىپ قويالىق تا، ۇشەۋىمىز دە جاتىپ ۇيىقتالىق، قايسىمىز جاقسىراق ءتۇس كورسەك، ۇيرەكتى سول جەسىن، — دەدى.

وسىعان ءسوز قويىسىپ، ۇيرەكتى ءپىسىرىپ، بەتىن جاۋىپ، وزدەرى جاتىپ ۇيىقتاعاندا، ماناعى قۋ تۇردى دا ۇيرەكتى جەپ الىپ، تاباعىنىڭ ءۇستىن اۋەلگىشە جاۋىپ قويدى. ەرتەڭ جولداستارىمەن بىردەي تۇرىپ قۋ سۇرادى:

— نە ءتۇس كوردىڭىزدەر؟ — دەپ.

بىرەۋى ايتتى:

— مەن اقبوز اتقا ءمىنىپ، التىن ءتاج كيىپ، كوككە ۇشىپ ءجۇر ەكەنمىن.

ەكىنشىسى ايتتى:

— مەن ۇشپاققا كىرىپ، حور قىزدارى ماعان قىزمەت ەتىپ ءجۇر ەكەن.

سوندا قۋ ايتتى:

— ەكەۋىڭدىكى دە راس، مەن تۇسىمدە سەڭدەرگە قاراپ تۇرىپ ەدىم، ءبىرىڭ پاتشا بولىپ كوككە ۇشىپ كەتكەن سوڭ، ەندى ءبىرىڭ ۇشپاققا كىرىپ كەتكەن سوڭ، ءبىر شۇرەگەي ۇيرەككە بولا قايتىپ كەلىپ جاتار دەيمىسىڭ دەپ، ۇيرەكتى مەن جەپ قويدىم، — دەدى.

---