InfoHub Logo

ايتۋشىلاردىڭ اڭىزىنا قاراعاندا، بەيسەنبى كوك ءيىرىم كەڭەسىنە ەكى رەت بارعان. ءبىرىنشى رەت بارعاندا نايمان-كەرەي ورتاسىنداعى جەر تالاس ءبىتىمىن نايمان بيلەرىمەن كەلىسىپ، ءبىتىرىپ قايتقان ەكەن. كەلەسى جىلى جەر تالاس قايتا ءورشىپ، ۇلكەن توبەلەس شىعىپ، ەكى جاقتان ادامدار سويىلعا جىعىلىپ، باس جارىلىپ، كوز شىعىپ، قول-اياق مەرتىگىپ، بۇل ىستەر ءبىتىمسىز داۋعا اينالا باستاعان.

اسىرەسە كەرەي جاقتان ءبىر جىگىتتىڭ باسى ايىرىلىپ، ءولىپ قالا جازداعان. نايماندار جاعى كەرەيدىڭ جارالى ادامىن قولىنا سالساق، اۋىر جاراقاتىن كورگەن ىزاقور تۋىستارىنىڭ ءبىرى كوزىن جويىپ، كىسى قۇنىنا قالارمىز. ونان دا قولىمىزدا باعىپ، ولسە دە، تىرىلسە دە، كوزبەن كورەلىك دەسكەن. ال كەرەي جاعى ادامىمىزدى ءولتىرىپ، تىعىپ تاستادىڭدار دەپ جارعى جازىپ، مال قۋىپ العان.

بۇل ۋشىققان ءىستى بىتىرۋگە نايمان جاعى سەز اشۋدى تالاپ ەتكەن جانە كەرەي ءبيى بەيسەنبىنى شاقىرتقان. بەجەڭ ەكىنشى رەت بارعاندا، ول جەردەگى كەرەي اۋىلدارى قىس قاتتى بولىپ، مالى جۇتاعان. اشتىق-جالاڭاشتىق جايلاعان. «جۇت جەتى اعايىندى» دەگەندەيىن سارىسۇزەك اۋرۋ ءجۇرىپ، ادامداردان ءولىم-جىتىم كوبەيگەن. بەجەڭ اۋىلداردى ارالاپ كورىپ، بارىن جوعىنا تەلىپ، اقىل-كەڭەس ايتىپ جاناشىرلىق جاساعان.

اسىرەسە وتكەن جىلى جەر ءبولىسىن مۇقيات ىستەمەي، ەكى جاققا دا كوڭىلشەكتىك ىستەگەنىنە قاتتى وكىندى. بۇل جولى قاتاڭ كەلىپ، جەردى ءادىل ءبولدى. ەكى جاقتى جاقسى كەلىسىمگە كەلتىردى. كەرەيدىڭ سويىلعا جىعىلعان جارالى ادامىن تۋعان-تۋىستارىن ەرتىپ اپارىپ، كوزىمەن كورسەتتى. قارسى جاقپەن اقىلعا كەلىپ، دارىگەر شاقىرتىپ، سويىلعا جىعۋشىلاردىڭ باعىپ-قاعۋىنا وتكىزدى.

ەكى جاقتىڭ ەرەگەسىن توقتاتىپ، ەلىنە قايتتى. الايدا بەجەڭ ءوزىنىڭ دارمەنسىز كۇيدە ەكەنىن سەزىپ، كوپ وي تولقىنىنا تۇسكەن. ءوزارا بەرەكە بىرلىكتە بولىپ، ىرگە بولمەي، التىباقان الاۋىز بولماي، وقۋ-بىلىمگە ۇمتىلىپ، ونەر ۇيرەنسەك، مۇنداي اۋىر جاعداي تۋماس ەدى دەپ ارمانداعان. وسى ارمان ساپارىندا «كوك ءيىرىم كەڭەس» تۋعان.

---