كەڭسىرىك قالاي كورىندى
بۇلكىباي مايداننان ءبىر قولىنان ايرىلىپ قايتتى. ونىڭ شىنتاعىنان جوق قولىنا پروتەز جاسالدى. ال ەكىنشى قولىنىڭ دا ەكى ساۋساعى وققا ۇشقان ەدى. قولىنان ايىرىلىپ قايتقان ەرى ساليحاعا بۇرىنعىداي سۇيكىمدى كورىنبەدى. بۇلكىبايدىڭ قولىنىڭ سىقىرىن ەستىگەندە ساليحانىڭ شەكەسىنە بىرەۋ ءبىزدى سۇعىپ، قايتا سۋىرىپ الىپ، دامىلسىز وسىنى قايتالاپ تۇرعانداي كورىنەتىن بولدى. ونىڭ ۇستىنە ون شاقتى كۇننەن بەرى تۇرماي، توسەك تارتىپ جاتىپ العانى دا ەتىپ كەتتى.
ەركەگى جوقتا جول الىپ، جامان ۇيرەنگەن ساليحا بۇلكىباي توسەك تارتىپ جاتقالى بەرى شولاق كۇيەۋدى مەنسىنۋدى قويدى. ءتىپتى ول كەي كۇندەرى جارىم تۇندە قايتىپ ءجۇردى. قاسىپ-قاسىپ اقىرىنداپ ايتقان بۇلكىبايدىڭ coسىن ول قۇلاعىنا ىلمەدى. ءبىر كۇپى ءتىپتى ەرى قانشا جالىنعانمەن ساليحا ءبۋىنىپ-تۇيىنىپ ءبىرجولا كەتپەك بولدى. كيىمىن تەگىس قاتتاپ، قول ساندىعىنا سالىپ، ەسىككە قاراي ەندى بەتتەي بەرگەندە، كۇيەۋى ساليحاعا تۇرا تۇرشى دەگەندەي يشارا ءبىلدىردى.
ايەل جالت بۇرىلىپ بۇلكىبايدىڭ بەتىنە تۋرا قارادى. ساليحانىڭ جارق ەتكەن نۇرلى ءجۇزى قىزارىڭقىراپ، قانى سىرتىنا تەۋىپ، دولىلىقتان قىزارسا دا ادەيىلەپ بوياپ قويعانداي كورىندى. ونىڭ ءجۇزىنىن. سۇلۋلىعى سونشا — بەتىنەن اشۋ ءىزى بىلىنبەي، قايتا سىرتقا تەپكەن قان ونى سۇلۋلاندىرا ءتۇسىپتى. ونىڭ ادەمى قىر مۇرىنى، كەسكىندى كەيپىنە ايرىقشا كورىك بەرىپ تۇرعانداي. ەكى تاناۋىنان كۇن كورىنەدى دەگەن سۇلۋ دا وسى ساليحا شىعار. قانداي كوركەم كەلىنشەك! قاراقات كوز، جايناعان ءجۇز، توتىشا قۇبىلىپ تۇر. ەندى وسىنداي كەلىستى بەتتى بىرەۋ ايمالاپ، شيقانداي ەرىندى، ويماقتاي اۋىزدى بىرەۋ سۇيەدى-اۋ!
مۇگەدەكتىڭ ءىشى قازانداي قاينادى. ءتىپتى ۋ ءىشىپ ولە كەتكىسى دە كەلدى. ونىڭ ءىشىن قىزعانىش وتى جەگىدەي جەپ، الەپ-جالاپ جىبەردى. نە ىستەۋ كەرەك؟ اسىل ەركە الىس ساپارعا اتتانىپ بارادى، وسىنداي اي دەسە اۋزى، كۇن دەسە كوزى بار پەريزاتتى قانداي عانا كوزدەر قيادى.
— ءبىر ءسات تۋرا تۇرشى،— دەدى ول ايەلىنە،— شىن كەتەمىسىڭ؟ مەن ءوز باسىم سەنى قيمايمىن. مىناۋ تاتۋ كۇندەردىڭ ايعاعى — ەكى بالانى كىمگە ءتىرى جەتىم ەتىپ قويامىز. ويلانساڭ ەتتى.
ايەل قاتتى كەتتى.
— جوق مەن جارىم اداممەن تۋرا المايمىن، مەن پەرىشتەنىڭ بالاسىنداي كوركىممەن قاسقىردىڭ اسىعىنداي ءمۇجيىپ تۇرعان سەنى قايتەم. بالا بولسا، قالادى دا اكەسىن ساعالاپ.
كۇيەۋىنىڭ قىزعانىش وتى ءىشىن جالاپ بارادى. ولە كەتۋ وڭاي ەمەس، ءوز جانىن قيا المايدى. ايەلىنىڭ ابدەن بۇزىلىپ العانىنا، كەتەتىنىنە بۇلكىبايدىڭ كوزى جەتىپ كۇيىپ كەتتى.
— انىق كەتەر بولساڭ— دەدى ەرى،— ون جىل بىرگە تۇردىق قوي، ەڭ بولماسا بەتىڭنەن ءبىر سۇيگىزە كەتشى!
ايەل بۇرىلىپ كۇيەۋىنىڭ جانىنا كەلدى.
— ەڭكەيسەڭشى بەرى تامان، ءبىر قۇشىپ سۇيەيىن.
مۇگەدەك جالعىز قولىمەن ايەلىن قاپسىرا قاتتى قۇشاقتادى. ايەل دە ەڭكەيىپ، وتىرعان كۇيەۋىنە بەتىن توسا بەردى. وسى كەزدە بۇلكىباي سۇيە بەرەمىن دەپ ادەمى قىر مۇرىننىڭ ۇشىن قىرشىپ، جۇلىپ الدى. كەلىستى بەتتىڭ ءسانىن كەلتىرىپ تۇرعان مۇرىن ەكەن، كەڭىرەيىپ كەڭسىرىگى كورىنىپ قالدى. كوكيگەن تاناۋ بۇدان كەيىن قانشا كوتەرىلمەك بولسا دا، ءتۇبىن سۋ ورىپ كەتكەن ەسكى دۋالداي مۇجيىپ، جىرىمدانىپ قالا بەردى. »
You Might Also Like
-
ۇلتانبايەۆتىڭ قىزىل ءيتى قىڭارت كەتكەنى ناق وسى جولى — الماتىدان سەلينوگرادقا قازاقستان قازيى جاكەننىڭ كەلگەن كەزى بولدى. ءتىپتى وسى جولى دا ول بوي بەرمەس پە ەدى، قايتەر ەدى، الگى سەلينوگراد مەش...
-
وبلاتكوم پرەدسەداتەلى ورىنبەتوۆ كەش الدىندا اۋدان ورتالىعىنداعى مەيمانحاناعا كەلىپ توقتادى. بۇل اۋدان ورتالىعى ۇلكەن پوەزد جولىنىڭ تورابى جاندىاعاش دەگەن ستانسيا ەدى. سوندىقتان مۇندا ۇنەمى ءبىر پوەز...
