InfoHub Logo

باياعى زاماندا تەڭىز جاعاسىنداعى ەلدى-مەكەندەردىڭ بىرىندە مىناداي وقيعا ورىن العان ەكەن. ادەتتەگىدەي كۇن شىعاردا ايەل، بالا-شاعالار ىزگى تىلەكتەرىن ايتىپ ەركەكتەردى تەڭىزگە شىعارىپ سالادى. جەلكەندەرى اشىلعان كەمەلەر جاعادان ۇزاپ، ءبىرازدان سوڭ كوزدەن عايىپ بولىپ، كوكجيەكتەن كورىنبەي كەتەدى. جاعالاۋداعى ەل بولعاندىقتان بالىق اۋلاۋ – بۇلاردىڭ نەگىزگى تىرشىلىك كوزى بولاتىن. بالىقشىلاردىڭ سول كۇنگى بالىق ءتۇسىمى بەرەكەلى بولادى. ءبىراق كەشكە تاياۋ قايتار كەزدە اسپان تۇنەرىپ قاتتى داۋىل باستالادى. داۋىلدىڭ جويقىندىعى سونشالىق كوز اشتىرمايتىنداي دارەجەدە ەدى. ايەل، بالا-شاعا جاعاعا جۇگىرىسىپ، جاراتقانعا دۇعا ەتىپ جالبارىنا باستايدى. ءبارىنىڭ كوزدەرى جاسقا تولىپ، كوڭىلدەرى جابىرقاۋلى. سول ساتتە اۋىلدىڭ ەڭ بيىك جەرىندە ورنالاسقان ءبىر ۇيدەن ءورت شىعادى. ايەلدەر مەن بالالار ءورتتى ءسوندىرۋ ءۇشىن قىرعا قاراي جونەلەدى. سوندىرمەك بولىپ قانشا تالپىنعاندارىمەن ەشتەڭە شىقپايدى. جەلدىڭ اسەرىمەن ءورت ودان سايىن الاۋلاپ كۇشەيە تۇسەدى. ءار ءۇيدىڭ اسقار تاۋ اكە، اعا بۋىندارى كەلەتىن ۋاقىتىنان تىم ۇزاق كەشىككەندىگى بارىنە ۇلكەن ۋايىم ەدى. ونىڭ ۇستىنە مىنا ءورتتىڭ شىعۋى قايعى ۇستىنە قايعى قوسقان ەدى. ءتۇننىڭ ەداۋىر بولىگى ءوتىپ، لاۋلاعان وتپەن ءالى دە ارپالىسىپ جاتقاندا جاعاداعى بالالاردىڭ «كەلە جاتىر! كەلە جاتىر!» دەگەن ايقايى ەستىلەدى. ءبارى جاعاعا جۇگىرەدى. كەمەلەردى كورۋمەن كوزدەرىنە قۋانىشتىڭ جاسى كەلىپ، كوڭىلدەرى جايلانا باستاعانداي. كەمەلەر جاعاعا جەتىپ، بالىقشىلار كەمەدەن تۇسە سالا ءبارى جاقىندارىمەن قۇشاقتاسا قاۋىشادى. تەك ءۇيى جانعان ايەل كۇيەۋىنە مۇڭايا قاراپ، قىر جاقتى مەڭزەپ: «قۇرىدىق، ءۇيىمىز، ىشىندەگى بۇكىل جيعان-تەرگەندەرىمىز ءبارى جانىپ كوككە ۇشتى» -دەيدى. كۇيەۋى بولسا كۇلىمدەپ: «ءۇيىمىزدىڭ جانعانى قانداي جاقسى بولعان. داۋىلدىڭ كەسىرىنەن باعىتىمىزدان اداسىپ، ابدەن ابىگەرگە تۇستىك. جانعان ءۇيىمىزدىڭ جارىعىنىڭ ارقاسىندا بۇكىل كەمەلەر جولىن تاۋىپ، جاعاعا امان-ەسەن ورالدىق! تەڭىزدە تاعى ءبىراز كىدىرگەندە سۋعا كەتەر ەدىك» دەيدى.

---