كوڭىلدى كۇز
ۇكىمەتى، اكىمى
تانىماعان اۋىلىم،
جۇرەكتەرىن ىزعارى
قارىماعان اۋىلىم.
جاڭا عاسىر ەسىگىن
اتتاعالى تۇرسا دا،
"سۆەتىنە ءيليچتىڭ"
جارىماعان اۋىلىم.
قازىرگى قوجاباقى - مۇلدە جاڭارعان، جاڭعىرعان اۋىل. ال بۇل ءبىر كەزدەگى جاس ۇستازداردىڭ اۋداندىق "كوڭىلدى كۇز" سايىسىندا بەلگىلى "اۋىلىم" انىمەن پاروديا رەتىندە ايتقان ءانى ەدى.
سول جولعى ەمتيحان-سىناقتارىن تاپسىرۋ سەسسياسى ادەتتەگىدەن تىس كۇز ايىنا كەلدى. ويتكەنى بۇل جولعى دەمالىس ەمتيحان-سىناقتاردى تاپسىرۋعا دا ءارى مەملەكەتتىك ەمتيحاندى تاپسىرۋعا دا قوسا بەرىلگەن بولاتىن. بۇل - ءوزىنىڭ ەكىنشى رەت ماماندىق الىپ جۇرگەن وقۋىنىڭ ءبىتىرۋشى كۋرسى.
ەمتيحاندارىن تاپسىرىپ بارىپ، ءبىر-اق كەلۋىنە بولاتىن بولسا دا، ەمتيحان-سىناقتار مەن مەملەكەتتىك ەمتيحاننىڭ اراسىنداعى ءۇزىلىس ءساتىن پايدالانىپ، مەكتەپكە كەلىپ قايتقىسى كەلگەن ەدى. وسى كەزدە مەكتەپتىڭ جاس ۇستازدارى اۋداندىق "كوڭىلدى كۇز" سايىسىنا ىرىكتەلىپ، ازىرلىكتەرىن جاساي باستاعان ەكەن.
مەكتەپتە وقۋشىلار اراسىندا وتەتىن كۇز سايىستارىنا جۇرتتىڭ كوزى ۇيرەنسە دە، جاس ۇستازداردىڭ اراسىنداعى مۇنداي سايىس داستۇرگە اينالماعان ەدى.
سايىسقا مەكتەپتىڭ جاس ۇستاز قىزدارى ىرىكتەلىپتى. قاتىناس قاعازدا باسقا دا شارتتارىمەن بىرگە توپتىڭ اتى، توسبەلگىسى، جاڭادان شىققان وزدەرىنىڭ ءانى، كورەرمەنمەن سالەمدەسۋى جانە سوڭىندا جۇرتشىلىقپەن قوشتاسۋ سوزدەرى، سونىمەن بىرگە پاروديا بولۋ كەرەك دەپتى.
وزىنەن وسىعان كومەك سۇراپ تۇرعاسىن، توپتى "ۇركەر" دەپ اتاۋدى ۇسىنعان ەدى. بۇل ات سايىسكەرلەردىڭ وزىنە دە ۇنادى. ءبىراق وسى ۇركەر ءسوزى كۇزبەن بايلانىسۋى كەرەك ەدى. ول قازىلاردىڭ الدىندا دالەلدى بولۋى كەرەك. وسى ءۇشىن دەرەكتەر ىزدەدى. دەرەك تە تابىلدى. سونان سوڭ توسبەلگىگە سالىناتىن سۋرەتتەردى ۇسىندى. سايىسكەرلەردىڭ تاراپىنان توسبەلگى دە ماقۇلداندى.
سودان كەيىن بارىپ قانا "ۇركەردىڭ" سالەمدەسۋى جانە تانىستىرىلۋى جازىلدى:
"ءبىزدىڭ توبىمىزدىڭ اتى "ۇركەر" دەپ اتالادى. توپتىڭ اتىن بۇلاي قويۋ سەبەبىمىز - قىرىق كۇن شىلدەدە كوكجيەكتەن كورىنبەي، حالىقتىڭ تىلىمەن ايتقاندا "جەرگە تۇسەتىن" ۇركەر شوقجۇلدىزى كۇز ايى باستالىسىمەن-اق اسپان كوگىندە شىعىستان جارقىراپ كورىنەتىن بولعاندىقتان، ءبىز دە وسى شوقجۇلدىزدىڭ اتىن وزىمىزگە ەنشىلەي وتىرىپ، وسى كۇز سايىسىندا ونەرىمىزبەن سول جۇلدىز سەكىلدى جارقىراي كورىنسەك ەكەن دەگەن نيەتپەن الدىق.
ءبىزدىڭ توسبەلگىمىزدىڭ جوعارى جاعىندا "ۇركەر" دەپ توپتىڭ اتى جازۋلى تۇر. ال توسبەلگىنىڭ ىشكى شەڭبەرىنىڭ جوعارى بولىگىندە التى جۇلدىز بەينەلەنگەن. مۇنىڭ سەبەبى - ۇركەر الابىندا 500-دەن استام جۇلدىز بولعانىمەن، سونىڭ التاۋى جاي كوزگە انىق كورىنەتىندىگىنە بايلانىستى. شوقجۇلدىزدىڭ جانىندا اي بەينەلەنگەن. مۇنىڭ سەبەبى حالقىمىزدىڭ ۇعىمىندا توعىسۋ كەزەڭىندە ۇركەر مەن اي بىر-بىرىنە جاقىن كەلسە، جاقسىلىق، قۋانىش، مالعا جايلى كەزەڭ بولادى دەگەن. بۇل ءبىزدىڭ ءوزىمىزدىڭ دە بۇگىنگى سايىستان جاقسىلىق، قۋانىش كۇتكەن نيەتىمىزدى بىلدىرەدى. شوقجۇلدىز بەن ايدىڭ تومەنگى جاعىندا كوكبورىنىڭ سۋرەتى سالىنعان. كوكبورى تۇركى حالىقتارىنىڭ بىرلىگى مەن تۇتاستىعى رەتىندە سالىندى. سەبەبى بيىلعى جىلىمىز - حالىق بىرلىگى مەن ۇلتتىق تاريح جىلى. توسبەلگىنىڭ تومەنگى شەڭبەرىندە وسى جىل اتاۋى جازىلىپ قويىلعان".
"ۇركەردىڭ" حالىقپەن سالەمدەسۋى حالىقتىڭ ءوز ءانى "گۇل-گۇل جاينا" انىمەن اشىلسا دەگەن ەدى. "تاڭ باعىندا، الدارىڭدا - "ۇركەر" توبى، اعايىن!" بۇل - سالەمدەسۋ ءانىنىڭ قايىرماسىنىڭ ءسوزى.
قوجاباقى كەمەرلى
اۋىل ەدى ونەرلى.
جينالىپ وتىر سايىسقا
قالىڭ قاۋىم ەل ەندى.
تاڭ باعىندا،
الدارىڭدا -
"ۇركەر" توبى، اعايىن!
ال سوڭىندا "ۇركەر" حالىقپەن، ساحنامەن "ارمانداستار" انىمەن قوشتاسىپ شىقسا دەگەن بولاتىن.
ءۇمىت ءجىبىن جالعاي ءتۇسىپ ارماندارعا
شاقىرادى بيىك بەلەس الدان دارا.
ونەر بيىك ماقساتتارعا جالعانعاندا
تانى ەلىڭدى، ءبىل، جاستار!
ق-سى:
جاس كەۋدەدە نامىس لەبى ويانعاندا،
سايىس شارتى مارەسىنە تايانعاندا
جارقىراسىن جۇلدىز!
جازىلماسىن جۇبىمىز!
"ۇركەر" توبى قوشتاسادى سىزبەنەن.
جاڭا ءان ءۇشىن "كۇز اۋەنى" ءماتىنى جازىلدى. ءانىن سازگەر شىعاردى:
دۋمان تولى اسقارلى
كۇز مەزگىلى باستالدى.
كۇز اۋەنى كەپ جەتتى
انگە بولەپ جاستاردى.
ق-سى:
نۇرعا بولەپ ءومىردى،
جىرعا بولەپ كوڭىلدى.
جارقىراعان ساۋلەلى
كۇز اۋەنى توگىلدى.
پاروديا بەلگىلى انگە جازىلسا دەگەن ەدى. بەلگىلى "اۋىلىم" ءانى ءبىر كەزگى اۋىلدى ماقتان ەتسە، ەندى پاروديانىڭ سوزىندە نارىقتىڭ اسەرىنەن ەلەكتر جەلىسىنەن اجىراپ، مايشامعا قاراپ قالعان سول كەزگى اۋىلدىڭ جاي-كۇيى جازىلدى:
نە جاڭالىق كورسە دە
تاڭدانباعان اۋىلىم،
شارۋاشىلىق وركەندەپ،
جاندانباعان اۋىلىم.
كومپيۋتەرگە جارماسار
ويلى جاسى بۇگىندە
تەلەديدار كورۋدى
ارمانداعان اۋىلىم...
بۇل سونان سوڭ مەملەكەتتىك ەمتيحانىن تاپسىرۋعا كەتتى. ەمتيحان ەكەۋ ەدى. ءبىرى تەوريادان، ءبىرى ادىستەمەدەن. ستۋدەنت ءوزىنىڭ قالاعان بىرەۋىن تاپسىرادى. ادىستەمەنى تاڭداپ الدى. قۇقىقتىق تاربيە بەرۋ ادىستەمەسى. بۇلار "زاڭگەر-وقىتۋشى" كۆاليفيكاسياسىمەن قابىلدانعان ءۇشىنشى تۇلەكتەر ەدى. وسىمەن بۇل كۆاليفيكاسيامەن مامان دايىنداۋ توقتالادى. كافەدرا سول كەزدە ەندى بۇدان كەيىن مەكتەپتەگى قۇقىق نەگىزدەرى ءپانى مۇعالىمدەرىن دايىنداي باستاعاندىعى بەلگىلى.
"يۋستيسيادان مامان كەلەدى، مۇقيات بولىڭدار" دەدى بۇلارعا. ءبىراق مامان كۇتكەندەگىدەي، ادىلەت باسقارماسىنان ەمەس، سوتتان كەلدى. ەمتيحاندى قالالىق سوتتىڭ ءتوراعاسى قابىلدادى. قالالىق سوتتىڭ ءتوراعاسى عانييەۆ ەمتيحانداعى جاۋابىن "وتە جاقسى" دەپ باعالادى.
قوجاباقىلىق كوماندا دا سايىستا اۋداندىق "كوڭىلدى كۇز" سايىسىنىڭ I ورنىن ەنشىلەگەن ەدى.
You Might Also Like
-
اقپاراتتىق-تالداۋ ورتالىعى «ءبىلىم بەرۋدىڭ جانە عىلىمنىڭ ساپاسىنا قاناعاتتانۋشىلىققا مونيتورينگ جاساۋ» جوباسىنىڭ اياسىندا ءۇش كەڭ اۋقىمدى الەۋمەتتىك زەرتتەۋدى قورىتىندىلادى.
-
بورانعا بايلانىستى سەمەيدە ءبىرىنشى اۋىسىمدا وقيتىن 1-9 سىنىپ وقۋشىلارىنا ساباق توقتاتىلدى.
