InfoHub Logo

قازىرگى كەزدە اقپارات كولەمى مەن ونىڭ قولجەتىمدىلىگى دەڭگەيىنىڭ جوعارىلىعى سونداي، كۇن سايىن بىزگە بەلگىلى بولىپ جاتقاندى ەستە ساقتاپ قالۋ مۇمكىن ەمەس. ال ەگەر بۇعان بۇگىنگى ادامنىڭ جۇمىسباستىلىعىن جانە ول اتقارۋى ءتيىس ىستەردىڭ وتە كوپ بولاتىنىن قوسساق، كەرەكتى مەزەتتە جادىمىزدىڭ قۋىس-قىرتىستارىنان قانداي ءبىر اقپاراتتى «سۋىرىپ الۋ» وڭايعا سوقپايدى. مىنە، وسى ءۇشىن ادامداردىڭ كوپشىلىگى وقۋىندا، جۇمىسىندا، بيزنەستە جانە كۇيبەڭ تىرشىلىككە تولى كۇندەلىكتى ومىردە كۇندەلىكتەردى پايدالانادى. الايدا، كۇندەلىكتەردى پايدالانۋ وڭدى ناتيجە بەرىپ، تىرلىكتى وڭايلاتۋى ءۇشىن، ولاردى دۇرىس راسىمدەي ءبىلۋ قاجەت. ەندى ولاردى قالاي راسىمدەۋگە بولاتىنىن قاراستىرىپ كورەيىك.  

كۇندەلىكتەر جايىنداعى جالپى ماعلۇمات

ءسىزدىڭ كۇندەلىگىڭىزدىڭ جالپى العاندا اڭىسى قانداي بولاتىنىنان باستاعان ابزال. كۇندەلىكتىڭ ىشكى جاعىنىڭ عانا ەمەس، سىرتقى جاعىنىڭ دا قالاي ارلەنىپ-راسىمدەلەتىنى وسىعان بايلانىستى. بۇلاي بولاتىن سەبەبى سىزگە بۇل كۇرالدى پايدالانۋ بارىنشا ىڭعايلى بولۋى ءتيىس. اسىرەسە سىزگە كۇندەلىك جازىپ وتىرۋ ۇناۋى ءتيىس، وسى ۇدەرىستەن ءلاززات الىپ، بۇل ءسىزدىڭ ەرمەك ءىسىڭىز بولىپ كەتۋى كەرەك.  

قازىرگى كەزدە كوپتەگەن وندىرۋشىلەردىڭ كۇندەلىكتەردى راسىمدەۋدىڭ ءار-الۋان يدەيالارىن كورۋگە بولادى. سوندىقتان، ءوزىڭىزدىڭ تالاپ-تىلەكتەرىڭىزگە ساي بولاتىن كۇندەلىكتى تاڭداپ الۋعا بولادى. كۇندەلىكتەردىڭ بارلىق تۇرلەرىن ءبىز تىزبەكتەپ شىقپايمىز، تەك ەڭ كوپ تارالعان تۇرلەرىن ايتىپ شىعامىز:  

◎ قاراپايىم كۇندەلىك. بۇنداي كۇندەلىك رەتىندە ءار كۇنگە ارنالعان تىرلىكتەر جوسپارىن جازىپ وتىرۋعا ورىن بار كادىمگى بلوكنوت جاراپ جاتىر. كۇندەلىكتىڭ بۇل ءتۇرىن ادامداردىڭ كوبى پايدالانادى، ويتكەنى وعان جازبالاردى ءتۇرتىپ وتىرۋعا، كەرەكتى نارسەلەردى بەلگىلەپ وتىرۋعا، اتاۋلى كۇندەردى جانە كەزدەسۋ ۋاقىتتارىن بەلگىلەپ وتىرۋعا، تۋعان كۇندەردى، تەلەفون نومەرلەرىن، مەكەنجايلاردى جانە باسقا دەرەكتەردى جازىپ قويۋعا ىڭعايلى. قاراپايىم كۇندەلىكتى ادام ءوزى ويلاپ تاباتىن جۇيە بويىنشا تولتىرىپ جۇرەدى.    

◎ جەكە (وزىڭىزگە ارنالعان) كۇندەلىك. ونى كۇندەلىك دەۋگە بولادى، ويتكەنى ول ەڭ اۋەلى ەموسيونالدىق تۇرعىداعى شيرىققان كوڭىلدى ورنىنا تۇسىرۋگە، الاڭداتىپ جۇرگەن ويلاردى قاعازعا «توگۋگە» ارنالعان. پسيحوتەراپيەۆتەر مەن پسيحولوگتار، اسىرەسە ارتىق سەزىمگە، قورقىنىشقا، ۋايىمعا، نەگاتيۆتى ويلارعا بەرىلگىش ادامدارعا، وسىنداي كۇندەلىكتەردى جازۋعا كەڭەس بەرەدى. بۇنىڭ وڭدى ناتيجەسى شىنىمەن-اق بار — بۇنداي «پراكتيكادان» سوڭ ادام ارقانى كەڭگە سالىپ، جەڭىلدەپ قالادى، ءوزىنىڭ پسيحولوگيالىق كۇيىن جاقسارتادى. جەكە كۇندەلىكتەر، كوبىنەسە، ەركىن فورمادا جازىلىپ وتىرادى.  

◎ بيزنەس-كۇندەلىك. بۇل بيزنەسمەندەرگە، ىسكەر كىسىلەرگە، گرافيگىندە بوس ۋاقىت از ادامدارعا ارنالعان. بيزنەس-كۇندەلىك تىرلىك-قامداردى رەتتەستىرىپ، ەشتەڭەنى ۇمىتپاۋعا، ماڭىزدى اقپاراتتىڭ كوزدەن تاسادا قالماۋىنا سەپتەسەدى. ول ناقتى رەتتەستىرىلىپ (قۇرىلىمدالىپ)، ۋاقىت ارالىعى: ساعات، كۇن، اپتا، اي جىل رەتىندە انىق جازىلۋى ءتيىس. ادامنىڭ جۇمىسىنداعى ناتيجەلەرى مەن جەتىستىكتەرى كۇندەلىكتىڭ ۇيىمداستىرىلۋىنا ەداۋىر بايلانىستى.  

◎ ەلەكتروندى كۇندەلىك. بۇعان ءار الۋان كومپيۋتەرلىك قوسىمشالار مەن باعدارلامالار جاتادى، ءبىراق كەيىنگى كەزدەرى سمارتفوندار مەن پلانشەتتەرگە ارنالعان ۋتيليتالار دا كوپتەپ شىعا باستادى. ەلەكتروندى كۇندەلىكتەر وتە-موتە قولايلى، دىبىستىق حابارلامالارى ت.ب. باپتاپ قويۋعا بولاتىن پايدالى فۋنكسيالارى وتە كوپ. بەلسەندى ءومىر سالتىن ۇستاناتىندار مەن ۇتقىر قۇرىلعىلاردىڭ ءقادىرىن بىەتىندەر ءۇشىن ولار تاپتىرمايتىن كۇندەلىك ءتۇرى بولماق.  

ال جالپى ايتىپ وتەر بولساق، قازىرگى تاڭدا كۇندەلىكتەردىڭ مول مولشەرىن، ولاردىڭ ىشىندە تار سالاعا — «پايدالانۋشىلاردىڭ» بەلگىلى ءبىر ماقساتتارىنا عانا ارنالعان كۇندەلىكتەردى كورۋگە بولادى. ءبىز ولاردىڭ ءبارىن سيپاتتاپ وتىرمايمىز — دۇكەندەرگە بارىپ، سورەلەردە نە تۇرعانىن ءبىر شولىپ شىقساڭىز جەتكىلىكتى.   

ءسىزدىڭ قاجەتىڭىزگە جاراۋى مۇمكىن كۇندەلىكتەردى راسىمدەۋدىڭ بىرنەشە يدەياسىن قاراستىرايىق.  

كۇندەلىك بەتتەرىن راسىمدەۋدىڭ ءۇش جاقسى يدەياسى

تومەندە ۇسىنىلىپ وتىرعان يدەيالاردى كۇندەلىكتەردىڭ كەز كەلگەن ءتۇرى ءۇشىن پايدالانا الاسىز. بىلايشا ايتقاندا قاعاز بەن قالام بولسا بولدى، ولاردى قولدانۋعا بولادى، ءبىراق ءبىز كۇندەلىكتەردى پايدالانۋعا كەڭەس بەرەمىز، ويتكەنى، بىرىنشىدەن، قوبىراتىپ پاراقتاردى تاسىپ جۇرمەيسىز، ەكىنشىدەن، جۇيەنى مەڭگەرىپ العان سوڭ، ءسىز كۇندەلىگىڭىزدى ىستەردى جۇرگىزۋ مەن ماقساتتارعا جەتۋدەگى پارمەندى كومەكشىڭىزگە اينالدىراسىز.  

دۋايت ەيزەنحاۋەر جۇيەسى بويىنشا تۇزىلەتىن كۇندەلىك

ءسىز ەيزەنحاۋەر ماتريساسىمەن — تايم-مەنەدجمەنت تەحنيكالارىنا قىزىعۋشىلىق تانىتاتىن كوپتەگەن ادامدار پايداسىنا جاراتىپ جۇرگەن جوسپارلاۋ قۇرالىمەن تانىس شىعارسىز. ەيزەنحاۋەردىڭ اقش-نىڭ 34-پرەزيدەنتى بولعانىن جانە ىستەلەتىن تىرلىكتەردى دۇرىستاپ ءبولۋ جايى ول ءۇشىن اسا تولعاقتى ماسەلەلەردىڭ ءبىرى بولعانىن ەسكە سالا كەتەيىك.   

ءادىستىڭ ءمانى ءوز ىستەرىڭە بەرىلەتىن باسىمدىقتى دۇرىستاپ بەلگىلەۋگە سايادى. بەرەكەسىز ادامنىڭ كوپ ۋاقىتى بولماشى ىستەرگە كەتىپ، ماڭىزدى دا ءماندى شارۋالارى ىسكە اسپاي قالىپ جاتادى. ونىڭ جەكە باسىنىڭ تىندىرىمدىلىعى ماردىمسىز. ءبىراق ماتريسانى قولدانۋ ارقىلى ونى جوعارىلاتۋعا بولادى.   

ول بويىنشا ماقسات-مىندەتتەر ەشقاشان دەرلىك تەك قانا ماڭىزدىلار بولا بەرمەيدى، ال ماڭىزدىلارى — تەك قاۋىرت بولا بەرمەيدى. شارۋالاردىڭ ءتورت ساناتى بار:  

◎ ماڭىزدى جانە قاۋىرت شارۋالار (ولاردى ءدال ءقازىر تىندىرۋ قاجەت)؛

◎ ماڭىزدى، ءبىراق قاۋىرت ەمەس شارۋالار (ولارعا نەگىزگى ۋاقىتتى جۇمساۋ قاجەت)؛  

◎ ماڭىزدى ەمەس جانە قاۋىرت شارۋالار (ولاردى باسقا ادامدارعا تاپسىرۋعان ءجون)؛  

◎ ماڭىزدى ەمەس جانە قاۋىرت ەمەس شارۋالار (ولارعا مۇلدەم ۋاقىتتى شىعىنداماعان ابزال).  

ەيزەنحاۋەر ماتريساسىن العاش رەت قولدانۋشىلارعا شارۋالاردى دۇرىس جىكتەمەلەۋ مەن ولاردى ءتورت ساناتقا — ماتريسا كۆادرانتتارىنا ءبولۋ ۇدەرىسى ەڭ كوپ قيىندىق تۋدىرىپ جاتادى. ونىڭ كورىنىسى مىنانداي بولادى: 

كەي كىسىلەر بەلگىلى ءبىر شارۋالارىنا باسىمدىق بەرۋ ءۇشىن ارنايى تەحنيكالاردى پايدالانادى، ءبىراق كوپشىلىك بۇنى ءينتۋيتيۆتى تۇردە ىستەيدى. بلوكنوت پاراقتارى سۋرەتتەگىدەي شارشىلارعا ءبولىنىپ، كۇن سايىن شارۋالار شارشىلارعا ۇلەستىرىلىپ جازىلادى. ساناتى جوعارى شارۋالاردى (A، B جانە C) ورىنداماي تۇرىپ تومەن ساناتتى شارۋالاردى (B، C جانە D) باستاۋعا بولمايدى.   

ەيزەنحاۋەر ماتريساسى شارۋالاردى جوسپارلاۋدىڭ باسقا دا ادىستەرىنىڭ پايدا بولۋىنا، مىسالى، ستيۆەن كوۆيدىڭ ادىستەمەسىنىڭ پايدا بولۋىنا سەبەپ بولدى. سونداي-اق ونى Bullet Jornal كۇندەلىگىن جازۋدا دا پايدالانۋعا بولادى. بۇلار جايىندا ەندى ايتىپ بەرەمىز. 

ستيۆەن كوۆي جۇيەسى بويىنشا تۇزىلەتىن كۇندەلىك

ستيۆەن كوۆي زامانىمىزدىڭ ەڭ تابىستى موتيۆاسيالىق وراتورلارىنىڭ، جازۋشىلارىنىڭ جانە تايم-مەنەدجمەنت جونىندەگى ماماندارىنىڭ ءبىرى بولدى. ونىڭ كىتاپتارىنىڭ كوبى بەستسەللەرلەرگە اينالىپ، ءالى كۇنگە دەيىن دۇنيە جۇزىندە كوپ-كوپ تارالىممەن شىعارىلىپ جاتىر. كوۆيدىڭ ءوزى بولسا، «Forbes» جۋرنالىنىڭ پىكىرىنشە امەريكانىڭ ەڭ ىقپالدى 25 ادامىنىڭ ىشىنە كىردى.  

بۇل كىسىنىڭ ەڭبەگىن كوپتەگەن كورپوراسيالار قىزمەتكەرلەرىنە ۋاقىتتى ۇتىمدى پايدالانۋدىڭ نەگىزدەرىن جانە جەكە باس تىندىرىمدىلىعىن ارتتىرۋدى ۇيرەتۋدە پايدالانىپ ءجۇر. بۇل جەردەگى قۇرالداردىڭ ءبىرى كوۆيدىڭ «جاسامپاز جانداردىڭ جەتى داعدىسى» كىتابىندا ايتىلعان قاعيداتتارعا سايكەس كەلەتىن كۇندەلىك بولىپ تابىلادى.  

كادىمگى كۇندەلىكتىڭ ءوزى كوپتەگەن پايدالى فۋنكسيالارى بار كاسىبي جوسپارلاۋىشقا (ورگانايزەردىڭ فۋنكسيالارى ارتقان نۇسقاسى) اينالادى. ول بيزمەنمەندەرگە جانە بۇكىل شارۋالارى مەن ماقسات-مىندەتتەرىن رەت-رەتىمەن اتقارىپ، باقىلاۋىندا ۇستاۋدى قالايتىن؛ ۋاقىت رەسۋرسىنىڭ ءقادىرىن بىلەتىن ادامداردىڭ يگىلىگىنە جارايدى.

كوۆي جۇيەسى بويىنشا تۇزىلگەن كۇندەلىك ەكى بولىكتەن: نەگىزگى بولىكتەن جانە قوسىمشادان قۇرالادى. نەگىزگى بولىگى — بۇل كۇندەلىكتى جوسپارلاردى جاساۋعا ارنالىپ سىزىلعان بەتتەر. وندا مۇمكىندىگىنشە تەز ورىندالۋى نەمەسە ءدال بەلگىلەنگەن ۋاقىتىندا ىستەلۋى ءتيىس شارۋالار جازىلادى. ەكىنشى قوسىمشا نەگىزگى ماقساتتار، سونداي-اق ادامنىڭ قۇندىلىقتارى (وعان ارنايى ورىن بولىنەدى) جازىلاتىن اپتا سايىنعى جانە اي سايىنعى جازبالارعا ارنالادى. 

تاپسىرمالاردى، شارۋالاردى جانە ماقساتتاردى ناقتى-ناقتى بەلگىلەپ، باسىمدىلىعىن ايقىنداۋ (ءقازىر نە ىستەۋ كەرەك، نەنى — ەرتەڭ، نەنى — كەلەسى ايدا ت.ب. ىستەۋ كەرەك) ارقاسىندا ستيۆەن كوۆي جۇيەسى بويىنشا تۇزىلگەن كۇندەلىك ادامعا تىندىرىمدى بولۋعا سەپتىگىن تيگىزەدى. ونى پايدالانىپ، كۇن سايىنعى جانە اپتا سايىنعى جوسپارلاۋمەن عانا ەمەس، تابىسقا جەتەلەپ، ماقساتقا جەتكىزەتىن جاھاندىق جوسپارلاردى دا جاساۋمەن اينالىسۋعا بولادى.

گلەب ارحانگەلسكيي جۇيەسى بويىنشا تۇزىلگەن كۇندەلىك

بۇل كۇندەلىك تايم-مەنەدجمەنت سالاسىنداعى رەسەيلىك مامان گلەب ارحانگەلسكييدىڭ اۆتورلىق تۋىندىسى. ادىستەمە قازىرگى تاڭداعى ەڭ تيىمدىلەردىڭ ءبىرى.

ءىس-تاپسىرمالار ءبىرىنشى كەزەكتەگىلەر مەن ەكىنشى كەزەكتەگىلەرگە بولىنگەندىكتەن كۇندەلىكناقتى-ناقتى قۇرىلىمدالعان. بۇل ونىڭ جالعىز ەرەكشەلىگى ەمەس — ونىڭ تاعى ءبىر ەرەكشەلىگى وسى قۇرالمەن جۇمىس ىستەۋدىڭ وتە قىزىقتىلىعىندا. ول ءۇشىن اۆتور كۇندەلىك بەتتەرىنە ءارتۇرلى كۇندەلىكتى شارۋالاردى كۇلكىلى، ءبىراق ناقتى ءارى ءبارى قامتىلعان فورمادا جازىپ قويعان.   

سونداي-اق، ءاربىر بەتتە سول كۇنى بولاتىن وقيعالارعا ارنالعان ورىن بار (ول ورىندى ءوزىڭىز بەلگىلەيسىز). سوندا، قارابايىر تىرلىكتەرمەن قاتار، جوسپارلار مەن وقيعالاردى جادىڭىزدا جاڭعىرتىپ، سونىمەن بىرگە كوڭىلىڭىزدى ءبىر كوتەرىپ قويۋ ءۇشىن كوز جۇگىرتىپ تۇرۋعا بولاتىن جەكە كۇندەلىكتى دە جاساپ وتىراسىز.  

بۇعان قوسا، كۇندەلىكتە «سىيلىق» بەلگىسى تاڭبالانعان «ارالىق شاتتىق» بار، وندا دوستارمەن كەزدەسۋ، كينوعا بارۋ، دۇكەن ارالاۋ جانە باسقا كۇندەلىكتى جانعا جايلى كوڭىل كوتەرۋ شارالارىنا ارنالعان ۋاقىتتى ەنگىزىپ قويۋعا ىڭعايلى. كۇندەلىكتى پايدالانۋشى نازارىن باسقاعا اۋدارماۋى ءۇشىن بۇل باعان بەتتىڭ تومەنگى جاعىنا جايعاستىرىلعان.  

ارحانگەلسكيي كۇندەلىگى ۇدايى تۇزەتىلىپ، جاقسارتىلىپ وتىرادى جانە ونىڭ بىرنەشە نۇسقاسىن تابۋعا بولادى. تانىسىپ شىعۋ ءۇشىن ونىڭ بەتتەرىن ءتۇزۋدىڭ ءبىر مىسالىن كورەيىك:

بايقاعاندارىڭىزداي، بەتتىڭ جوعارى جاعىندا «باقا» جانە «ءپىل» گرافالارى بار. بۇل تىرشىلىك يەلەرى تايم-مەنەدجمەنتتىڭ كلاسسيكاسى بولىپ كەتتى: باقالارعا تەزىرەك شەشىمىن تاۋىپ، ءبىر جاقتى بولۋى قاجەت ۇساق، سونشالىقتى قىزىقتى ەمەس جانە جاعىمدى ەمەس شارۋالار جاتادى (بۇل باقالاردى «جەپ قويۋ» كەرەك). ال پىلدەر — بۇل كۇردەلى جانە اۋقىمدى ءىس-شارۋالار. ءپىلدى «جەۋ» ءۇشىن ونى كىشكەنتاي تۇيىرلەرگە «تۋراپ» تاستاۋ، ياعني ۇلكەن ءبىر شارۋانى بىرنەشە كىشكەنتايعا بولشەكتەۋ قاجەت.

«قاتاڭ كەزدەسۋلەر» باعانىنا كەلسەك، ول جەرگە تەك جۇزدەسۋلەردى عانا ەمەس، بەلگىلى ءبىر ۋاقىتتا اياقتالۋى ءتيىس شارۋالاردى دا ءتۇرتىپ قويۋعا بولادى. ال «جۇمساق ءىس-تاپسىرمالار» باعانىنا قاتاڭ كەزدەسۋلەر مەن شارۋالاردان بوس كەزدە اتقارۋعا بولاتىنداردىڭ ءبارى جاتادى.    

كەشكە قاراي اتقارىلعان ءىستىڭ ءبارىن قاراپ شىعىپ، ەڭ ماڭىزدىلارى مەن جاعىمدىلارىن تاڭداپ الىپ، گرافالاردىڭ تۇسىنا «كۇن» بەلگىسىن قويۋ كەرەك. اي اياقتالعان كەزدە قانداي جۇمىس كولەمى اتقارىلعانىن كورۋ ءۇشىن جازبالارىڭىزدى قاراپ شىعۋعا وتە ىڭعايلى. بۇل گرافا باسىمدىلىق قانشالىقتى دۇرىس بەرىلىپ جاتقانىن جانە قانداي شارۋالار ەڭ ماڭىزدى بولعانىن وتە جاقسى كورسەتىپ بەرەدى.

تاعى ءبىر ايتارلىعى: ءار بەتتىڭ تومەنگى جاعىندا بيزنەس جانە ۋاقىتتى پايدالانۋ جونىندەگى اقىل-كەڭەستەر بار. بارلىعى 365 اقىل بار، ياعني ءار كۇنگە ارنالعان ءبىر كەڭەس بار. ولاردى جۇمىستا جانە بيزنەستە (وقۋدا دا) پايدالانۋعا بولادى. بۇل كۇندەلىكتى وتە ۇتىمدى جانە قىزىقتى كۇرال ەتەدى.

جوعارىدا ايتىلعاندارعا قوسا ايتپاعىمىز — سىزگە مىندەتتى تۇردە جوعارىدا ايتىلىپ وتكەن كۇندەلىكتەردىڭ بىرەۋىن ساتىپ الۋعا دۇكەنگە قاراي شابا جونەلۋدىڭ قاجەتى جوق. ءسىز كۇندەلىك بەتتەرىن ءتۇزۋ يدەيالارىن كەز كەلگەن كۇندەلىككە، ءتىپتى قولدان جاسالعان كۇندەلىككە دە، قولدانا الاسىز. بىلايشا ايتقاندا، جوسپارلاۋ جانە ۋاقىتىڭىزدى ءتيىمدى پايدالانۋ قۇرالىن قولعا ءتۇسىرۋ ءۇشىن كوپ اقشا شىعىنداماسا دا بولادى.  ەگەر ءسىز ازداعان ەپتىلىگىڭىز بەن قيالىڭىزدى قولدانۋعا جانە قىزعىلىقتى ەرمەككە از عانا ۋاقىتىڭىزدى ارناۋعا دايىن بولساڭىز، سىزگە كۇندەلىكتى قولدان جاساپ الۋدى ۇسىنامىز. بىزگە سەنىڭىز، بۇنىڭ ەشقانداي قيىندىعى جوق. بۇل شارۋا بالالارمەر بىرگە ۋاقىتتى جاقسى وتكىزۋگە دە جاراپ تۇر.  

ءوز قولىڭىزدان شىققان كۇندەلىك

كۇندەلىكتى (ونىڭ ىشىندە Bullet Journal كۇندەلىگىن دە) ءوز قولىڭىزبەن جاساپ الۋ مەن راسىمدەۋدىڭ قيىندىعى جوق. الدىن الا كەڭسەلىك زاتتاردى: ءتۇرلى-تۇستى قارىنداشتاردى نەمەسە ماركەرلەردى، كارتوندى، ۆاتماندى، اق جانە ءتۇرلى-تۇستى قاعاز پاراقتارىن، جەلىمدى، ەكى جاعى دا جابىسقاق سكوچتى دايىنداپ الىپ، كۇندەلىكتىڭ سىرتقى جانە ىشكى جاعى قالاي جاسالاتىنىن جاقسىلاپ ويلاستىرساڭىز جەتىپ جاتىر. تاعى نە قاجەت بولاتىنىن وقىپ كورەيىك.  

كۇندەلىكتىڭ سىرتقى جاعى

كۇندەلىكتىڭ سىرتى  —  بۇل ونىڭ بەت-جۇزى، سوندىقتان ونى ساۋاتتى ءارى دۇرىس جاساۋ قاجەت. جاساۋ باراسىندا البومدىق نەمەسە بلوكنوتتىق پىشىمدەگى (فورمات) دايىن ۇلگىلەردى (ولاردى كەڭسە زاتتارى دۇكەندەرىنەن، ينتەرنەتتەن جۇكتەپ الۋعا نەمەسە باسپاحانادان تاپسىرىس بەرۋ ارقىلى الۋعا بولادى) پايدالانۋعا نەمەسە ءوزىڭىز جاساعان ءتۇرىن نەگىزگە الۋعا بولادى.  

كۇندەلىكتىڭ سىرتقى جاعىن راسىمدەگەن كەزدە ءار الۋان دەكوراتيۆتىك ماتەريالداردى قولدانىپ كورگەننىڭ پايداسى كوپ. مىسالى، ءتۇرلى-تۇستى كارتون الىپ، ودان ويۋلار قيۋعا جانە ولاردان بۇيىمىڭىزعا ءار بەرەتىن اپپليكاسيا تۇزۋگە بولادى. ال قىزدارعا مونشاق تاستارىن پايدالانىپ كورۋگە كەڭەس بەرەمىز — ول ورنەكتەر مەن كەسكىندەردى (سىزباسى بويىنشا) سالۋعا وتە جاقسى. ەگەر مونشاقتان گەومەتريالىق ورنەك نەمەسە ەتنيكالىق ستيلدەگى ورنەك سالىنسا، ەرلەردىڭ كۇندەلىكتەرى دە وسىلاي بەزەندىرىلۋى مۇمكىن.

ايتپاقشى، ۆينتاج ستيلىندە جاسالاتىن كۇندەلىكتەر تاماشا شىعادى. ەگەر ءسىز قارا، سۇر جانە قوڭىر تۇستەردى بەلگىلى ءبىر ستيل بويىنشا ۇيلەستىرسەڭىز، سىرتقى كورىنىسى كەرەمەت بولىپ شىعادى. دەگەنمەن، مونشاقتى عانا قولدانىپ قويماڭىز — دەرمانتيندى، جاساندى تەرىنى نەمەسە باسقا ءبىر جاساندى ماتەريالدى پايدالانىڭىز (تابيعي بىلعارىنى پايدالانۋعا ەشكىم تىيىم سالىپ جاتقان جوق، تەك ول كادىمگىدەي قىمباتقا تۇسەدى).

كۇندەلىك سىرتىن راسىمدەۋدەگى ماڭىزدىلىعى ءبىر مىسقال دا كەم ەمەس بولىگى — ول بەكىتپە ىلگەگى. قازىرگى تاڭدا ولاردىڭ ءتۇر-تۇرى كوپ: سىدىرما، تويتارما، باۋ، شىرتىلداق، تۇيمە جانە باسقالارى بار. بۇل تۇستا ەشقانداي شەكتەۋ جوق جانە ءبارى ءسىزدىڭ كوڭىلىڭىزدىڭ جۇيرىكتىگىنە، كۇندەلىكتىڭ قانداي بولعانىن قالاعانىڭىزعا جانە تاڭداعان ستيلگە سايكەسۋىنە بايلانىستى.  

كۇندەلىك ءتيپىن، ونى باستاۋداعى ماقساتىڭىزدى (جۇمىس، كەزدەسۋلەر، جەكە جازبالار جانە ت.ب.) جانە ءپىشىمىن (فورمات) ايقىنداپ الىڭىز. ءدال وسىدان باستاعان ابزال جانە وسى قاعيدا سىرتىن عانا ەمەس، ءسىزدىڭ ورگانايزەرىڭىزدىڭ، پلاننەرىڭىزدىڭ نەمەسە كۇندەلىگىڭىزدىڭ ءىشىن راسىمدەۋگە دە قاتىستى.

كۇندەلىكتىڭ ىشكى جاعى

كۇندەلىكتتىڭ ىشكى جاعىمەن اينالىسۋ سىرتىمەن اينالىسقاننان دا قىزىق. ونى جەتەكشى جاعى دەۋگە بولادى، ويتكەنى ول بۇل قۇرالمەن جۇمىس ىستەۋدەگى ىڭعايلىلىق پەن جايلىلىققا، سونداي-اق الاتىن ءلاززاتقا جانە، البەتتە، جەكە باس تىندىرىمدىلىعىنا اسەر ەتەدى. ماڭىزدى ەكى نارسەگە نازار اۋدارعان ابزال — بۇل كۇندەلىكتىڭ بەتتەرى مەن ولارعا كەرەكتى بەلگىلەردىڭ جازىلىپ-سىزىلۋى.

بەتتەردىڭ ساپاسى، سونىمەن قاتار ولاردىڭ قانداي تۇسپەن ارلەنەتىنى ەرەكشە مانگە يە. اسا قانىق جانە جارقىن تۇستەردى پايدالانباي-اق قويعان دۇرىس، ويتكەنى ولارمەن جۇمىس ىستەۋ ىڭعايسىزدىق تۋدىرادى — ولار جازۋدى كورۋدى قيىنداتادى (سوسىن كورۋ اپپاراتىنا قاجەتسىز ارتىق كۇش تۇسىرەدى). سوندىقتان، بەتتەر كوز قارىمايتىن، جۇمساق جانە كوزگە ۇيرەنشىكتى رەڭدە بولۋى ءتيىس. جۇمساق (پاستەلدىك) رەڭكتەردى پايدالانىپ كورىڭىز — ولار كوزدى تالدىرمايدى (ونىڭ ۇستىنە ولاردىڭ انتيسترەسستىك اسەرى دە بار).

ەندى كۇندەلىك بەتتەرىن قالاي «شيمايلايتىنىمىز» جايىندا بىرەر ءسوز. كۇندەلىكتى راسىمدەۋدەگى نەگىزگى قاعيداتتاردىڭ ءبىرى — ول بەتتەرىن نومىرلەپ شىعۋ. ەگەر بەتتەرى نومىرلەنىپ تۇرسا، كەرەكتى اقپاراتتى ءسىز اناعۇرلىم وڭايىراق جانە تەزىرەك تاۋىپ الىپ وتىراسىز. كەلەسى ماڭىزدى نارسە — ول سىزعىلاپ-بەلگىلەپ شىعۋ. ەگەر ءسىزدىڭ ۇستايتىنىڭىز پلاننەر نەمەسە ورگانايزەر بولسا، وندا ونىڭ بەتتەرى كۇندەر، ۋاقىت جانە جازبالار تۇسەتىن بولىپ سىزىقپەن ءبولىنىپ تۇرۋى ءتيىس.

ارى قاراي كۇندەلىك بەتتەرىن ىڭعايىڭىزعا قاراي بەزەندىرە بەرەسىز. قيالداپ كورىڭىز: بەتتەرىنە فوندىق سۋرەتتەردى، تۋىستارىڭىزدىڭ سۋرەتتەرىن، ماقسات-مۇراتتارىڭىزدىڭ بەينەسىن، ماندالالاردى، ۇلى ادامداردىڭ ايتقان سوزدەرىن نەمەسە باسقا بىرنارسە سالىپ قويۋعا بولادى. بەتتەردى ءبىز جوعارىدا ايتىپ وتكەن ۇلگىلەر بويىنشا راسىمدەي بەرۋگە بولاتىنىن ۇمىتپاڭىز.  

جازبالاردى ەرەكشە تۇردە، ءتىپتى قۇپيا جازۋ (شيفرلار) ارقىلى، جازىپ وتىرۋعا بولادى. ارينە، كۇندەلىكتى اتقارىلىپ جۇرگەن ىستەر ءۇشىن شيفردى قولدانۋ دۇرىس بولا قويماس، ءبىراق قانداي دا ءبىر دەرەكتەردى قۇپيا ۇستاۋ قاجەت بولسا، بۇل جاقسى امال. شيفر تەك سىزگە عانا تۇسىنىكتى بولۋى ءتيىس، ال ونىڭ وقىلۋ جولىن (بۇل دا تەك سىزگە عانا تۇسىنىكتى بولۋى ءتيىس) كۇندەلىكتىڭ سوڭعى بەتىنە جازىپ قويۋعا بولادى. وسىلاي ەتسەڭىز، باسقالار بىلمەۋى كەرەك نارسەنى ەشكىم بىلە المايتىنىنا سەنىمدى جۇرۋگە بولادى جانە بىلدىرمەۋ ءۇشىن جازبالارىڭىزدى تىعىپ ۇستاۋدىڭ قاجەتى بولمايدى.  

ماقالانىڭ نەگىزگى يدەياسىن ءتۇسىندىرىپ بەرە الدىق دەپ بىلەمىز. ەندى كۇندەلىگىڭىزدى راسىمدەپ الۋ وڭاي بولادى. الايدا، جوعارىدا ايتىلىپ وتكەن Bullet Journal كۇندەلىگى تۋرالى بىرەر ءسوز ارتىق بولمايدى دەپ ويلايمىز. وسى ۋاقىت پەن ىستەردى ۇتىمدى ۇيىمداستىرۋ قۇرالىن پايدالانۋدى يگەرىپ الۋعا كەڭەس بەرەمىز.

Bullet Journal كۇندەلىگى

Bullet Journal كۇندەلىگىن ايگىلى ۆەب-ديزاينەر رايدەر كەررولل ويلاپ تاپقان. ول بىرنەشە جىل بويى ءوزىنىڭ ۋاقىتىن مەيلىنشە ۇتىمدى ۇيىمداستىرۋ جولىن ىزدەپ، ناتيجەسىندە وسى بىرەگەي قۇرالدى جاساپ شىعاردى.   

Bullet Journal كۇندەلىگىنىڭ نەگىزگى ەرەكشەلىگى ونىڭ ءوز يەسىنە بارىنشا سايكەس كەلەتىنىندە. بىلايشا ايتقاندا، بۇل ءوزىڭ ىڭعايىنا يكەمدەلەتىن دايار تۇرعان ۇلگى ەمەس، بۇل وزىڭە ىڭعايلاپ الاتىن جۇيە: راسىمدەيسىز، ويلاستىراسىز جانە قولداناسىز.  

بۋللەت دجورنالدى كۇندەلىك پەن پلاننەردىڭ قوسپاسى دەۋگە بولادى. ول قىزىقتى ويلار مەن يدەيالاردى، مىندەتتەردى، ماقساتتاردى جانە جوسپارلاردى (ۇزاقمەرزىدىلەردى دە) جازىپ وتىرۋعا، سونداي-اق ارنايى بەلگىلەر ارقىلى قاجەتتى اقپاراتتى تەز ىزدەپ تابۋعا بولاتىن قۇرال. مىندەتتەر مەن ىستەردى، ەشتەڭەنى كوزدەن تاسا قىلماي، باسقا ۋاقىتقا جانە باسقا كۇنگە وپ-وڭاي اۋىستىرىپ وتىرۋعا بولادى.  

كەررولل كۇندەلىگى تەلەفون داپتەرىنە جانە قويىن داپتەرىنە، ءتىپتى Trello مەن Evernote سياقتى قوسىمشالارعا كۇشتى بالاما بولا الادى جانە باسىمدىقتاردى بەلگىلەپ، ءوزىنىڭ ىسكەري جانە كۇنبە-كۇنگى ءومىرىن جوسپارلاپ وتىرعاندى جانى سۇيەتىندەرگە قولايلى.

بۇنداي قۇرالدى كەز كەلگەن ادام جاساپ الا الادى. الدىمەن جاقسى ءبىر بلوكنوت (نەمەسە داپتەر) ساتىپ الۋ كەرەك. ول وتە كىشكەنتاي جانە وتە ۇلكەن (ا5 پىشىمدەگىسى جارايدى)، اسا اۋىر نەمەسە تىم جەڭىل بولماسىن. باستىسى — ونى پايدالانۋ مەن وزىڭمەن بىرگە الىپ ءجۇرۋ سىزگە قولايلى بولۋى كەرەك.  

بلوكنوتتىڭ بەتتەرى نومىرلەنگەن بولعانى وتە ماڭىزدى. ەگەر ونداي بولماسا، ءوزىڭىز ءنومىرىن قويىپ شىعىڭىز. ءبىرىنشى بەتتى (بىرنەشە بەتتى ارناساڭىز دا بولادى) كۇندەلىكتى جۇرگىزۋ بارىسىندا جازىپ وتىراتىن مازمۇنى بولۋى ءتيىس — كۇندەلىگىڭىزدىڭ تاراۋلارى مەن ولارعا ارنالعان بەتتەردى جازىپ تولتىرىپ وتىراسىز.

بۇدان كەيىنگى بىرنەشە بەتتى جىلدىق بولىمگە ارناۋ قاجەت. ءبىر بەتكە، ونى تەڭ ءۇش بولىككە ءبولىپ، ءۇش ايدى سىيدىرۋعا بولادى. بۇندا ءىرى-ىرى جوسپارلار مەن ماقساتتار، ەلەۋلى وقيعالار مەن كۇندەر جازىلادى. جىلدىق ءبولىم جوسپارلاردى جالپى باعامداپ وتىرۋعا ىڭعايلى.

بۇدان كەيىن كەلەسى ءبولىم — ءبىر ايعا ارنالعان بەتتەر باستالادى. كەررولدىڭ ءوزى بەتتىڭ سول جاعىندا ءبىر باعانعا ايدىڭ كۇندەرىن، جانىنا اپتا كۇندەرىن جازىپ شىعۋعا كەڭەس بەرەدى. ءار كۇننىڭ تۇسىنا بولاتىن ۋاقىتى وزگەرمەيتىن وقيعالاردى (جول ءجۇرۋ، ءىسساپار جانە ت.ب.) ءتۇرتىپ قويۋعا ىڭعايلى. بەتتىڭ وڭ جاعىنا بەلگىلى ءبىر كۇندەرگە بايلانىستى ەمەس، ءبىراق ناقتى سول ايدا اتقارىلۋى ءتيىس بارلىق ءىرى-ىرى مىندەتتەر مەن ماسەلەلەردى جازىپ قويۋ كەرەك.

ەڭ اقىرىندا، كۇن سايىنعى جازبالاردىڭ كەزەگى كەلدى. ولارعا قالعان بەتتەردىڭ ءبارى ارنالادى (ءار اي بىتكەندە جاڭا ايعا ارنالعان بەتتەر باستالادى). مىندەتتەر تارماقتار تۇرىندە جازىلىپ، ال تىزىمدەگى تارماقتاردىڭ ءوزىن ارنايى تاڭبالارمەن بەلگىلەپ وتىرۋ قاجەت، مىسالى:

◎ نۇكتە  —  كۇن سايىنعى قام-قارەكەت پەن ۇساق تىرلىكتەر؛  

◎ شەڭبەر  — ءىس-شارالار، كەزدەسۋلەر جانە وقيعالار؛  

◎ سىزىقشا  —  ويلار، يدەيالار جانە ەستە بولسىن دەپ ءتۇرتىپ قويعان جازبالار؛  

◎ جۇلدىز  —  اسا ماڭىزدى ىستەر؛  

◎ لەپ بەلگىسى  —  اسا شۇعىل ىستەر.  

ءبىر ءىس اتقارىلىپ بىتكەن كەزدە سيمۆول ورنىنا شارمىق (كرەست) قويىلادى. ءار كۇننىڭ جانە اپتانىڭ اياقتالۋىنا قاراي ورىندالماعان مىندەت-تاپسىرمالاردى ءبىر قاراپ شىعۋ كەرەك تە، ولاردىڭ ورىندالۋى ءالى دە ماڭىزدى ما، جوق پا انىقتاپ الۋ كەرەك. ەگەر ماڭىزدى بولماسا — ەش ويلانباي ولاردى سىزىپ تاستاڭىز، ال ەگەر ماڭىزدى بولسا — نۇسقاما تاڭباسىمەن (➜) نەمەسە «>» تاڭباسىمەن بەلگىلەپ قويىڭىز، ياعني ورىندالۋ مەرزىمىن كەيىنگە (كەلەسى كۇنگە، اپتاعا نەمەسە ايعا) اۋىستىرىڭىز.  

وسىلارمەن قاتار، ءسىز باسقا دا سيمۆولداردى پايدالانا الاسىز. مىسالى، «$» ارقىلى قارجىعا بايلانىستىنىڭ ءبارىن بەلگىلەپ وتىرىڭىز ("$+" تاڭباسى — تابىس، "$-" — شىعىن) تاعى سول سياقتىلار. تەك شاتاسىپ جۇرمەۋ ءۇشىن، تاڭبالار وتە كوپ بولىپ كەتپەسە بولدى. قولايلى بولۋى ءۇشىن بلوكنوتتىڭ بولەك ءبىر بەتىنە بارلىق تاڭبالاردى جانە ولاردىڭ نەنى بىلدىرەتىنىن جازىپ قويۋىڭىزعا بولادى.  

كورىپ وتىرعانىڭىزداي، Bullet Journal-دى جازىپ وتىرۋدىڭ ەش قيىندىعى جوق. جالپى العاندا بۇل كەز كەلگەن كۇندەلىككە تەرەزەسى تەڭ بالاما جانە ءبىز سىزگە، زاۋقىڭىز سوعىپ جاتسا، وسى كەرەمەت قۇرالدى پايدالانىپ كورۋگە كەڭەس بەرەمىز. بۇل قۇرالدىڭ كوڭىلىڭىزدەن شىعاتىنىنا سەنىمىمىز كامىل.

ءار ءىسىڭىز تابىسقا جەتەلەسىن!

---