InfoHub Logo

بۇرىن بىرەۋدىڭ كارىبوز دەگەن جۇيرىگى بولىپتى. كارىبوز قۇنانىنان باستاپ قارتايعانعا دەيىن رۋلى ەلدىڭ ىشىندە بولعان ءىرىلى-ۋاقتى بارلىق تويدا الدىنا ات سالماعان جۇيرىك اتالادى. كارىبوزدى كورىپ تالاي توي يەسى بايگەسىن شاپپاي بەرىپتى. كارىبوز قارتايىپ، الجىعان شاعىندا سالتورىنىڭ اتاعى جايىلادى. سالتورى كومبەدەن ات شىققان جەردە-اق، سۋىرىلىپ الدىنا شىعىپ، سول كۇي شاڭىن كورسەتپەستەن كوش بويى بۇرىن كەلەدى ەكەن. كارىبوز قىرىق جاسقا كەلىپ، جۇرىسىنەن جاڭىلىپ، قىرقىلجىڭ تارتقاندا ءبىر ۇلكەن توي بولىپ، بايگەگە سالتورى قوسىلادى. ساعىمداي سىلاڭداپ، شۇلعىپ باسىپ، اۋىزدىقپەن الىسىپ كەتىپ بارا جاتقان بايگە اتتارىن كورگەن كارىبوز ورىستەنۋ شاپقان كۇيى يەسىنىڭ ۇيىنە كەلەدى دە، جابىققا باسىن سالىپ، تىقىرشىپ تۇرىپ الادى. «قاسيەتتى جانۋارىم الجىعان ەكەن»، دەپ ويلاعان يەسى كارىبوزدىڭ تىقىرشىعىنا توزە الماي: «تاعى ءبىر شاۋىپ كەلگىسى كەلىپ تۇر ما؟» دەيدى دە جۇگەندەپ، ءبىر بالاسىن مىنگىزىپ، بايگەگە كەتكەن قالىڭ اتتىڭ سوڭىنان قويا بەرەدى. ۇيدەن شىعا قۇيعىت جونەلگەن كارىبوز ىلەزىمدە-اق بايگە اتتاردى قۋىپ جەتىپ، قاتارعا قوسىلادى. اتتار مەجەلى جەرگە بارعاننان كەيىن
قايتارىلادى. سالتورى داعدىلى ادەتىمەن ءا دەگەننەن-اق وق بويى اتىلىپ شىعىپ، كوپكە دەيىن الدىنا ات سالمايدى. وسى ساتتە:

— مەن بەكەرگە جارىسپان،
مەن قالعام جوق جارىستان.
الىسپان دا، سالىسپان،
سالتورىدان قالىسپان، —

دەپ كارىبوز دا توپ ورتادا كەلە جاتىپتى. قىزا شىققان كارىبوزدىڭ قادامى قارىشتاي تۇسەدى. ءسويتىپ، كومبەلى جەرگە كارىبوز سالتورىدان بۇرىن كەلەدى دە، كەلە ساپ پىشاققا ىلىنەدى. تويعا جينالعاندار «قاسيەتتى جىلقى ەدى»، — دەپ كارىبوزدىڭ ەتىن ءبىر-بىر جاپىراقتان ءبولىپ الادى.

---