جاستىقتا شالىس باسپاعىن!
قر-نىڭ جاس اقىنى: تىلەۋبەكوۆا گۇلسانا اناربەك قىزى
قوعامداعى وزەكتى ماسەلەلەردىڭ ءبىرى - جەتىم بالالاردىڭ جاي-كۇيى. انىعىراق ايتساق: قارىنى توق، كيىمى كوك جەلىككەن جاستاردىڭ قىزىق قۋىپ، سوڭىنان وپىق جەپ، وزگەنى دە وكىندىرىپ جاتاتىنى. بۇلاي دەۋىم، بولاشاعى بۇلىڭعىر دۇنيەگە ويلانباي ارالاسىپ، ۇلتىمىزدىڭ مەنتاليتەتىنە مۇلدەم جات ويىن-ساۋىق ورتاسىندا قىزىق قۋىپ، نامىسى مەن ار-ۇياتتان جۇرداي بولعان ورىمدەي بويجەتكەندەر تىم كوبەيدى. ءسانى مەن سىمباتى جاراسقان وسى ءبىر ارۋلاردىڭ «كۇندە قىزىق، كۇندە توي» وسى ءجۇرىسى مەنى قاتتى قىنجىلتادى. الابۇرتقان جاستىق شاقتى سوڭىنان ەرتىپ، ەلىكتىرىپ اكەتەتىن بەيمالىم الەمنىڭ شىرماۋىنا ءبىر شارپىلساڭ، ءومىر جولىنىڭ ارناسى بۇزىلىپ، تەرىس جولعا باستاي جونەلەدى.
جىلاپ جۇرسە قازاقتىڭ ءبىر بالاسى،
ىشىندە ونىڭ اشۋ، ىزا نالاسى.
بولماس ەدى جەتىم دەگەن ءسوز مۇلدە،
ءوز بالاسىن تاستاماسا اناسى.
ويناقتاپ ءجۇرىپ وت باسقان بۇگىنگى بويجەتكەن-اۋ، سەن— ەرتەڭگى اياۋلى جار، اسىل انا ەمەس پە ەدىڭ!؟ جارىق دۇنيە ەسىگىن ەندى عانا اشقان بەيكۇنا ءسابيدىڭ كوز جاسى. وبالى كىمگە؟!! سارىاۋىز بالاپان سىندى ءسابي اۋىزىن اشىپ، شىرقىراپ تاماق سۇراپ، اركىمگە جاۋتەڭدەپ جاتسا، تىرلىگىن سايرانعا تولتىرىپ جۇرگەن تىرشىلىك يەلەرىنىڭ ومىرىندە نە ماعىنا قالدى؟! بىرەر كۇندىك ءناپاحا ءۇشىن شاراناسىن ساۋدالاپ، ءسابيىن ساتقان جانداردىڭ ەرتەڭگى كۇننەن قايىر كۇتىپ، الدەكىمنەن مەيىرىم دامەتۋىنىڭ ءوزى بەكەر. حالقىمىز ءبىر كۇنىن ويلاعان ايەلدەن بەز، ەرتەڭىن ويلاماعان ەركەكتەن بەز- دەپ ايتۋداي-اق ايتىپتى. ءبىراق، مىناداي سوراقىلىققا بۇل ءسوزدىڭ ءوزى تىم ءالسىز. بۇل توعىشارلىق پەن قاتىگەزدىكتىڭ تەڭەۋى جوق. امال قانشا قۇلاق ەستىپ، كوز كورىپ جۇرگەن بۇل جايتتار كۇندەلىكتى ءومىرىمىزدىڭ اششى شىندىعىنا اينالىپ وتىر. وتباسى، ورتاسى، قوعام دۇرىس تاربيە بەرىپ باۋلىسا، تەرىس ادەت پەن جات قىلىقتاردان اۋلاق بولار ما ەدى بالكىم.
وتباسى - تاربيەنىڭ التىن دىڭگەگى. تامىرىنا ءنار بەرەردە قوعام مەن مەكتەپتەن بولەك اتا-انانىڭ اتقارار مىندەتى ۇلكەن. وتباسى تاربيەسى جاقسى بولسا- بولاشاقتا ءوز ماقساتىن ايقىنداپ، بارلىق ىستەرىنە جاۋاپكەرشىلىكپەن قارايتىن، ويى ۇشقىر،ءبىلىمى تەرەڭ سانا-سەزىمى شىنايى، ومىردەن ءوز ورنىن اداسپاي تاباتىن تۇلعا قالىپتاسار ەدى. وتباسىنداعى تەرىس تاربيەنىڭ ولاقتىعى، ۇلتتىڭ نامىسىنا، رۋحاني وزەگىنە ۇيات كەلتىرەتىن، ءتىپتى بالتا شاباتىن، قاتىگەز، ءوزىمشىل، ۇرپاق قالىپتاستىرىپ جاتقانداي. وعان كۇندەلىكتى ينتەرنەت جەلىلەرى مەن كوگىلدىر ەكراندا ۋاعىزدالىپ جاتقان تەكسىزدەنۋ مەكتەبىن قوسىپ قويىڭىز. وسىنشالىق تەرىس تاربيەنى ساناسىنا ءسىڭىرىپ وسكەن جاس بويجەتكەننىڭ باعى جانىپ، سۇيگەنىن تاۋىپ قوسىلعانىمەن بولماشىدان شاتاق شىعارىپ، قيت ەتسە تىرناق استىنان كىر ىزدەپ، وتباسىن ۇرىس-جانجالدىڭ ورداسىنا اينالدىرىپ، اقىرىندا اجىراسقانىمەن تۇرماي، ءوزى تار قۇرساعىن كەڭەيتىپ توعىز اي ون كۇن كوتەرگەن پەرزەنتىنەن قالاي قۇتىلارىن بىلمەي، اۋىر كۇنا ارقالاپ جاتادى. اپارىپ تاستار جەتىمدەر ءۇيىنىڭ بار ەكەنىن كوڭىلىنە مەدەۋ تۇتادى. بار جاۋاپكەرشىلىكتى سوعان تاپسىرادى. سونىمەن باستىسى، سابيگە قاتىستى بار مىندەتتەن قۇتىلدىم دەپ ويلايدى. ومىرگە ءوزى اكەلگەن سابيىنە دەگەن بار مەيىرىمى مەن انالىق ماحابباتى وسىمەن شەكتەلەدى. ال وسى ءبىر قاتەلىگى—جەتىمدەر ۇيىندە شىرىلداپ قالىپ بارا جاتقان ءسابيىنىڭ ماڭگىلىك ازابى عانا ەمەس، تاعدىرىنا وكپەلى تاعى ءبىر قاتىگەز جۇرەكتىڭ، مۇڭدى جاننىڭ تاعدىرى ەمەس پە؟!
وسىلايشا، ەكى بىردەي ادام اتىن جامىلعان ساۋىق پەن ماۋىق يەلەرىنىڭ جاۋاپسىز جىن ويناعى بالانى باقىتتى شاعىنان ايىرىپ، جەتىمدەر ۇيىندە قالدىردى دا ءوز جولىمەن ارى قاراي جالعاسا بەردى. ءالى قانشا بايعۇس جەتىمدەر پاناسىز قالىپ، جەتىمدە ءۇيىن ساعالار ەكەن؟ اتا-انانىڭ مەيىرىم شاپاعاتىنا بولەنىپ، ءسالت-داستۇرىمىزدى بويىنا ءسىڭىرىپ،جايما شۋاق كۇن كەشەر شاعىندا، تەرەزەگە جالتاقتاپ، ەسىككە ەلەڭدەپ، جانارىن مۇڭلى جاس جۋىپ، كۇرىسىنىستى كۇن مەن ارماندى ءتۇندى باستارىنان وتكەرىپ جاتقان سابيلەرگە قاراپ تۇرىپ جۇرەگىم اۋىرادى. جاۋتەڭ قاققان كىشكەنتاي پەرىشتەلەردىڭ جان كۇيزەلىسىن وسى ءبىر كىشكەنتاي ماقالاما سىيدىرا الماسپىن. مۇمكىن، كەۋدەمدەگى سىرىمدى كوپشىلىكپەن بولىسسەم، ءوزىم دە جەڭىلدەپ قالام، بالكىم وقي قالسا قۇربىلارىما دا وي سالار ما ەكەن دامە عوي مەنىكى...
You Might Also Like
