InfoHub Logo

2017 جىلدان باستاپ، جۇمىسكەر ماماندىقتارىندا وقيتىن تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتەرى شاكىرتاقىمەن، جول اقىمەن جانە بىررەتتىك تەگىن تاماقپەن قامتاماسىز ەتىلەدى.

بۇل تۋرالى بۇگىن وكق-دا وتكەن باسپا ءسوز ءماسليحاتىندا ق ر ءبىلىم جانە عىلىم ۆيسە-مينيسترى بيبىگۇل اسىلوۆا ءمالىم ەتتى.

قازىرگى ۋاقىتتا ءبىلىم مينيسترلىگى تەگىن تەحنيكالىق جانە كاسىپتىك ءبىلىم بەرۋدىڭ جاڭا تەتىكتەرىن جاساقتاعان. 2021 جىلعا دەيىن قازاقستاندا تەگىن ءبىلىم جۇيەسىمەن 671،5 مىڭ ادامدى قامتۋ كوزدەلگەن.

«ءبىز تەگىن تەحنيكالىق جانە كاسىپتىك ءبىلىم بەرۋ جۇيەسىنىڭ جاڭا تەتىكتەرىن جاساقتادىق. ەگەر بۇرىن مەكتەپ بىتىرگەن تۇلەك جۇمىسشى بىلىكتىلىگىنە نەمەسە ورتا بۋىندى ماماندىقتارعا اقىلى نەمەسە مەملەكەتتىك تاپسىرىس نەگىزىندە جەكە-جەكە تۇسكەن بولسا، جاڭا مودەل بويىنشا، تۇلەك ورتا بۋىندى ماماندىققا جۇمىسشى بىلىكتىلىگى ارقىلى تۇسەدى دە، ەڭبەك نارىعىنا كىرەدى»، - دەيدى اسىلوۆا.

ونىڭ ۇستىنە، ءبىلىم بەرۋ، مەديسينا جانە ونەر ماماندىقتارى بويىنشا وقىتۋ ءىشىنارا مەملەكەتتىك تاپسىرىسپەن جۇرسە، ەكونوميكا جانە زاڭگەر ماماندىقتارىنا وقىتۋ اقىلى بولادى.

«2017 جىلى اتالمىش مودەل بويىنشا، ەڭ كوبى 142 مىڭ ادام قابىلداناتىنى جوسپارلانعان. ولاردىڭ ىشىندە، 40 مىڭ ادام جۇمىسشى ماماندىقتارى بويىنشا، 54 مىڭ ادام - 2 جۇمىسشى بىلىكتىلىگىن الىپ شىعاتىن ورتا بۋىندى ماماندىقتار، 32 مىڭى - ءبىلىم بەرۋ، مەديسينا جانە ونەر ماماندىقتارى، 16 مىڭى - ەكونوميكالىق جانە زاڭگەرلىك ماماندىقتار. ءبىز جۇمىسشى ماماندىقتارىنا تۇسەتىن تۇلەكتەردىڭ سانىن ەكى ەسەگە ارتتىرۋدى ماقسات ەتىپ وتىرمىز. كەلەسى جىلدان باستاپ، جۇمىسكەر ماماندىقتارىندا وقيتىن تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتەرىن جەرگىلىكتى بيۋدجەتتەر ەسەبىنەن شاكىرتاقىمەن، جول اقىمەن جانە بىررەتتىك تەگىن تاماقپەن قامتاماسىز ەتۋ كوزدەلىپ وتىر»، - دەيدى ۆيسە-مينيستر.

جاڭا باعدارلاما بويىنشا، اسىرەسە، ءبىلىم الۋعا قاراجاتى جوق، از قامتىلعان وتباسىدان شىققان جاستاردى كوپتەپ تارتۋ جوسپارلانعان.

باعدارلامانى جۇزەگە اسىرۋ كەزىندە ەلىمىزدە جۇمىسسىزدىق دەڭگەيىن 4،8 پايىزعا دەيىن تومەندەتۋ كوزدەلەدى. 2021 جىلعا قاراي تۇلەكتەردىڭ 40 پايىزعا جۋىعى جۇمىسشى ماماندىقتارىن يگەرەدى دەگەن بولجام بار.

ايتا كەتەيىك، 2017 جىلدان باستاپ، كوللەدجدەردە، تەحنيكالىق جانە كاسىپتىك ءبىلىم بەرۋ وردالارىندا جۇمىسشى ماماندىقتارىنا وقىتۋ قازاقستاندا تەگىن جۇرگىزىلەدى.

---