InfoHub Logo

بويدان قۋات قايتىپ، ابدەن شارشاعان ساتتە تابيعاتتىڭ وزىنەن اعزامىزعا پايدا كەلتىرىپ، بويىمىزعا كۇش-قۋات تولتىرا الامىز. داستارحانىڭىزداعى تاعامدارىڭىزعا تابيعي قۋاتتاندىرعىشتاردى قوساتىن كەز كەلدى.

ەنەرگەتيكالىق سۋسىندار، كوفە جانە باسقا دا اعزامىزدى سەرگىتەتىن سۋسىنداردىڭ اسەرى جىلدام بولادى دا، كەرىسىنشە ءبىزدى قۋاتىمىزدان تولىقتاي ايىرادى. وندا قاجۋ مەن شارشاۋدان ازاپتانباس ءۇشىن نە ىستەۋ كەرەك؟ جاماندىقتىڭ ءتۇپ-تامىرى ادەتتەگىدەي دۇرىس تاماقتانباۋدا. بويىمىزداعى كۇش-قۋات تۇگەسىلگەندە تەك قانا تابيعات انامىزدىڭ وزىنەن اعزامىزعا پايدا كەلتىرەتىن كۇش-قۋات الا الامىز. ەندەشە، ءوز راسيونىمىزعا جاڭاشا ءنار بەرەيىك – ياعني، بىزگە كۇش-قۋات دارىتاتىن، جاقسى كوڭىل كۇي سىيلايتىن تابيعي ونىمدەردى تۇتىنايىق.

ەلەۋتەرەكوكك

ەلەۋتەرەكوكە وسىمدىگىنىڭ تابيعي سەرگىتكىش ءشاربات، كاپسۋلا جانە تابلەتكالارى كەز كەلگەن ءدارىحانادا قول جەتىمدى باعادا ساتىلادى. تاڭەرتەڭ ىشسەڭىز اعزاڭىزدى كوفەدەي سەرگىتىپ جىبەرەدى. وعان قوسا ونى كۇيزەلىستە، جۇيكە توزعاندا ءىشۋدى ۇسىنامىز. بۇل ءشوپ اعزانى قورشاعان ورتا اگرەسسياسىنا قارسى تۇرۋعا، سونىمەن قاتار شىدامدى بولۋعا ءوز سەپتىگىن تيگىزەدى.

كوك شاي 

كادىمگى كوك شاي – اعزانىڭ بەلسەندىلىگى مەن تونۋسىن ارتتىرۋدا تاپتىرماس قۇرال. تاڭەرتەڭ بۇل سۋسىننان ءبىر كەسە ىشسەڭىز دارۋمەندەر مەن ميكروەلەمەنتتەرگە بايىپ قالاسىز. سونىمەن قاتار بويىڭىزداعى زات الماسۋ پروسەسسىن بەلسەندى جۇرگىزەدى دە كۇنى بويى سەرگەك جۇرەتىن بولاسىز. ەگەر دە ءسىز بارىنشا كوپ اسەر العىڭىز كەلسە، شايدى ەرەجەگە ساي دەمدەڭىز.

سەرمەنە (ليموننيك)

سەرمەنە داندەرىنىڭ تۇنباسى ءدارىحانالاردا ساتىلادى. ونى جۇمىسقا قابىلەتسىزدىكتە، شارشاعاندا جانە جۇيكە جۇقارعاندا قابىلدايدى. سەرمەنە جاپىراقتارىنان دايىندالعان شايدى ءىشىپ تە ءدال سونداي اسەر الا الاسىز. ول ءۇشىن قايناعان سۋدى ۇگىتىلگەن جاپىراققا قۇيساڭىز جەتكىلىكتى. مۇنداي سۋسىننىڭ ناتيجەسى ايتارلىقتاي ۇزاق اسەر ەتەدى، ياعني زەيىنىڭىزدى، جالپى تونۋسىڭىزدى جانە جۇمىسقا قابىلەتتىلىگىڭىزدى ارتتىرادى.

ءزىمبىر (يمبير)

ءزىمبىر – قان اينالىمدى جانە اعزاداعى زات الماسۋدى جاقسارتاتىن وسىمدىك. ونىڭ ارقاسىندا ميىمىز جاقسىراق جۇمىس ىستەيدى دە، بويىمىزداعى كۇش قۋاتتىڭ ارتقانىن سەزەمىز. زىمبىردەن دايىندالعان شايلاردىڭ ەڭ جاقسىسى ول – ليمون مەن بال قوسىلعان ءتۇرى. سونىمەن قاتار، زىمبىردەن ەنەرگەتيكالىق سمۋزي سۋسىنىن دايارلاي الاسىز.

قىزىلكۇرەڭ (ەحيناسەيا)

قىزىلكۇرەڭ گۇلشوعىرى ەرەكشە ەمدىك قاسيەتتەرگە يە. بۇل وسىمدىك يممۋندىق جۇيەنى نىعايتادى جانە اعزامىزعا ۆيرۋسقا قارسى، قابىنۋعا قارسى جانە ۋىتسىزداندىرعىش رەتىندە قابىلدانادى.
ءدارىحانالاردا تابلەتكا، تۇنبا جانە دەمدەۋگە ارنالعان قۇرعاق تۇرلەرى ساتىلادى. قوسپانىڭ جۇيكە جۇيەسىنىڭ قوزۋىندا باسۋ ءۇشىن، ەستە ساقتاۋ قابىلەتىن ارتتىرۋ ءۇشىن جانە تونۋستى كوتەرۋ ءۇشىن پايداسى زور.

سيترۋستار

سيترۋستاردىڭ ليمون بولسىن، اپەلسين نەمەسە گرەيپفرۋت بولسىن، بارلىعى دەرلىك س دارۋمەنىنە باي.
تاڭعى اسقا ىشىلگەن بالعىن اپەلسين شىرىنى نەمەسە سيترۋستى سمۋزي (نەگىزگى تاڭعى اس رەتىندە بولسا دا) - كۇنىڭىزدىڭ جاقسى باستالىپ، جۇمىسقا دەگەن قابىلەتىڭىزدى ارتتىراتىن تاماشا ءادىس ەكەنىنە كۇماندانباڭىز.   

ادامتامىر (جەنشەن)

كەز كەلگەن ءدارىحانادان ادامتامىر تۇنباسىن تابا الاسىز. بۇل تۇنبا ەڭ كۇشتى ەنەرگەتيك جانە يممۋندىق جۇيەنىڭ ستيمۋلياتورى بولىپ سانالادى (ياعني، ءوزىڭىزدى جايسىز سەزىنگەندە وسى دارىلىك ءشوپتى ەسكە ءتۇسىرۋ كەرەك دەگەن ءسوز).
بۇل دارىلىك ءشوپتى ميعا جانە دەنەگە كوپ كۇش تۇسكەندە، جۇيكەنىڭ توزۋى مەن جۇقارۋىندا قابىلداۋدى ۇسىنىلادى. ادامتامىر ءسىزدى كۇيزەلىسكە ءتوزىمدى جانە كەز كەلگەن جۇكتەمەگە قارسى تۇرۋعا دايىندايدى.

چيا داندەرى

پايدالى قاسيەتتەرى جايىندا شەكسىز ايتۋعا بولاتىن چيا داندەرى كەرەمەت تابيعي ەنەرگەتيك بولىپ سانالادى.  جاسۇنىق پەن ومەگا-3 مايلى قىشقىلداردان بولەك، بۇل ءونىم كوڭىل-كۇيدىڭ كوتەرىلۋىنە سەپتىگىن تيگىزەدى جانە اعزاداعى قابىنۋدى ازايتادى.

شايقۋراي (زۆەروبوي)

شايقۋراي تۇنباسى – كۇيزەلىسكە قارسى تىنىشتاندىرعىش اسەرى بار وسىمدىك. ول كوڭىل كۇيدى كوتەرەدى، ۇيقىنى رەتتەپ، پسيحيكالىق جانە فيزيكالىق جۇمىس ىستەۋ قابىلەتتىلىگىن ارتتىرادى. ەگەر دە ءسىز كۇش-قۋاتىڭىزدىڭ ازايىپ، قىس مەزگىلىندەگى كۇيزەلىستەن شارشاعان بولساڭىز، شايقۋراي شايىن ءىشىپ كورىڭىز. مۇنداي سۋسىننىڭ اسەرى ۇزاق بولماق. ءبىر ايدان سوڭ ءوزىڭىزدى سەرگەك سەزىنەتىن بولاسىز.

شىرعاناق

شىرعاناق – سىبىرلىك سەرگەكتىك پەن جاقسى كوڭىل كۇيدىڭ جيدەگى. ونىڭ قۇرامىندا قۋانىش گورمونى سەروتونين، كوپ مولشەردە س دارۋمەنى، بەتا-كاروتونين، جانە كوپ قانىقپاعان ماي قىشقىلدارى بار. سونىمەن قاتار كوزگە پايدالى.
بۇل سۋپەرفۋدتى بارلىق تاعامدارعا قوسۋعا بولادى.

---