InfoHub Logo

بۇحار بارىپ جولاۋشى جۇرگەن كۇنىندە ەكى جاق بولىپ توبەلەسىپ جاتقاندارعا كەز بولىپ:

— مىنانى ايىرايىق، اراشالايىق، — دەسە، جانىنداعى جول داستارى:

— ءوزىمىز جولاۋشى ءجۇرىپ، ايدالاداعى بىرەۋدىڭ بىزگە ولگەن-تىرىلگەنى نە كەرەك؟ — دەپتى.

سوندا از جاعى: «كىم دە بولسا، جاڭاباتىردى تانىپ ايىرادى عوي، اراشالايدى عوي» — دەپ دامەلى بولىپ قالعان ەكەن.

جۇرتقا اتى شىققان ءىرى كىسىنىڭ اراشاشى بولماي، كەرەكسىز قىلىپ وتە بەرگەندىگىنە وكپەلەپ، سوندا ءولىمشى بولىپ تاياق جەپ قالعان.

— كىم سەنى ۇرعان، سوققان؟ — دەپ سۇراعىشقا:

— ماعان قىلعاندا، كۇلىك جاڭاباتىر بي قىلدى. مەنىڭ كانىم سونىڭ موينىنا، — دەپ ءولىپ كەتىپتى. مۇنىڭ ۇرماعانىن، سوقپاعانىن جۇرت ءبىلىپ تۇر. بىلسە دە، ولەرمەن قادالىپ جابىسقان سوڭ، اراشالاپ ايىرماعاندىعىنىڭ ايىبىنا سەكسەن سەركە تارتقان ەكەن.

«كىمدە-كىم ەكى ۇرىسىپ توبەلەسكەندى كورە تۇرىپ، ايىرىپ، اراشالاۋعا ءالى كەلە تۇرىپ اراشاشى بولماسا، جازاتايىم سونىڭ ءبىر جاعى ءولىپ كەتسە، قۇنىن ولتىرۋشىدەن السىن دا، ايىبىن اراشالاماعاننان السىن!» — دەپ.

ەندى ءبىر ۇلى جيىن، استا جەردەن سىڭار اياق وتكەن جەتى جۇرتتى تاۋىسقان ءبىر قۋ كەلدى دە، بەلدەۋدە بايلاۋلى تۇرعان جاڭاباتىر ءبيدىڭ اتىنىڭ اۋزىن اشىپ قارادى دەيدى. قاراسا، ءتىلىنىڭ تۇبىنە تاقالعان جەرى قاپ-قارا ەكەن. جەرگىلىكتى قۇداي جاراتقان، ءوزى قويانداي بوز ات ەكەن. سول جاتىپ جابىستى دەيدى:

— قۇلىن كۇنىندە جوعالتقان بوز بيەنىڭ قۇلىنى ەدى، — دەپ.

جاڭاباتىر:

— ءوز جىلقىمنىڭ تۋماسى. اۋزىن ۇرىپ، اياعىن قولدان سىپىرعان تۇل اتىم، — دەيدى. اناۋ:

— قۇلىن كۇنىندە جوعالتقان مەنىكى، — دەيدى.

داۋ بولعان سوڭ، ءبىر كولدەنەڭسىز قۇتىلا ما، جۇگىنىسكە تۇسەدى. سوندا جالامەنەن جابىسۋشى كورىنبەگەن جەرىنەن بەلگى ايتىسايىق دەيدى. جاڭاباتىر:

— ءبىر مەڭى جوق قويانداي بوز ات، بۇعان باسقا بەلگى نە كەرەك؟ —  دەيدى.

— ەندى وسىنىڭ كورىنبەگەن جەرىنەن بەلگى ايتسام، مەنىكى بولا ما؟ — دەيدى.

— قاپ، ەندى وسىدان كوزدىڭ كولەمىندەي بوزدىعىنان باسقا بەلگى تاپساڭ، سەنىكى- اق بولعانى، — دەيدى.

— مەنىڭ بيەمنىڭ ءتىلىنىڭ تۇبىنە تاقالعان جەرى قول باسىنداي قاپ-قارا ەدى. ەنەسىنە تارتسا، مۇنىڭ دا ءتىلىنىڭ تۇبىندە سول بەلگى بار شىعار. ەگەر دە ءتىلىنىڭ يا ۇشىندا، يا ورتاسىندا، يا تۇبىنە تاقالعان جەرىندە قول باسىنداي قارا بولماسا، مەنىڭ بوز بيەمنىڭ كۇلىنى بولماعانى، — دەيدى.

اتتى الدىرىپ، اۋزىن اشىپ قاراسا، ءتىلىنىڭ تۇبىنە تاقالعان جەرى قاپ-قارا ەكەن.

— مىنانىڭ ءسوزى شىن بولدى، — دەپ، — سىزدەي كىسىنىڭ استىنان ات الۋ جول-جوباعا سىيمايتۇعىن نارسە، بۇل ات بۇگىن ءوز استىڭىزدا بارسىن. «وزىمدىكى ەكەندىگى شىن ەدى» دەپ ءبىر اۋىز ءسوز ايتىپ، اتتى وزىڭىزدىكى قىلساڭىز دا، ءوزىڭىز ءبىلىڭىز. «جوق، تاقىمىم ۇيرەنگەن جانۋار ەدى» — دەپ ءۇش بەستى بەرسەڭىز دە، ءوزىڭىز ءبىلىڭىز، — دەلىنگەن سوڭ، جۇرت داعدارىپ تارقاستى دەيدى. ەرتەڭ تاڭ اتقان سوڭ، جاڭاباتىر ءۇش بەستى الىپ كەپ ورتاسىنا كەلدى دەيدى:

— الەۋمەت، كوپ، جيىلعان توپ، كەشە وزىمدىكى دەپ تالاستىم، بۇگىن مىنانىكى قىلىپ، تولەۋىن الىپ كەلىپ وتىرمىن. ۇيگە باردىم، ءبىر اياققا اپپاق ءسۇت قويدىم. ءبىر اياققا ءمولدىر، تۇنىق قارا سۋ قويدىم. ءسۇتتى قايىرا سۇتكە قوستىم. سۋدى سۋعا قوستىم. سۇتتەن جۇعىن قالدى. سۋدان جۇعىن قالمادى. ويلادىم مەنىڭ ءسوزىمنىڭ اقتىعى سۇتتەي اق شىعار، سوندا دا ونان جۇعىن قالدى-اۋ. انە، بالەكەتتىڭ ءسوزىنىڭ قارالىعى قارا سۋداي-اق شىعار، سوندا دا ونان جۇعىن قالمادى-اۋ؟! ا، بۇرىنعىنىڭ «اق تا بولسا، انت ىشپە، ايرانداي جۇعادى» دەگەنى وسى ەكەن-اۋ! دەپ، ءبىر اۋىز ءسوز ايتۋعا جاراي الماعانىم وسى، — دەپتى. انانىكى جالا ەكەندىگىنە جۇرتتىڭ كوزى جەتىپتى، سوندا دا بولماي جاڭاباتىر بەستى بەرگەن ەكەن.

---