جاياۋ ءجۇرىڭىز!
ءيا، تۋرا ماعىناسىندا دا، اۋىسپالى (بەينەلى) ماعىناسىندا دا جاياۋ ءجۇرىڭىز!
تۋرا ماعىناسىنداعى جاياۋ ءجۇرۋدىڭ نە ەكەنىن ەسى كىرمەگەن كىشكەنتاي بۇلدىرشىندەر مەن ەسىنەن اداسقان، الجىعانداردان باسقانىڭ ءبارى بىلەدى. مەنىڭ ايتايىن دەگەنىم ەكىنشى ماعىناسى جايىندا...
كوزىڭىزگە تەمىر جولمەن كەلە جاتقان پويىزدى نەمەسە ترامۆايدى ەلەستەتىڭىزشى. الماتىداعى «ارمان» كينوتەاترىنىڭ جانىنداعى كوكتوبەگە اپاراتىن نەمەسە مەدەۋدەن شىمبۇلاققا اپاراتىن اسپالى جولدى دا ەلەستەتسەڭىز بولادى. بۇلاردىڭ باسقا كولىك تۇرلەرىنەن ەرەكشەلىگى نەدە؟
ءيا، ولاردىڭ بارلىعى وزدەرىنە ارنالعان رەلستەن، تروستان، ياعني وسى كولىك تۇرلەرى ءۇشىن بەلگىلەنگەن شەكتەن شىعىپ كەتە المايدى.
ەندى باعاسى «اكەڭىزدىڭ قۇنىنان» اساتىن، ساعاتىنا 300-400 شاقىرىمدى ويلانباي «شاۋىپ وتەتىن» سپورتكاردى ەلەستەتىپ كورىڭىز. «بۋگاتتي»، «پورشە»، «فەرراري»، «مازەراتي»...
ءمىندىڭىز بە (ويشا، شىنىمەن ءمىنىپ جۇرگەن بولساڭىز ءتىپتى جاقسى، ۇزاعىنان ءسۇيىندىرسىن!)؟ مىنگەن بولساڭىز، بۇل كولىكتەردى پويىز-ترامۆاي-مەترو، اسپالى جول كولىكتەرىمەن سالىستىرىڭىز. ءيا، سۋپەر سپورتكارلار تاقتايداي جازىق جولدى قاجەتسىنەتىنىن بىلەسىز. بۇلاردىڭ دا شەكتەن شىعا المايتىنىنا كوزىڭىز جەتتى.
ويىڭىزعا جول تالعامايتىن كولىك كەلگەن شىعار؟ ول شىنىمەن-اق جول تالعاماي ما؟ ءيا، سپورتكارلار مەن جەڭىل كولىكتىڭ بارا المايتىن جەرلەرىنە ولاردىڭ «اياعى» جەتەدى. ءبىراق ولاردىڭ جەتەتىن جەرىنىڭ دە شەگى بار عوي.
ءسوزدى كوپ سوزباي-اق، جول تالعامايتىن كولىكتىڭ دە، ۇشاقتىڭ دا، قايىق-كەمەنىڭ دە، اتتىڭ بارا الاتىن جەرىنىڭ شەگى بار ەكەنىن ايتايىن.
ال ەندى، جاياۋ ادام جايىندا نە دەيسىز؟ ارى قاراي وقىماي تۇرىپ، وسى جايىن ويلانىپ كورىڭىزشى.
ەندى وقىڭىز.
جاياۋ ادام جولمەن دە، جولسىزبەن دە جۇرەدى. راس قوي!؟ جاياۋ ادام سۋمەن دە جۇزەدى، اعاشقا دا، تاۋ-تاسقا دا ورمەلەيدى. كەرۋلى تۇرعان ارقان بولسا، ونىمەن دە ءبىراز جەرگە جەتە الادى...
— مىناۋ نەمەنە مىجىپ كەتتى، — دەپ وتىرعان بولۋىڭىز مۇمكىن. سوندىقتان نەگىزگى ماسەلەگە ويىسايىن.
«پسيحولوگيالىق ينەرسيا» دەگەن بولادى. قىسقاشا ايتقاندا، ول — بەلگىلى ءبىر ويدىڭ، يدەيانىڭ، تۇجىرىمنىڭ جەتەگىندە كەتۋدى بىلدىرەدى. ياعني، بەلگىلى ءبىر «كولىك» بولىپ قالىپتاسۋ دەگەن ءسوز. ويلاۋ (ويلانۋ) ماعىناسىندا «پويىز» بولساڭىز، «رەلسىڭىزدەن» شىعا الماي جۇرەسىز. قانداي «كولىك» بولساڭىز سول كولىكتىڭ «جولىنا» ءتۇسىپ الاسىز دا، باسقادا شاتاعىڭىز جوق كەتە بەرەسىز. باسقا «كولىك» نەمەسە «قارا جاياۋ» بولۋعا بولاتىنى قاپەرىڭىزگە دە كىرمەيدى.
باعانادان بەرى ايتايىن دەپ وتىرعانىم — ءبىر سارىندى ويلانباڭىز. «جاياۋ ادامنىڭ» «كولىككە» قاراعاندا الىمدى بولاتىنىن ەندى بىلەسىز. پروبلەما تۋرالى ويلانباڭىز، ول پروبلەمانى قالاي جايعاۋعا بولاتىنى تۋرالى ويلانىڭىز. اقىل-كەڭەستەرىن بەرگەن دوس-جاراندارىڭىزدى مۇقيات تىڭداڭىز. ول كىسىلەردىڭ قانداي «كولىك» تۇرعىسىنان اقىل-كەڭەس ايتىپ تۇرعانىن دا قاپەردە ۇستاڭىز. سەبەبى، «قايىق» تاپ بولعان قىجالاتتان رەلسىن عانا بىلەتىن «پويىزدىڭ» شىعارۋى مۇمكىن ەمەس. جاياۋ ادام كەز كەلگەن كولىكتى تىزگىندەي الادى، ال كولىك جاياۋدى تىزگىندەي الا ما؟
قىسقاسى، بىردەڭەدەن قىجالات بولىپ تۇرساڭىز، «كولىكتەن» ءتۇسىپ، «جاياۋلاپ» كورىڭىز. سوندا پروبلەماڭىزدى الدەقايدا وڭاي جايعايسىز.
دەنساۋلىعىڭىز جاقسى بولسىن دەسەڭىز — جاياۋ ءجۇرىڭىز!
اقىلىڭىزعا اقىل قوسقىڭىز كەلسە — جاياۋ ءجۇرىڭىز!
جاياۋ جۇرگەن قوس ماعىناسىندا دا پايدالى.
سايات امىربەك
You Might Also Like
-
سان جىلدار بويى قازاقتىڭ باسىنا ۇيىرىلگەن قارا بۇلت كەيبىر قانداستارىمىزدىڭ ەلدى تاستاپ، باس ساۋعالاعان جاققا قاراي بەت الىپ كەتۋىنە دەيىن الىپ باردى. كەيبىرەۋلەر ولاردى «ورالمان» دەپ ب...
-
ەرتەدە ءبىر حانشايىم ءومىر ءسۇرىپتى. ول حانشايىمنىڭ شەشەسىن مىستان مانگىگە ۇيقتاتىپ تاستاپتى. ال حانشايىمدى ءوزى پاتشايىمنان ۇرلاپ كەتىپتى. مىستان كەمپىر حانشايىمدى قاتتى جاقسى كورىپ وسىرەدى. پات...
