InfoHub Logo

كەسۋ قارۋىنىڭ ەرتەدە قولدانىلعان ەكى ءجۇزدى، ءتۇزۋ كەلگەن ءتۇرى — «سەمسەر». ال سىرتىنا قاراي ءيىلىپ، قايقى كەلگەن ءبىر ءجۇزدى قارۋ «قىلىش» دەپ اتالادى. قىلىشتىڭ وتە قايقى بولىپ كەلەتىن «ناركەسكەن»، ۇشى ەكىگە ايىرىلاتىن «زۇلپىقار»، شاپقاندا اۋىر بولۋ ءۇشىن باسى ۇلكەيتىلىپ، جالپاق جاسالىنعان «الداسپان» دەگەن ۇلگىلەرى بار. XVIII-XIX عاسىرلاردان باستاپ قازاقتار باسى تۇزۋلەۋ «ساپى» اتالاتىن بالداقسىز قارۋدى قولدانا باستادى.

قىلىشتى، ساپىنى سالاتىن قابىن «قىناپ»، ال ونىڭ بەلگە تاعۋعا ارنالعان باۋىن «قىلىشباۋ» دەپ اتايدى. قىناپتار اعاشتان جاسالعان. ولار تەرىمەن، ماتامەن قاپتالىپ، كۇمىس، التىن جانە اسىل تاستارمەن اشەكەيلەنگەن.

كەسۋ قارۋلارىنىڭ ءجۇزى قىسقا كەلگەن ءتۇرى — قانجار مەن پىشاق. جاۋىنگەرلەر ولاردى سوعىستا تەك كومەكشى قۇرال رەتىندە پايدالانعان. كۇندەلىكتى تۇرمىستا قازاقتار ۇلتتىق پىشاعى مەن قانجارىن مىندەتتى تۇردە كىسە بەلدىككە تاعىپ جۇرگەن. قانجار، پىشاقتاردىڭ سابى مۇيىزدەن، سۇيەكتەن، اعاشتان جاسالىپ، قىنى تەرىدەن تىگىلىپ، جالپاق ءۇشبۇرىشتى، ءتورتبۇرىشتى الاقانمەن بىتكەن.

---