كولەڭكە
شىجىعان ىستىق. قولدارىندا ول-پۇل زاتتارى بار، تەرلەپ-تەپشىگەن ءۇش ادام اۆتوبۋس ايالداماسىنا كەلدى. ءبىرى — بولجان اتتى كىشكەنە بالا، ەكىنشىسى — سونىڭ شەشەسى، ءۇشىنشىسى — اجەسى. كوپ كۇتتىرمەي اۆتوبۋس تا كەلە قالدى. جولاۋشىلار جەرگە تۇسكەن سوڭ، ايالداماداعى ون شاقتى كىسى ىشكە كىردى.
وڭ جاقتاعى ورىندارعا كۇن ساۋلەسى ءتۇسىپ تۇر. باسقا جولاۋشىلار سياقتى بولجان دا سول كۇن جاقتاعى ورىنداردىڭ بىرىنە وتىردى. اجەسى مەن شەشەسى كولەڭكە بەتكە جايعاسىپتى.
— باسىڭ ىستەمەيدى، ءبىرىنشى سىنىپتى بىتىرسەڭ دە!.. مۇندا كەل! كولەڭكەگە وتىر! ءۇيىمىز الىس، ەكى ساعاتتىق جەر.
شەشەسىنىڭ شارشاپ-شالدىققاندا وسىلاي رەنجىپ، اۋىر ءسوز ايتاتىنى بار.
— اجە! اپا! مۇندا كەلىڭدەر! اۆتوبۋس قالادان شىققان سوڭ، كىلت سولعا بۇرىلادى. سوندا وسى جاققا ۇيگە جەتكەنشە كۇن تۇسپەيدى.
— بارلىعى دا كۇن جاققا وتىرىپتى. كوپشىلىك قوي، بىردەڭەنى بىلەتىن شىعار. كوشىپ وتىرايىق، كەلىن.
ءسويتىپ، ەكەۋى بولجاننىڭ قاسىنا كەلدى. كىسى كوبەيىپ، بوس ورىننىڭ بارىنە جولاۋشىلار وتىرىپ بولعان كەزدە، اۆتوبۋس ءجۇرىپ كەتتى. قالادان شىققاسىن، سولعا قاراي شۇعىل بۇرىلدى. ەندى كولەڭكە بولجاندار وتىرعان جاققا ءتۇستى.
بۇلار كوپكە دەيىن سويلەسكەن جوق. اجەسى مەن شەشەسى قالا ارالاپ شارشاعاندىقتان ۇندەمەيتىن شىعار. ال بولجاننىڭ كوكەيىنەن
اپاسىنىڭ: «باسىڭ ىستەمەيدى!» — دەگەن ءسوزى كەتپەي قويدى. بالالار قاتەلەسسە، ۇلكەندەردەن ىلعي كەشىرىم سۇرايدى. ۇلكەندەر نەگە بالالاردان كەشىرىم سۇرامايدى ەكەن وسى، ءا؟!
اۆتوبۋس جارتى جولعا جەتكەندە:
— اقىلىڭنان اينالايىن، قوڭىر قوزىم! — دەدى اجەسى ەمىرەنە. كولەڭكەدە وتىرعانىمىز — سەنىڭ ارقاڭ عوي.
بولجاننىڭ كوڭىلى جادىراپ سالا بەردى.
قالعىپ وتىرعان شەشەسى ناق ءبىر اجەسىنىڭ ءسوزىن ماقۇلداعانداي، اۆتوبۋستىڭ ەكپىنىمەن تەڭسەلىپ، باسىن يزەپ-يزەپ قويدى.
You Might Also Like
-
اجەسىن ساعىنعالى قاشان. سوناۋ جازدا بارعان. ءقازىر ءبىر جاس ۇلكەيدى. ەندى كورسە تانىماي قالاتىن شىعار.
-
باياعىدا ءبىر ايەل ءومىر ءسۇرىپتى. ول ءوزىنىڭ ءۇش قىزىن اش-جالاڭاش قالدىرماي اسىراپ-باعۋ ءۇشىن كۇن-تۇن دەمەي جۇمىس ىستەپتى. ءۇش قىز قارلىعاشتاي سىلانىپ، ايداي تولىسىپ، تەز بوي تۇزەپتى. بىرىنەن سوڭ ءبىرى تۇر...
