InfoHub Logo

الدان ەندى وسىندا كەلگەنىنە وكىنىپ وتىر. ءوزى الدەنەدەن قورىققانداي قيمىلسىز وتىر. الداننىڭ اۋىلداعى بالەكەي كەلىنشەگى مەن بىر-بىرىنە ىركەس-تىركەس دۇنيەگە كەلگەن ايۋدىڭ قونجىعىنداي قوس ۇلىنا دەپ ساتىپ العان زاتتارى بار دورباسى اياق كيىمدەر شەشەتىن جەردە بوساعادا سۇيەۋلى تۇر. الداننىڭ قارنى اشىپ-اق وتىر. ءبىراق الدىنداعى ۇستەلدىڭ ۇستىندە تۇرعان تاماقتى جەۋگە توردە توبەدەي بولىپ ۇزىنىنان ءتۇسىپ سۇلاپ جاتقان ەركەكتەن باتپاي وتىر. ويتكەنى وسى تاماق تا، داستارقاننىڭ يەسى دە - وسى كىسى. الدان سونىڭ قاباعىنا قاراپ وتىر. تاماققا قولىن سوزايىن دەسە، قاسىعى شىق ەتىپ ىدىستىڭ شەتىنە ءتيىپ كەتەتىن سەكىلدى. الدىنداعى كەسەدە تۇرعان شايدى ۇرتتايىن دەسە، جۇتقىنشاعى قۇلق ەتە قالاتىن سياقتى. توردەگى ەركەكتىڭ مىسى ابدەن-اق باسىپ، بەرەكەسى قاشىپ وتىر. باعانا اۋىلىنا باراتىن اۆتوبۋسى كەلەمىن دەگەنشە، كوشەدەن بىردەڭە جەي سالماي، وسى ۇيگە كەلگەنىنە قىنجىلىپ-اق وتىر. شاي قۇيىپ وتىرعان تارامىستاي قاتقان قارا ايەل الدانعا بىر-ەكى رەت "شاي ءىش" دەپ كۇبىر ەتتى. توردە توبەدەي بوپ جاتقان ەركەك قاسىقتى تولتىرىپ الىپ، اۋزىنا اسايدى دا، ۇرتى بۇلت-بۇلت ەتىپ شايناڭدايدى. ءبىر كەزدە اۋزىنا تاماقتى تولتىرىپ اسادى دا، جاعى سىرت-سىرت ەتىپ شايناپ وتىرىپ، الداننىڭ ارقا تۇسىنداعى ىرگەنى كورسەتىپ "ءىم، ءىم..." دەدى. الدان ارتىنا بۇرىلىپ قاراعاندا ىرگەگە تاقالا جاتقان گازەتتى كوردى. "گازەت پە؟" - دەدى الدان. "ءىم... ءىم". ەركەك شايناڭداپ وتىرىپ، باسىن يزەدى. الدان گازەتتى قولىن سوزىپ-اق الىپ بەرە الاتىن ەدى. ءبىراق، نەگە ەكەندىگى بەلگىسىز، ورنىنان ۇشىپ تۇردى. ءسويتتى دە، جەپ-جەڭىل گازەتتى قوس قولداي كوتەرىپ، الاقانىنا سالعان كۇيى بەينە ءبىر مارتەبەلى مەيمانعا قىزمەت جاساپ جاتقان داياشىداي ەركەككە ىلتيپاتپەن ۇسىندى. ەركەك الداننىڭ مۇنىسىنا ءمان دە بەرگەن جوق. گازەتتى قولىنا العان كۇيى شىنتاقتاپ جاتقان جاستىعىنىڭ ارجاعىنا جايا سالىپ، جاستىقتى باۋىرىنا جيىپ العان كۇيى ەتپەتىنەن اۋدارىلىپ ءتۇستى.

الدان ەندى ەركەكتىڭ كۇجىرەيىپ جاتقان جوتاسىنان قاراپ وتىر. ەركەك گازەتتىڭ بەتىنەن الدەبىر انەكدوت پا، ءازىل مە، بىردەڭە وقىعان بولۋ كەرەك، جاۋىرىنى بۇلكىلدەي ءتۇسىپ تۇرىپ كۇلدى. الدان وسى ءساتتى پايدالانىپ قاسىعىن تاماققا جۇگىرتىپ-جۇگىرتىپ الدى. كەسەدەگى شايىن دا جۇدەمەلەتە-جۇدەمەلەتە ءىشتى. وسىنىڭ وزىنە-اق قارنى توعايىپ قالعان ەدى. سونان سوڭ كەسەسىن دوعارىپ بارىپ، بەتىن سيپادى. "ءالى ەرتە ەمەس پە؟" ايەل كۇبىر ەتتى. "بارا بەرەمىن عوي".

الدان ورنىنان كوتەرىلدى. توردە جاتقان ەركەككە ساۋ بولىڭىز دەگەندەي بىردەنە ايتقىسى كەلىپ تۇرىپ، ءبىراق باتا المادى. اياق كيىمدەر تۇرعان جەردەگى قالانىڭ شاڭى اياۋسىز-اق قونعان تۋفليىن اياعىنا سۇقتى. سونان سوڭ سول جەردە جاتقان شوتكەنى الا سالىپ، ىسقىلاپ-ىسقىلاپ جىبەردى. ءسويتتى دە، بوساعادا تۇرعان دورباسىن قولىنا ۇستاعان كۇيى بەلىن جازىپ، قوناعىن شىعارىپ سالۋعا جانىنا كەلىپ تۇرعان ايەلگە:

- ساۋ بولىڭىز، - دەدى.

ايەلدىڭ ءۇنى بولار-بولماس ەستىلدى:

- ۇي-ىشىڭە سالەم ايت.

الدان سىرتقى ەسىكتى اشىپ، ەسىك الدىنا شىقتى. جوتاسى كۇجىرەيىپ شىنجىردا جاتقان الپامساداي توبەت الداندى كورە سالىپ، ارس-ارس ەتىپ ۇمتىلدى. الدان تىپىڭ-تىپىڭ ەتىپ قاقپانىڭ جانىنداعى كىشكەنە ەسىكتەن شىعىپ ۇلگەردى. ەسىك سوڭىنان سارت ەتىپ جابىلدى. الدان ەنى تار جاياۋ جۇرگىنشى جۇرەتىن جولعا تۇسكىسى كەلمەگەندەي، كولىك جۇرەتىن كەڭ كوشەگە شىعىپ الىپ، كەۋدەسىن كەرە تۇرىپ ءبىر تىنىس الدى.

---