InfoHub Logo

ءوزىم جاقسىلىق پەن جاماندىق اراسىندا تاڭداۋ جاسايتىن كەزدە، ءومىردىڭ تىم قىسقا ءارى بارلىعىنىڭ ۋاقىتشا نارسە ەكەنىن ەسىمە تۇسىرەمىن. سەبەبى، ءار نارسەنىڭ سۇراۋى بار. بۇگىن بىرەۋدى قۋانتساڭىز، ەرتەڭ ءسىزدى بىرەۋ ەرەكشە قۇرمەتپەن سىيلاپ، تورىنە شىعارادى. بىرەۋدى جىلاتساڭىز، ەرتەڭ كۇتپەگەن جەردەن توسەك تارتىپ جاتىپ قالۋىڭىز مۇمكىن. سول سەبەپتى، ءاردايىم ادامگەرشىلىك سىندى قاسيەتتى جوعارى ۇستاعان دۇرىس. ءتىپتى، بىرەۋگە جاساعان جاقسىلىعىڭىز بەن جاماندىعىڭىز بۇگىن قايتپاسا، ەرتەڭ سونىڭ بارلىعى بالالارىڭىزعا قايتادى. ءدال ءقازىر بىرەۋگە جاماندىق جاساعان ءساتىڭىزدى ەسىڭىزگە ءتۇسىرىڭىزشى. سول نارسە وزىڭىزگە قايتىپ كەلگەن كەزدە قاتتى قينالدىڭىز ەمەس پە؟ ءبىر كەزدەرى مەن دە وسىلاي جاساپ ەدىم عوي دەپ سان سوعىپ قالعان كەزىڭىز بولدى عوي. ەندى بىرەۋگە جاقسىلىق جاساپ، ونى قۋانتقان ءساتىڭىزدى ەسكە الىڭىز. وسىدان كەيىن ءبىر قۋانىشتىڭ ارتىنان مىڭ قۋانىش ەردى ەمەس پە؟ ولاي بولسا، تاڭداۋ ەركى وزىڭىزدە. قىسقا عانا عۇمىردا حايۋانداردىڭ قاتارىنا قوسىلعىڭىز كەلە مە؟ الدە ادام دەگەن ادال اتقا لايىق بولىپ وتكىڭىز كەلە مە؟ ياعني مەن جاقسى ادام بولۋ ءۇشىن ەڭ الدىمەن ادامگەرشىلىك دەگەن قاسيەتتى دامىتار ەدىم. قازاقتا “ادام بولىپ كەلگەن سوڭ، ادام بولىپ كەتۋ قيىن” دەگەن جاقسى ءسوز بار. مەن ءۇشىن قاسيەتتەردىڭ ەڭ جاقسىسى – ادامگەرشىلىك. سەبەبى، جاقسى قاسيەتتەردىڭ جيىنتىعى – ادامگەرشىلىك دەپ اتالادى. افريكالىقتاردىڭ “جەيدەسىز ادامنىڭ جەيدە سىيلاعانىنان، ءوزىن سۇيمەيتىن ادامنىڭ سەنى سۇيەمىن دەپ ايتقانىنان قورىق” دەگەن جاقسى ماتەلى بار. راسىمەن دە، بىرەۋدى ءسۇيىپ، بىرەۋگە جاقسىلىق جاساماس بۇرىن ءوزىمىزدى سىيلاپ، وزىمىزگە جاناشىرلىق، ادامگەرشىلىك سىندى قاسيەتتەردى ۇيرەتە ءبىلۋىمىز كەرەك. ادامگەرشىلىك دەگەنىمىز نە؟ ول – قينالعان جانعا جاناشىرلىق تانىتۋ، جىلاعان ادامدى جۇباتۋ، بىرەۋدىڭ الا ءجىبىن اتتاپ وتپەۋ، ۇلكەندى سىيلاۋ، كىشىگە ىزەت كورسەتۋ، تابيعاتتى ايالاۋ، ءسۇيۋ، ماحابباتقا بەرىك بولۋ، سۇيگەنىڭە ادال بولۋ، شىنايىلىققا ۇمتىلۋ، ادىلەتتىلىك تانىتا ءبىلۋ جانە ت.ب. ءبىز ءومىر ءسۇرىپ جاتقان عاسىردا ادامگەرشىلىكتى ساقتاپ قالۋ وتە قيىن. سەبەبى، ءبىزدى ازعىراتىن اقشا بار، التىن بار، اتاق پەن داڭق بار، جەلىدەگى مىڭداعان ءلۇپىل بار. وسىنىڭ بارلىعى ءبىزدىڭ شىنايى بەت-بەينەمىزدى كورسەتىپ، ادامگەرشىلىك تانىتۋىمىزعا كەدەرگى جاسايدى.

---