InfoHub Logo

كوزگە كورىنبەيتىن باكتەريالار، ميكروسكوپتىق ازعالار بىزبەن بىرگە ميلليونداعان جىل بويى ءومىر ءسۇرىپ كەلەدى. جەر بەتىندە پايدا بولعان تۇڭعىش كۇردەلى ميكرواعزا – وسىلار دەيدى عالىمدار. جانە وسى ميكرواعزالاردىڭ ەڭ ۇلكەن بولىگى بارىنشا ادامعا جاقىن ءومىر سۇرۋگە تىرىسادى: ءبىزدىڭ دەنەمىز ولارعا قولايلى ورتا جاساپ بەرە الادى. ۇيىڭىزدە ءومىر ءسۇرۋى مۇمكىن بەس جاعىمسىز باكتەريامەن تانىس بولىڭىز. 

شاڭ كەنەسى
مەكەندەيتىن ورنى: توسەك

كوزگە كورىنبەيتىن، جيىركەنىشتى پارازيت سىزبەن ىرگەلەس ءومىر سۇرەدى: جاستىقتار، كورپەلەر، ماتراس – ستاتيستيكا بويىنشا ءار توسەك شاڭ كەنەسىنىڭ ناعىز ورداسى. مۇندا ولار ميلليونداپ جۇرەدى. ىلعالدىلىق پەن قاپىرىق بۇلاردىڭ كوبەيۋىنە اتسالىسادى. ولاردىڭ الدىن الۋ ءۇشىن ءۇيدى ءجيى جەلدەتىپ، كورپە-جاستىقتى ءجيى اۋىستىرىڭىز. 

قارا زەڭ 
مەكەندەيتىن ورنى: قابىرعالار 

بۇل جاعىمسىز كورشىنىڭ عىلىمي اتاۋى — Aspergillus niger، كوبىنە توبەنىڭ استىندا (پوتولوكتا)، نەمەسە ءتۇسقاعازدىڭ (وبوي) ارتىندا بولاتىن قارا زەڭ. قارا زەڭ كوپتەگەن اللەرگيالىق رەاكسيالاردى تۋدىرۋى مۇمكىن: ەگەر قىس كەزىندە دە اللەرگياعا ۇشىراپ جۇرسەڭىز – پاتەرىڭىزدى مۇقيات تەكسەرىڭىز. ەڭ دۇرىسى قابىرعانى ارنايى انتيسەپتيكالىق تەگىستەۋمەن بوياۋ. 

زەڭ (گريبوك)
مەكەندەيتىن ورنى: ءۇي شاركەسى 

بۇكىلالەمدىك دەنساۋلىق ساقتاۋ ۇيىمىنىڭ دابىل قاعىپ جاتقانىنا كوپ بولدى: ستاتيستيكالىق مالىمەتتەرگە سۇيەنسەك، جەر بەتىندەگى ءار بەسىنشى ادام زەڭ اۋرۋىنا شالدىعادى ەكەن. نەگىزىندە، زەڭنىڭ بولشەكتەرى ءار ءۇي شاركەسىندە بار، ونىمەن اۋىرىپ قالماۋعا تەك جاقسى يممۋنيتەت كەدەرگى بولا الادى. اياق كيىمىڭىزدى ءار ەكى اي سايىن اۋىستىرىپ وتىرىڭىز نەمەسە جۋىڭىز – زەڭ جوعارى تەمپەراتۋرادان قورقادى. 

ىشەك تاياقشاسى 
مەكەندەيتىن ورنى: كىلەم 

ىشەك تاياقشاسى تاعام ونىمدەرىندە عانا ەمەس، كىلەمدەردە دە ءومىر ءسۇرۋدى جاقسى كورەدى ەكەن. ولاردان قۇتىلۋ مۇمكىن ەمەس، ودانشا ەسكى كىلەمدەردەن قۇتىلىپ وتىرعان ءجون. ەگەر كىلەمسىز ءومىر ءسۇرۋ مۇمكىن ەمەس بولسا – قىسقا تۇكتىلەرىن تاڭداڭىز: ولاردى انتيباكتەريالدى سۋسابىندارمەن جۋۋعا بولادى.

باكتەريالار وتارى 
مەكەندەيتىن ورنى: توسەك-ورىن تىسى 

توسەك-ورىن تىسى تەز كىرلەيتىندەردىڭ قاتارىنان ەكەنىن جاقسى بىلەسىز. توسەك-ورىن تىسىندا باكتەريالار كوبەيۋى ءۇشىن ەكى ءتۇن جەتكىلىكتى. ولار ءسىزدىڭ دەنەڭىزدەن بولىنەتىن تەردى باي قورەك ورتا دەپ بىلەدى. توسەك-ورىن تىسىن اپتاسىنا كەم دەگەندە ءبىر رەت اۋىستىرىپ وتىرۋ قاجەت. ونى توسەمەس بۇرىن ۇتىكتەۋ دە ميكرواعزالاردى ولتىرۋگە مۇمكىندىك بەرەدى. 

---