InfoHub Logo

- بالام "تۋعان كۇنىمدى جاسا، ماما" دەدى، - دەيدى كەلىنشەك. - جاساسام، جاسايىن، بالامنىڭ تۋعان كۇنىن سەبەپشى ەتىپ، ۇيگە قاجەتتى ادامداردى شاقىرىپ جىبەرە قويايىنشى دەيمىن. شاقىراتىن ادامداردىڭ ءتىزىمىن جاسايمىن كەلىپ. ءبارى دە كەرەكتى ادامدار. ىشىندە كەرەكتى ەمەس ءبىرى دە جوق. ءبىراق بالام ءتىزىمدى كورىپ تەرىس اينالدى.
- مىنانىڭ ىشىندە مەن تانيتىن بىرەۋى دە جوق قوي، - دەيدى بالام قيتىعىپ.
- ءاي، سەن تانىماساڭ، مەن تانيمىن عوي! ءبارى دە ماماڭنىڭ تىرشىلىگىنە كەرەكتى ادامدار.
- ءبىراق تۋعان كۇن مەنىڭ تۋعان كۇنىم عوي، - دەيدى بالام دا قاسارىسىپ كونبەي. - روزا تاتەنى دە شاقىراسىڭ.
- نە ىستەيسىڭ ول ايەلدى؟! ءوڭ دەيتىن ءوڭى دە جوق، ءتۇس دەيتىن ءتۇسى دە جوق. ۇستىنە كيگەنى دە ارزانقول بىردەڭە.
- ءبىراق ول جاقسى ادام عوي، - دەيدى ۇلىم دا كونبەي.
- ال، جارايدى! روزا تاتەڭدى دە شاقىرايىن. ءبىراق روزا تاتەڭ ءقادىرلى قوناقتاردىڭ ۇستىنە كىرمەي-اق قويسىن، جاراي ما؟! ءوزىڭ روزا تاتەڭمەن بولەك وتىراسىڭ با؟
- ءياا! - دەيدى بالام كوزى جايناپ.
تىزىمگە ۇنىلەمىن كەلىپ. "جاقسى ادامداردان ەشكىم قالىپ قويعان جوق پا؟"
- ايتقالي اعانى دا شاقىراسىڭ، - دەيدى بالام.
- ونى نە ىستەيسىڭ؟! ول ءبىر جۇرگەن قاراپايىم ادام. ساعان ءجونى ءتۇزۋ سىيلىق تا اكەلە المايتىن شىعار.
- ماعان سىيلىعىنىڭ كەرەگى جوق! - دەيدى بالام دا قاسارىسىپ كونبەي. - تۋعان كۇنىمدە ايتقالي اعانىڭ بولعانىن قالايمىن. ويتكەنى ول جاقسى ادام.
- شارشاتتىڭ-اۋ ابدەن! اكەڭ دە وسىنداي قيتىقپا مىنەزدى ەدى. نەنىڭ دۇرىس، نەنىڭ بۇرىس ەكەندىگىن ۇيرەتە الماي-اق قويىپ ەدىم. سول مىنەزىنەن بىردەڭە تاپسا، ءجۇر عوي ەندى! بولشى، ايتشى، جاسايىن با، جاسامايىن با؟! ونسىز دا مەنىڭ جۇمىسىم باسىمنان اسادى.
- جاسايسىڭ! - دەيدى بالام. - ءبىراق ايتقالي اعانى دا شاقىراسىڭ. جىلىنا ءبىر كەلەتىن تۋعان كۇنىمدە، تىم بولماسا، مەنىڭ دە ءبىر رەت ايتقانىم بولۋ كەرەك شىعار. ونسىز دا سەنىڭ ايتقانىڭمەن ءجۇرىپ كەلەمىن عوي. مەنى ونسىز دا ول كىسىلەرگە جولاتا بەرمەيسىڭ.
- ال، جاقسى! ايتقالي اعاڭدى دا شاقىرايىن. ءبىراق ول كىسى ءتاۋىر كيىنگەن جاقسى ادامداردىڭ ۇستىنە كىرمەي-اق قويسىن، جاراي ما؟! ايتقالي اعامەن ءوزىڭ سويلەسىپ وتىراسىڭ با؟
- ءياا! - دەيدى بالام كوزى جايناپ.
"ءاي، اقىماق ۇلىم، سول، نەنىڭ جاقسى، نەنىڭ جامان ەكەندىگىن سەن قايدان بىلەيىن دەپ ەدىڭ؟ ونى ۇلكەندەر بىلەدى دە. بالانىڭ كوزقاراسىن قالىپتاستىرىپ وتىراتىن ۇلكەندەر ەمەس پە".
تىزىمگە ۇڭىلەمىن كەلىپ. قالا باسشىسىنان باسقاسىنىڭ ءبارى تۇگەل سەكىلدى. تانىسام، ول كىسىنى دە شاقىرىپ جىبەرەر ەدىم.

---