InfoHub Logo

سوعىس. ادام دۇنيەگە كورسەم، بىلسەم دەگەن ينستينكتىمەن تۋىلادى. سول ينستينكت ونى ءماجبۇرلى تۇردە سوعىسقا اتتاندىرادى. ول - اقپاراتتىق سوعىس. اقپاراتتىق سوعىس قارۋسىز مايدان، ءبىراق ءقاۋپى قارۋلى سوعىستان دا زۇلمات. 

وت اراسىندا وتقا جانىپ، وق اراسىندا وققا ۇشىپ، تاياقتى جەيتىن دە جەگىزەتىن، قارۋسىز مايدانعا ەركىمەن اتتانىپ، كەي جاعدايدا قارۋدان وپات بولاتىن جۋرناليست ماماندىعىنا تۇسكەن ومار دەگەن مەن بولامىن. بۇگىنگى ساۋال مەنىڭ بولاشاق قىزمەتىمنىڭ قانشالىقتى ەركىن ەكەندىگىنىڭ اراجىگىن اشىپ بەرۋ.

ەڭ اۋەلى جۋرناليستەر مايدانگەرلەر. ول نە سوعىس - اقپارات سوعىسى، قايدان شىققان سوعىس - ەستىمەگەن قۇلاق پەن كورمەگەن كوزدەن شىققان، كىم ءۇشىن سوعىس - الەمدە اقپاراتتى قارا قۇردىمداي جۇتىپ جاتقان قارا حالىقتىڭ ساناسى ءۇشىن سوعىس. جۋرناليستەر ەشقانداي ادامزاتپەن ايقاسپايدى، اقپاراتتىڭ وزىمەن الىسادى. وسىلاي، بۇل ماماندىقتىڭ ءبىرسىپىرا قۇدىرەتىن تانىتامىز. 

ساۋال: ءجۋرناليستىڭ قىزمەتى قانشالىقتى ەركىن؟ جۋرناليستكە كەرەگى ءسوز بوستاندىعى دەپ جاتامىز، مەنىڭ ويىمشا جۋرناليستكە كەرەگى سول بوستاندىقتى ءوزى جاسايتىن قاسقىر مىنەز كەرەك. شىنىمەنەن، قوعامدا كوز الدىنداعى زاتتى جوققا شىعارارلىق جاعدايلار ءجيى كەزدەسەدى. سوندا اي قاراپ ءجۇرۋ بۇل ماماندىقتىڭ ابىرويىن تاپتاۋ دەپ بىلەمىن. ءسوز بوستاندىعى بىزدە شەكتەلگەن. ول راس. ءبىراق ونى كىم شەكتەدى؟ شەندى-شەكپەندى قۇزىرلار ما؟ جوق. ونى شەكتەيتىن مىنا حالىق. حالىقتا اسقان مىنەز جوق. ەر دەيتىن ەل بولماسا، ەل دەيتىن ەر قايدان شىقسىن؟ جاس باۋىردان جالاڭداتىپ، ساناسىنا قورقىنىشپەن تاربيەلەيدى. سودان بولار، كەي جۋرناليستەر ءوز ويىن ايتاردا ىركىلىپ جاتادى. ەندى ەكىنشى ماسەلەسى: شىندىقتى كوتەرە المايتىن شىعايباي تەكتەس شەندىلەر. كەرەمەت ءسوز بار: ادامدى تانىعىڭ كەلسە بيلىكتىڭ تامشىسىن بەر، ءشولى قانعان كەزدە نە سايرارىن كورەسىڭ. توبەدە تورە بولعان كوكەلەر، بيلىككە بارعان ۋاقىتىندا حالىق ءۇشىن جۇمىس جاسايتىنىن ۇمىتىپ قالاتىن سەكىلدى. حالىققا اتىم شىقسا، مەنى جارىقتىق دەپ جالبىراسا، اكەم دەپ ماقتاسا دەگەندەرى دە بولادى. سونداي قۇمالاقتار ساقتاعان سارى مايدى شىرىتۋگە اينالدى. ولارعا كەرەگى حالىققا جاقىن جاندار. ولار جۋرناليستتەر. امالى تاۋسىلعاندارى ونسىزدا وپىق جەيتىن جۋرناليستكە وپالاڭ جاسايدى.

تاۋەلسىزدىگىمىزگە 30 جىل. بىلمەدىم، ءبىراق تاۋەلسىزدىكتى جاڭا قازاقستاندا عانا ەندى ەندى قالىپتاستىرعاندايمىز. وعان دەيىن، سوزشەڭدەر قايدا بولدى، نەمەن اينالىستى تۇككە تۇسىنىكسىز، ءبىراق ونى قويا بەر: ولار شىندىق ايتادى. دەپۋتاتتار حالىقتىڭ مۇڭىن ايتاتىن قىزمەتتە ەكەن. ەل اڭ-تاڭ. كەي ادامدار كوزدەرى ۇيرەنىسە الماي ەسكى قازاقستاندا قالماق ويلارى دا بار. ولاردى دا ءتۇسىنۋ قاجەت، سەبەبى بۇندايعا ەتتەرى ۇيرەنبەگەن.

جۋرناليستەر ەركىن دەپ 100% ايتا الامىن. وتاندىق جۋرناليستەر ەڭ ەركىن قىزمەتتە. سەبەبى ەركىندىكتى دە ولشەپ قويعان ەلدە تۇرامىز. ەركىندىك دەگەن بار شىندىقتى شىمىركپەستەن ايتۋ ەمەس. بىزدە جاعدايلاردىڭ بارلىعى جاسالعان. كونستيتۋسيا بار. ونىڭ قۇدىرەتى تەڭدەسسىز. ءتىپتى جۋرناليستەردىڭ قۇقىعىن قورعاي وتىرىپ، جۋرناليستەردىڭ اياعىن جەرگە تيگىزبەي، الدەبىر كۇشتىڭ ءزابىرى تيمەسىن دەپ زاڭ بويىنشا ءجۋرناليستى قاماۋعا الادى. وسىنداي قۇدىرەتتى زاڭ بىزدە بار.

اسقار ۇلى ومار

---