InfoHub Logo

“جۇلدىز” جۋرنالىنىڭ 2021 جىلعى قاڭتار ايىنداعى 1 نومىرىندە رامازان تىلەۋحاننىڭ “جاقسىدان-شاراپات” دەگەن اڭگىمەسىن وقىدىم. وندا ناعاشى اتاسى كادىركەي ءسادۋاقاس ۇلى مەن ساكەن سەيفۋلليننىڭ اڭگىمەسى جاريالانعان. كادىركەي ءسادۋاقاسۇلىنا ارىز جازىلعانداعى ول كىسىنىڭ كومەك سۇراپ، اقىل سۇراپ ساكەن سەيفۋللينگە بارعاندىعى، ساكەن سەيفۋلليننىڭ ونى قۇشاق جايىپ قارسى الىپ، قالانى ارالاتىپ، داستارحانىن جايعاندىعى، كەلىپ وتىرعان شارۋاسىن تەز ارادا شەشىپ بەرگەندىگىن ايتادى. سوڭىندا “ساكەندەي سۇڭقاردىڭ شاراپاتىن كورىپ، ءبىر پالەدەن امان قالىپ ەم. الايدا ارادا از جىل وتكەن سوڭ، قايران ازاماتتى جازىقسىدان-جازىقسىز اتىپ تاستادى عوي. شىركىن-اي، ساكەندەي ەرلەر امان بولىپ، ەلىنە قىزمەت ەتكەندە الدەقانداي زامان بولار ما ەدى؟!. وكىنىشى مەن ءۇمىتى قاتار جۇرگەن ءومىر وسىلاي وتەدى دە كەتەدى ەكەن عوي...”  دەپ اياقتالادى. مەنىڭ بۇل سوزدەردەن تۇيگەنىم جاقسى ادامنىڭ جاقسىلىعى ادام ەسىندە ماڭگى قالادى ەكەن. جاقسى ادامنىڭ ادامگەرشىلىگى مەن ۇلگى بولار ىستەرى كوپكە ۇلگى. 

“جۇلدىز” جۋرنالىنىڭ 2021 جىلعى 1 نومىرىندەگى تاعى ءبىر سانىندا الىبەك اسقاردىڭ “قاراتاي مەن اننا-ليزا” دەرەكتى اڭگىمەسى ايتىلادى. بۇل اڭگىمە كىمنىڭ دە بولسىن جۇرەگىنە جەتىپ، ەرەكشە ءبىر كۇي كەشەرى انىق. قانداي انا بولۋ كەرەك، قانداي ەر ازامات بولۋ كەرەك وسى ءبىر اڭگىمەدە جازىلعان دا سەكىلدى. اڭگىمەنىڭ باسى باقتىگۇل ەسىمدى انامىزدىڭ ەر مىنەزىمەن، قايسارلىعىمەن ەكى بىردەي بالاسىن ءوسىرىپ جەتكىزەدى. سونىڭ ءبىر بالاسى ەل ىشىندە اتى اڭىزعا اينالعان قايراتكەر-قاراتاي كوشكىنوۆ بولعان. قاراتايدىڭ جارى بولعان اننا-ليزا ليۋككوننەن ۇلتى جاعىنان فين قىزى بولعان. اننا-ليزانىڭ جارى جەر اۋدارىلىپ وڭتۇستىككە كەلگەندە ارتىنان وسى جاقا ىزدەپ كەلگەن ەكەن، وكىنىشكە وراي ول ءوزىنىڭ جارىنان ايىرىلادى.  ءوز ەلىندە ءجۇرىپ اننا-ليزا قىزىمەن بىرگە قيىنشىلىق كورىپ، ماقتاارالعا  كەلەدى. ءمۇعالىم بولىپ ءجۇرىپ وسى ءبىر قاراتايمەن تانىسادى. ەكەۋى قوسىلىپ ءۇي بولىپ، ءوز ەڭبەكتەرىمەن سىيلى بولادى. ءوز جۇمىستارىنا ادال بولىپ، ەل ءۇشىن قىزمەت قىلعان قاراتاي مەن اننا-ليزا بىر-بىرىنە ادال جار، ومىرلەرىنىڭ سوڭىنا دەيىن بىرگە وتكىزەدى. اننا-ليزا اۋىل-ايماقتىڭ  ابىز اناسىنا اينالادى، قاراتاي كوشكىنوۆتا قۇرمەتكە لايىق، ۇلاعات ەتەر تۇلعا بولعان. بۇل ەكەۋىنەن كىرشىكسىز ماحابباتى، قول ۇستاسىپ بىرگە جەتكەن قيىنشىلىعى مەن باقىتى كوپكە ۇلگى دەپ ويلايمىن. باقتىگۇل انا مەن اننا-ليزانىڭ بويىنداعى قاسيەتتەر قىز-كەلىنشەكتەرگە ۇلگى بولارى انىق. ونەگەلى ءومىر مەن جاستارعا، ياعني بىزگە بۇل اڭگىمەدەن الارىمىز كوپ. 

2021 جىلعى ناۋرىز ايىنداعى 3 سانىندا راحىم بالابييەۆتىڭ “اقساق قىز تاعدىرى” دەگەن ولەڭ جولدارى بەرىلگەن. مۇندا گۇلسىم اتتى ءبىر اياعى جوق قىزدىڭ اعاسىمەن، سۇيگەنىمە سويلەسكەن مۇڭزارى مەن ولەڭدەرى بەرىلگەن. قىزدىڭ تاعدىرى ويلاماعان جەردە، كۇل تالقانى شىعىپ، ارماندارى تاس تالقان بولعاندىعى، وتە ايانىشتى. اعاسىنا ايتقان مۇڭى، ءوزىنىڭ ومىرىنە دەگەن نازى ادامنىڭ كوڭىلىنە ەرىكسىز جاس كەلتىرەدى. اعاسى مەن سۇيگەنىنىڭ قولداۋى وعان كۇش قايرات بەرەدى. سۇيگەنىنىڭ وسىنداي جاعدايعا قاراماستان ونى قابىلداپ، شەكسىز سۇيگەندىگى مەنىڭ ويىمشا ەرلىك. قازىردە مۇنداي ەرلىك كىمنىڭ دە بولسىن قولىنان كەلمەيتىنى انىق. پاك سەزىم مەن قوس عاشىقتىڭ وسى ءبىر ماحابباتى، اعاسى مەن قارىنداسىنىڭ بىر-بىرىنە دەگەن قولداۋى مەن جىلى سەزىمدەرىنىڭ ءوزى ادامعا جىلۋلىق سىيلايدى. 

زينادۋللا قىزى نۇراي

---