باستىقتىڭ اشۋى
«قاراساز» كولحوزىنىڭ پرەدسەداتەلى جورتاقباي كەڭسەگە قاتتى اشۋلانىپ كىردى. قاباعى تۇكسيىپ، ءوڭى تۇتىگىپ، قاراۋىتىپ كەتىپتى. ءتىپتى قاتتى اشۋلانعاندىقتان ەسىك الدىندا تۇرعان ءبىرسىپىرا كولحوزشىلارمەن امانداسپاي، ءوز كابينەتىنە دە بارماي بىردەن بۋحگالتەرلەر بولمەسىنە بەتتەدى.
اشۋشاڭ باستىقتى ءبارىمىز دە سوگەمىز. ءبىراق بۇگىن اشۋلاندىڭ دەپ جورتاقبايدى سوگۋگە بولمايتىن ەدى. اشۋلانباعاندا ءقايتسىن، ەگىن سۋدان قالىپ بارادى، وتىرعىزىلىپ بولماعان تەمەكى اناۋ. كوك بريگاداسىنىڭ جۇمىسى مۇلدەم باستاۋسىز جاتىر. اۋدان اقپاردى بۇرىن بەس كۇندە ءبىر سۇراۋشى ەدى، كولحوزدا تەلەفون ورناعالى بەرى قۇلاققا تىنىشتىق جوق، اۋاتكومدەگى انە ءبىر بادىراق كوز قارا قىز تاقىلداپ تىنىشىڭدى الادى.
ءتىپتى كۇندەگىسىن بىلاي قويعاندا بالالار ياسليىندە ىستەيتىن بەس ايەلدىڭ بەسەۋى دە جۇمىسقا شىقپاي قالىپتى. ءياسليدىڭ ەسىگى اشىلماعاندىقتان بەس بريگاداداعى جيىرما شاقتى بالالى ايەل ۇيىندە بالاسىنان شىعا الماي شىرمالىپ قالىپتى. ياسليدە ىستەيتىندەردىڭ بىردى-ەكىلىسى بولماسا كوبى بەلسەندىلەردىڭ ايەلدەرى ەدى. جەڭىلدەۋ جۇمىس، ماڭداي كۇنگە تيمەسىن، شىجىعان ىستىقتا ءبىر-بىر ۋاقىت كولەڭكەدە وتىرعاننىڭ ءوزى دە ءبىر عانيبەت قوي دەسكەن. ەندى مىنە، بۇلاردىڭ كەسىرى بريگاداعا ءتيىپ باقانداي جيىرما ادام جۇمىسقا شىقپاعان.
جورتاقباي دالادان قاتتى كەلگەن كۇيى باس بۋحگالتەرشە جەكي تۇيىلە سويلەدى:
— سەنىڭ ايەلىن نەگە جۇمىسقا، ياسليگە بارماي قالدى؟
بۋحگالتەر ساسقان جوق، جاي ادەمى سىبىزعى داۋىسپەن جىمىسقىپ قانا:
— بۇگىن ءسىزدىڭ ۇيدەگى جاۋھار جەڭگەيگە بولىساتىن ەدى،— دەپ لىپىڭ ەتە ءتۇستى. پرەدسەداتەل نە ايتارىن بىلمەي بار اشۋىنان ايرىلىپ، سىلقيدى دا قالدى. ال بۋحگالتەر ءتىسىن كورسەتىپ ىرجيىپ كۇلگەن بولدى.
You Might Also Like
-
باستىق بولسا بايسالدى بولعانى-اق جاقسى، شىركىن! ايتقانىڭدى ءتۇسىنىپ، قىيسىعىڭدى تۇزەتىپ وتىرسا وعان نە جەتسىن! دۇنيەدە وكىرەك باستىققا ءتۇس بولماعايسىڭ. ويىڭداعىڭدى ايتساڭ ورە تۇرەگەلىپ، وزىنەن باسقا...
-
الماتىدان كەلگەن وكىل ن. وبلىسىنىڭ ءبىر تۇكپىرىندەگى «اۆانگارد» كولحوزىنىڭ ماگازينىنىڭ الدىنا كەلگەندە باسىندا قاراكولدەن تىگىلگەن كاۆكازدىق بوركى بار، ۇڭىرەيگەن ۇزىن بويلى، وراق مۇرىن ب...
