اجەگە اپاراتىن جول
اجەسىن ساعىنعالى قاشان. سوناۋ جازدا بارعان. ءقازىر ءبىر جاس ۇلكەيدى. ەندى كورسە تانىماي قالاتىن شىعار.
— ۇلكەيىپ كەتىپسىڭ عوي، قالقام-اۋ، — دەپ ايتارى ءسوزسىز.
وندا باقتا جەمىس-جيدەكتەردىڭ پىسكەن شاعى بولاتىن. الما، المۇرتتار سىڭسىپ تۇردى. اجەسى ولاردان قاق جاساعان. ال ونىڭ ءبارىن ايگۇل ءۇيدىڭ توبەسىنە جايادى.
اجەسى كۇندە كەشكىسىن ءۇي الدىنداعى پەشكە وت جاعادى. بۇل ۋاقىتتا جەلىنى جەر سىزىپ، ورىستەن الا سيىر كەلەدى.
ازدان سوڭ اسپاندا جۇلدىزدار قاپتاپ كەتەدى. شەگىرتكەلەر شىرىلدايدى. اجەسى ەكەۋى پەشتىڭ الدىندا قىزىل الاۋعا مالىنىپ وتىرىپ، ءسۇت پىسىرەدى. قازاندىقتىڭ قاسىندا ايتقان اڭگىمەنىڭ اسەرى بولەك. كوپكە دەيىن ۇمىتىلمايدى.
جازعى كۇندەرى ولار دالاعا، ءۇيدىڭ الدىنداعى ساكىگە تۇنەيتىن. ايگۇل ءتىپتى قورىقپايدى. اجەسىنىڭ قوينىنا سىپ ەتىپ كىرىپ كەتەدى، ول: «قوڭىر قوزىم!» — دەپ بەتىنەن سۇيەدى.
تاڭەرتەڭ بۇل تۇرعاندا، اجەسى الا سيىردى كۇرپ-كۇرپ ساۋىپ جاتادى. «تاك، تاك، تىنىش، قايتەدى-ەي مىناۋ»، — دەپ قويادى، الا سيىرعا ۇرسىپ. ايگۇل ۇيقىسىن قيماي ءبىراز وتىرادى. تاڭعى تىنىشتىقتى بۇزىپ، ماشينالار قىرقاعا ورلەپ بارا جاتادى.
ايتپاقشى، اجەسىنىڭ كورشىسىنىڭ ءبىر جىلاۋىق قىزى بار ەدى عوي. اجەسى ەكەۋى سول ۇيگە بارعاندا تانىسقان. سوندا ەكەۋى جارىسىپ ەسەپ شىعارعان. ءبىراق كورشىنىڭ قىزى تۇك بىلمەيدى ەكەن. سوعان ىزىلاندى ما، بولماشى ءبىر نارسەنى سىلتاۋراتىپ جىلاپ جىبەرگەن…
ال ءقازىر ايگۇل ءبارىن ساعىنىپ وتىر. باقشانىڭ اياعىندا بۇلاق بولاتىن. سودان كۇنىگە سۋ اكەلەتىن. اجەسىنىڭ قارا قاسقا قويىنىڭ ەگىز تاپقانى دا ەسىندە. قوزىلار كىپ-كىشكەنە، قاپ-قارا بولاتىن. ولارعا ول ۇيدەگى كىشكەنە الا مىسىقتى قوسىپ قوياتىن. ءتىپتى ۇيرەنىپ العان سوڭ، الا مىسىق قوزىلاردىڭ ۇستىنە جاتىپ ۇيىقتايتىندى شىعاردى. قوزىلار سەكىرىپ ويناقتايتىن شاماعا جەتكەن سوڭ، بۇنىڭ سوڭىنان قالمايتىن. بىرەسە قۋىپ، بىرەسە قاشىپ جۇرەتىن.
بۇگىن تاڭەرتەڭ اكەسى:
— دايىندال، اجەڭنىڭ اۋىلىنا باراسىڭ، — دەدى.
…ەندى، مىنە، ولار اكەسىنىڭ كولىگىمەن ۇلكەن قارا جولعا ءتۇستى. ءدال وسى جول اجەسىنىڭ اۋىلىنا اپارادى. ايگۇلدىڭ جۇرەگى اتتاي تۋلاپ قويا بەردى.
You Might Also Like
-
قوناق كەلەدى دەسە، ەڭ الدىمەن قۋاناتىن ايدوس. ويىندى ۇمىتىپ، اس ۇيدە ءجۇرىپ الادى. اپاسى پىسىرگەن ءتاتتى تاعامداردى ساۋساعىنىڭ ۇشىمەن ءبىر شۇقىپ كورمەي، كوڭىلى كونشىمەيدى.
-
شىجىعان ىستىق. قولدارىندا ول-پۇل زاتتارى بار، تەرلەپ-تەپشىگەن ءۇش ادام اۆتوبۋس ايالداماسىنا كەلدى. ءبىرى — بولجان اتتى كىشكەنە بالا، ەكىنشىسى — سونىڭ شەشەسى، ءۇشىنشىسى — اجەسى. كوپ كۇ...
