جاقپار، جاقپار تاستاردا سۇلۋلىق بار
(مۇرات دۇيسەنباي ۇلى راحمەتوۆكە)
...ءسىز جايلى جىر جازباق
وي، ءسىرا، جوق ەدى،
كەنەتتەن جىر مازداق
الاۋلاي جونەلدى.
وي ءتاڭىر، تەربەگەن
ايدىنعا بۇرقانعان،
سالىپ مەن وتىرمىن
جىر اتتى كەمەنى.
1
ۋاقىت اۋمالى-توكپەلى،
(كەي پەندە تاڭىرگە وكپەلى)
كەشىگىپ مەيىرىم كوكتەمى،
قىرسىقتىڭ قۇرساۋلاپ كوك سەڭى.
جانىمدى
الاپات مۇز قىراۋ قۇرساعان،
كوڭىلىم ريزا ءبىر ساعان.
تانىتىپ ەلدىكتى،
شارت ءتۇيىپ بەلدىكتى،
تۇرگىزگەن بىلەكتى.
قاجىر مەن قايراتىن جۇمساعان،
بەردى اعا جەمىسىن.
ءوزىڭدى
تانۋ ۇعىنۋ مەن ءۇشىن
وڭايعا سوقپاعان...
بەيمازا تۇرقىڭدى،
باعامداپ سىرتىڭدى،
ىشىڭە ۇڭىلمەي،
(كۇلكىلى ءبىر ءتۇرلى)
جاساپپىن ءوي-تۇيىن.
بيلەتپەي ىرقىڭدى،
بۇزدىرماي شىرقىڭدى،
تورعايداي شىرىلداپ،
قورعاعان جۇرتىڭدى،
كەزەڭدە تىم قيىن.
جانىڭدى كەش ۇقتىم،
جالتاقتاپ جاسىرمان.
ايىرۋ قيقىمدى
ايىرۋ اسىلدان،
اۋىرى بۇل جۇكتىڭ.
2
...جاقپار، جاقپار تاستاردا،
جاسىرىنعان سۇلۋلىقتى كىم ۇققان.
(سۇلۋلىققا تۇر ەكەن-اۋ تۇنىپ ماڭ)
قارا تاستا قاسيەت بارىن سەزىنبەي،
كاززاپتاردىڭ قۇنىققان،
تالقانداعان جاقپار-جاقپار تاستاردى.
قولىن قاعۋ قاپەرگە دە كىرمەگەن،
ۋ ىشەدى بىلمەگەن.
قازىنانى كوز الدىندا تالاتۋ،
بولىپ شىقتى-اۋ بۇل دەگەن.
3
قارا تاستان
قورا –قوپسى قالاعان،
الاماندار قاسقىردايىن تالاعان.
ۇستى-ۇستىنە جاتتى تاستى تىلگىلەپ،
قانسىراعان تانگە تۇسكەن جارادان.
دالا جاتتى ازالى ۇنگە تۇنشىعىپ،
كوكجيەككە كوتەرىلگەن كۇن شىعىپ.
قارا تاستان
قارا قاندى اققان ساۋلاپ سۋدايىن،
كورگەن ساتتە كىردى بۇلتقا بۇلقىنىپ.
كوپ ۇزاماي جانارىنان جاس تامىپ،
ازا جاڭبىر
ازان-قازان كەتە باردى باستالىپ.
تابانعا ساپ كوزسىز كەزەڭ ەل ارداعىن تاپتاعان،
كەتە بارعان شاش ورنىنا باستى الىپ.
ءوتتى اقىرى سان تاعدىرعا
ۋ سويقى ءىزىن قالدىرىپ.
قاندى تىرناق بوساتقاندا شەڭگەلىن،
سەنسەڭ، اعا، سەڭ سوققانداي سەندەلدىم.
قۋانىشىم كوكىرەگىمە ىستىق جاس بوپ قۇيىلىپ،
تىلەگىنە تىلەك قوستىم مەن دە ەلدىڭ.
4
قارا تاسىن
بىزدەر تۋعان مىنا بايتاق دالانىڭ،
پەرزەنتىنە جەر-انانىڭ بالادىم.
قۇز جارتاستار مىنەزدەگى ورلىگىم،
شىڭدار اناۋ قياندارعا
قادالاتىن جانارىم.
سودان با ەكەن،
شىڭ-قۇزداردى الىس جۇرسەم ساعىنام.
قارا تاسى –بويتۇمارىم،
وزگە جۇرتتىڭ اق ءمارمارىن نە قىلام.
قارا تاسىم كۇي تەربەتىپ الدىمنان،
تۇرعاندايىن ءارقايسىسى سالىپ ءان.
5
قارا تاسقا
ءمۇسىنشىنىڭ سىرىن شەرتسە شاپقىسى،
بەزە قاشپاي
شىڭىلىنا شىدايدى ەكەن شاق كىسى.
جانسىز تاستى قىرناپ، جونىپ، ءبىر قالىپقا كەلتىرگەن،
حاس شەبەردىڭ اڭساي كۇتكەن ب ا ق قۇسى.
توبەسىندە ءساتى مە ەكەن قالىقتاعان بۇل، ءسىرا،
شومبال تاستى بالشىقشا يلەپ كوندىرگەن دە ىرقىنا.
ماڭدايىنان مونشاق-مونشاق تەر ساۋلاپ،
ءمۇسىنشىنىڭ تۇرقىنا ءسۇيسىندى جۇرت.
سىرت باقىلاپ ۇزاق تۇردىم قاسىندا،
جۇمباق ءمۇسىن سىر سىمباتى اشىلا...
بۇقار جىراۋ بابام بولىپ، و ءتاۋبا!
ورالعان با تۋعان جەرگە اسىعا.
دەگەن ويعا پەندەلىكپەن بەرىلگەم،
سەنسەڭ ، اعا، كوز الدىما كەرىلگەن،
بايتاق دالا اۋليەگە ءتاۋاپ قىپ،
شىڭ-قۇزدارىم باس يگەندەي كورىنگەن.
You Might Also Like
-
كوزىڭدى اشىپ، ويان. سەنى كۇن سايىن ءار ءتۇرلى، جاڭا نارسەلەر كۇتىپ تۇر. ءومىردىڭ قىزىعىن، ءتاتتىسىن جىبەرىپ الما. قاراڭعى تۇنەكتەن جارىق جۇلدىزدى ىزدەۋگە تىرىس. قولىڭنان كەلمەسە، ازعانتاي ۋاقىتقا توقتا،...
-
ءبىلىم الۋ – سان قيلى ارەكەت ءتۇرىن قامتيتىن اسا كۇردەلى ءارى ۇزدىكسىز پروسەسس. وعان قاتىساتىن ءار ادامنىڭ ءوز قابىلەتى، ءوز ىرعاعى مەن تالعامى بار. سوندىقتان دا ءبىلىم الۋ ءار ادام ءۇشىن ەرەكشە پروسە...
