كونوسۋكە ماسۋسيتانىڭ ءومىرى مەن جەتىستىككە جەتۋ تاريحى
Panasonic، National جانە Technics برەندتەرىمەن تانىمال ماسۋسيتا ەلەكتريك جاپون فيرماسىنىڭ نەگىزىن قالاۋشى، اتى اڭىزعا اينالعان كونسۋكە ماسۋسيتا ءوز ءداۋىرىنىڭ ەڭ وزىق كاسىپكەرى، بيزنەس-ليدەرى جانە يننوۆاتورى رەتىندە مىسال بولا الادى.
كونوسۋكە ماسۋسيتا مەكتەپتى تاستاپ، 9 جاسىنان جۇمىس ىستەۋگە ءماجبۇر بولعان. التى جىل بويى ول ۆەلوسيپەد شەبەرحاناسىندا كومەكشى شەبەر بولىپ جۇمىس ىستەگەن، كەيىن Osaka Electric Light Company-عا اۋىسادى. كونوسۋكە ماسۋسيتا كومپانيا ونىمدەرىنىڭ كەمشىلىكتەرىن ىزدەپ، جوندەۋگە تىرىساتىن.
22 جاسىندا ول جاڭا قۇرىلىمداعى ادەمى شتەپسەل ايىرىن جاساپ شىعارادى. باستىعى ونىڭ كەزەكتى ونەرتابىسىن قابىلداماعاننان كەيىن كونوسۋكە ماسۋسيتا كومپانيادان كەتۋدى ۇيعارادى. ول ءوزىنىڭ بيزنەسىن باستاپ، يننوۆاسيالىق ەلەكتروپاتروندار شىعارۋدى باستايدى.
بيزنەستى دامىتۋعا باستاپقى جارناسى بار-جوعى 100 يەنگە تەڭ بولاتىن. ماسۋسيتا ەلەكتريك كومپانياسىنىڭ اڭىزعا اينالعان تاريحى 1917 جىلى وسىلاي باستاۋ الادى. كەيىن كونوسۋكە ماسۋسيتا سەگىز زاۋىتتىڭ يەگەرى اتانادى، ال ونىمدەرى Panasonic اتتى ماركامەن شىعا باستايدى.
ءوز بيزنەسىن بىلايشا ايتقاندا نولدەن باستاعان ول، ءومىرىنىڭ سوڭىنا دەيىن ءوزىن 3 ميلليارد دوللار قاراجاتپەن قامسىزداندىرادى، ال ءوزى نەگىزىن سالعان Matsushita Electric Industrial Ltd كومپانياسىنىڭ قاراجاتى 42 ميلليارد دوللارعا جەتەدى. زەينەت جاسىندا كونوسۋكە ماسۋسيتا ەڭ باي جاپون بيزنەسمەنى عانا ەمەس، الەمدى مويىنداتقان كومپانيا قۇرا العان ەڭ قۇرمەتتى بيزنەس-ليدەر، اڭىز ادام بولدى.
ول مەنەدجمەنت شەبەرلىگى جايلى كوپتەگەن ماقالا، كىتاپ جازدى. ميللياردەر بولسا دا كونوسۋكە تۇسكەن پايداسىنا قورلار مەن بيزنەس-مەكتەپتەر اشتى. ول سونىمەن قاتار جاپونيانىڭ ساياسي جۇيەسىن جاقسارتقىسى كەلدى، سول سەبەپتى ونداعان قوعامدىق جوبالاردا جۇمىس ىستەدى.
ول ۇسىناتىن بيزنەس-ەرەجەلەردىڭ ءبىرى: قالىپتاسقان نارىققا ەنىپ كەتۋ ءۇشىن بارلىعىن 30%-عا جاقسىراق جانە 30% ارزانىراق جاساۋ كەرەك.
ماtsusita Electric كومپانياسى ەشقاشان جاڭا ءونىم شىعارماعان. ول نارىقتا ۇلكەن سۇرانىسقا يە تاۋارلاردى جاقسارتۋعا جانە ارزانداتۋعا تىرىساتىن. ونىڭ ستراتەگياسى تۇتىنۋشىلاردىڭ قاجەتتىلىگىن مۇقيات ەسكەرۋ مەن وتكىزۋدىڭ جاڭا تەحنولوگياسىن ىزدەۋگە نەگىزدەلگەن.
كوپتەگەن ءالسىز ساتۋشىلار مەن كاسىپكەرلەر تاۋارلارىنىڭ سۋىق قابىلدانعانىنا قاتتى قىنجىلادى. ناعىز كاسىپكەر ەشقاشان «جوقتى» جەڭىلىس دەپ قاراستىرمايدى. ول ءۇشىن ءاربىر «جوق» ساتۋدىڭ بۇل ءادىسى جۇمىس ىستەمەيتىنىن جانە باسقا ءادىسىن ىزدەۋ كەرەكتىگىن بىلدىرەدى.
ءدال وسىلاي جاس كاسىپكەر كونوسۋكە ماسۋسيتا، جاڭا ءونىم جاساعان سوڭ ماركەتينگتىڭ ءداستۇرلى ادىستەرىنەن باس تارتتى، سەبەبى ونىڭ جاعدايىندا مۇنىڭ ءبارى جۇمىس ىستەمەدى. ول ماركەتينگكە شىعارماشىلىق جاعىنان قاراپ، ءوز ونىمدەرىن ساتۋدىڭ يننوۆاسيالىق، جاڭا جانە تابىستى ۇلگىسىن جاساپ شىعاردى.
1922 جىلى مەڭگەرىگىندە فوناريگى بار ۆەلوسيپەدتەر ساتىلا باستادى. اسەتيلەندى فونارلار قىمبات بولاتىن جانە ءاردايىم ۇستىنە قۇيىپ وتىرۋدى قاجەت ەتتى. ەلەكتروباتارەيالار بار-جوعى 2-3 ساعاتقا شىدايتىن.
ماسۋسيتا بۇدان ءوز بيزنەسىنە كومەكتەسەتىن جاڭا مۇمكىندىك كورەدى، وسىلايشا 3-4 اي تاجىريبەدەن كەيىن قۋاتى 30-50 ساعاتقا دەيىن جەتەتىن جاڭا بولشەكتى جاساپ شىعارادى.
ول جاڭا ءونىم جاقسى وتەتىنىنە سەنىمدى بولعان. الايدا ەلەكتر قۇرىلعىلاردى ساتاتىن ساۋداگەرلەر ونىڭ يننوۆاسيالىق باتارەياسىن قۋانا قابىلدامايدى. ولار مۇنى ساتىلمايدى دەپ ويلايدى.
سوندا ماسۋسيتا سول كەزدەرى ەرەكشە بولىپ كورىنگەن وتكىزۋ جۇيەسىن جاسايدى: ۆەلوسيپەد ديلەرلەرى ارقىلى. ۆەلوسيپەد ساتاتىن دۇكەندەر ونىڭ جاڭا ءونىمىن لايىقتى باعالايدى دەپ ۇمىتتەنەدى. ءبىراق وندا دا باتارەيالى فونارلاردى لاجسىزدان الادى.
الايدا ماسۋسيتا ءوزىنىڭ ەرەكشە بۇيىم جاساپ شىققانىنا سەنىممەن قاراپ، ونى ءارى قاراي شىعارۋدان باس تارتپايدى. ونىڭ فيرماسى اعىمداعى بارلىق قارجىلىق شىعىنداردى قىسقارتىپ، تۇسكەن پايدانىڭ ءبارىن وسى باتارەيانى نارىققا شىعارۋعا قۇيىلادى.
ەڭ الدىمەن ول وتكىزۋگە ءۇش ماماندى جۇمىسقا الادى. ولار وساكاداعى ۆەلوسيپەد ساتاتىن بارلىق دۇكەندەردى ارالاپ شىعادى.
ماسۋسيتا ساتۋشىلارعا ىڭعايلى شارتپەن وتكىزەدى: باتارەيالاردى الدىن-الا تولەمسىز ساتادى. مۇنداي جۇيە ول كەزدەرى جاڭا ەدى. ساتۋشىلار ەشتەڭەدەن ۇتىلمايتىن بولعاندىقتان بۇعان كەلىسەدى. دۇكەندەرىنە جانىپ تۇرعان لامپا قويىلادى، جانىندا ءونىمنىڭ بىرنەشە ءتۇرى كورسەتىلەدى. كوپ ۇزاماي دۇكەن يەلەرى بۇل ءونىمنىڭ جاقسى ءوتىپ جاتقانىن بايقايدى.
Panasonic فيرماسىنىڭ نەگىزىن قالاۋشى كەز كەلگەن ونەركاسىپتىڭ قۇنى ونىڭ ادامي فاكتورىنا تەڭ ەكەنىن ۇعادى. ادامي فاكتور لايىقتى تۇردە جۇمىلدىرىلماعان جانە باعىتتالماعان جاعدايدا كەز كەلگەن ۇيىم قۇلدىرايدى.
جاپون ۇلتتىق دىنىندە جاپونداردى جالپىۇلتتىق قىزىعۋشىلىق پەن وركەندەۋگە قاتىسى بارىن ۇعىندىراتىن يدەيالار بار.
ءوز وتانداستارىنىڭ وسى ۇلتتىق كوزقاراستارى مەن جاپون مەنەدجمەنتىنىڭ ەرەكشەلىكتەرىن پايدالانا وتىرىپ، كونوسۋكە ماسۋسيتا كومپانياسىنىڭ قىزمەتكەرلەرىنە ارنايى تاربيەلىك جۇيە جاساپ شىعارادى. بۇل جۇيەنىڭ مازمۇنى فيرمانىڭ وركەندەۋى مەن ءار قىزمەتكەردىڭ وركەندەۋى - جالپى ۇلتتىڭ وركەندەۋىنە اكەلەدى دەگەنگە سايادى. بۇل يدەيا فيرمالىق گيمنگە اينالىپ، جۇمىس كۇنىن باستاماس بۇرىن فيرمانىڭ جۇزدەگەن قىزمەتكەرى اڭقىتىپ ورىندايتىن بولعان.
1929 جىلى نيۋ-يوركتە بيرجا قۇلدىرايدى. ناتيجەسىندە باستالعان ۇلى توقىراۋ كوپ ۇزاماي جاپونياعا دا جەتەدى. قىزمەتكەرلەردى جاپپاي قىسقارتۋ ورىن الادى.
سوندا كونوسۋكە ماسۋسيتا كۇتپەگەن شەشىم قابىلدايدى: “ءبىز ەشكىمدى قىسقارتپايمىز! ەشكىمنىڭ اقشاسىن كەسپەيمىز! ەندى ءارقايسىمىز – ءبىر ءبۇتىن ەكەنىمىزدى ءتۇسىنۋىمىز كەرەك، جانە بيزنەس – بۇل ەڭ ماڭىزدىسى ەمەس! ونىمدەرىمىز نارىقتا تابىسقا جەتۋى ءۇشىن ءارقايسىمىز بار كۇشىمىزدى سالۋىمىز كەرەك ”.
كومپانيا وندىرىستىك شىعىندارىن قىسقارتادى، جانە ءبىراز ۋاقىت جۇمىستارى بۇرىنعىداي جاقسى جۇرەدى. الايدا كەيىن ساتىلىمدارى جارتىلاي قىسقارادى.
ءبىراق ماسۋسيتا نارىق تالاپتارى مەن كوپتىڭ پىكىرىنە قارسى ارەكەت ەتەدى: “ءونىدىرىستى دەرەۋ جارتىعا قىسقارتامىز، ءدال بۇگىننەن باستاپ، ءبىراق ەشكىمدى جۇمىستان شىعارمايمىز، - دەيدى ول. – جۇمىستان شىققان قىزمەتكەرلەردىڭ ەسەبىنەن ەمەس، قىسقارتىلعان جۇمىس كۇندەرىنىڭ ەسەبىنەن ءوندىرىستى قىسقارتامىز. ولار جۇمىسى ءۇشىن بۇرىنعىداي جالاقى الاتىن بولادى. الايدا بارلىق مەرەكەلىك كۇندەر الىنادى. قويمادا جاتقان ارتىق تاۋالاردى قىزمەتكەرلەردىڭ وزىنە ساتۋىنا تاپسىرامىز”.
جۇمىسشىلار مەن قىزمەتكەرلەر اسىر سالادى. ولار ماسۋسيتانى ءپىر تۇتادى. ەندى ءارقايسى كۇنىنە بىرنەشە ساعاتىن ءوز فيرماسىنىڭ ونىمدەرىن ساتۋعا ارنايدى. ءوندىرىس ەكى ەسەگە قىسقارعاندىقتان، كوپ ۇزاماي قويماداعى بار تاۋار ساتىلادى.
باسەكەلەستەرى جاپپاي قىسقارتۋ جۇرگىزىپ، ساۋدالارى جۇرمەي جاتقاندا Matsushita Electric بارلىق قىزمەتكەرلەرىن ساقتاپ قالىپ، ءتىپتى ءوز ونىمدەرىن ديۆەرسيفيكاسيالاۋعا كوشەدى. ەندى ولار راديوتاۋارلارىن شىعارۋعا كىرىسەدى.
You Might Also Like
-
كوزگە كورىنبەيتىن باكتەريالار، ميكروسكوپتىق ازعالار بىزبەن بىرگە ميلليونداعان جىل بويى ءومىر ءسۇرىپ كەلەدى. جەر بەتىندە پايدا بولعان تۇڭعىش كۇردەلى ميكرواعزا – وسىلار دەيدى عالىمدار. جانە وسى م...
