InfoHub Logo

(ماقاتايەۆتىڭ تۋعانىنا 50 جىل تولۋى كەشىندەگى ءسوز)

ءومىر بويى جارىق اتاۋلىنى كورىپ-سەزۋدەن ماقۇرىم قالىپ، تىمىرسىق تىنىشتىقتىڭ قاپاس تۇنەگىندە جاۋىن مەن داۋىل كورمەي كۇن كەشۋدەن تۇنشىققان ورتاعا سىزاتتان سىعالاعان ساۋلە نۇرى دا ءوز بولمىسىنىڭ جاتتىعىمەن جان تۇرشىكتىرەر، جانتالاستىرار اسەر اكەلەرى ءسوزسىز. سەبەبى ول ورتانىڭ بىقسىقپەن تىنىستاعان توپىراعىنا تىرشىلىكتىڭ قانداي دا بولسىن تابيعي قۇبىلىسى اتىمەن جات. ال جات قۇبىلىستى بىردەن قانعا ءسىڭىرۋ — بيولوگيالىق زاڭدىلىقتان تىس نارسە. زاڭدىلىقتان تىس قۇبىلىس اتاۋلىنىڭ ءبارى ءوز تابيعاتىمەن توپان سۋى تاسىعانداي الاپات ەكپىن اكەلەدى. ول ەكپىنگە توتەپ بەرۋ قيىن، ويتكەنى تابيعات دۇلەيىنىڭ ءبارى — الاپات قۇبىلىس.

جاراتىلىستىڭ مۇنداي قۇبىلىستارىنىڭ كەرەمەتتىگى عۇمىرىنىڭ ۇزاقتىعىندا ەمەس — قاس-قاعىم ءساتىنىڭ دۇنيەنى ءدۇر سىلكىندىرەر مانىندە. نايزاعايدىڭ جارقىلى، جاسىن وتى كوزدىڭ نۇرىن العانمەن، ونىڭ عاجايىپ قۇدىرەتىن كوكەيگە ءتۇيىپ، ءدال وزىندەي سۋرەتتەپ جەتكىزە قويۋ قان-داي قيىن بولسا، قاپىرىق اۋانى جۇتىپ ۇيرەنگەن كەۋدەنى كەز كەلگەن توسىن قۇبىلىس تا سولاي دەرەۋ تۇنشىقتىرىپ، قۇپياسىنا بويلاتپاستان وتە شىعادى.

ءبىزدىڭ ۇلى زامانىمىزدا سوۆەت ازاماتىنىڭ كوسموسقا ۇشۋى دا وسىنداي قۇبىلىس بولعانى ادامزاتتىڭ جادىندا ساقتالادى.

اقىن مۇقاعالي ماقاتايەۆ تاعدىردىڭ ءوز ەنشىسىنە بۇيىرتقان از عانا جىلدارىندا پوەزياعا وسىنداي قۇبىلىس بولىپ كەلدى دە، ءبىز سول الاپاتتىڭ ەكپىنىنەن تۇنشىعىپ، دەم، تىنىس الىپ ۇلگەرگەنىمىزشە، ءوزىن دە، ءوز ورتاسىن دا بولاشاقپەن جالعايتىن جىر كوپىرىن سالىپ كەتتى.

ءبىزدىڭ اسا اياۋلى ءابدىلدا اعانىڭ «بيىل مۇقاعالي پوەزياسىنىڭ جىلى بولۋى كەرەك» دەگەن پىكىرى كوڭىلگە قاتتى قونادى.

سالتاناتتى سارايلاردا ءوزىنىڭ جىر كەشتەرىن وتكىزەم دەپ جۇگىرمەسە دە، ورتالىقتان كىتاپ شىعارام دەپ اتىشۋلى اۋدارماشى ىزدەمەسە دە، مۇقاعالي بايلىعىنىڭ ادامزاتتىڭ رۋحاني قازىناسىنا قوسىلاتىنىندا كۇمان جوق. ويتكەنى ارداقتىسىن ايالاي بىلەتىن حالقى بار، وتانى بار. ال مۇقاعالي پوەزياسىن ماقتانىش سەزىممەن الەمگە سىيعا ۇسىنا ءبىلۋ، ءوز تۇلعاسىنىڭ دەڭگەيىندە كورسەتە ءبىلۋ — تىرىلەردىڭ قاسيەتتى پارىزى.

---