ءلاززات اسانوۆا
اسانوۆا ءلاززات التىناي قىزى (27.07.70، الماتى وبلىسى پانفيلوۆ اۋدانى اقجازىق اۋىلى — 25.12.86، الماتى) — جەلتوقسان كوتەرىلىسىنىڭ قۇربانى. 1985 جىلى الماتى قالاسىنا كەلىپ، پ. چايكوۆسكيي اتىنداعى مۋزىكالىق ۋچيليششەگە وقۋعا تۇسەدى. 1986 جىلى 16-18 جەلتوقسان كۇندەرى بولعان قازاق جاستارىنىڭ وتارشىلدىق جانە امىرشىلدىك جۇيەگە قارسى كوتەرىلىسىنە قاتىسادى. ول ورتالىقتىڭ بيلەپ-توستەۋشىلىگىنە نارازىلىق ءبىلدىرىپ، قالاداعى جاڭا الاڭعا (قازىرگى رەسپۋبليكا الاڭى) العاشقى ەرەۋىلشىلەر قاتارىندا «قازاقتار! كىرىپتارلىق قۇلدىقتا ءومىر سۇرگەنىمىز جەتەدى! ءبىز ەلىمىزدىڭ تاۋەلسىزدىگىن جەڭىپ العان كەزدە عانا ازات بولا الامىز!» دەگەن ۇرانعا قوسىلىپ شىعادى. كوتەرىلىس قاتىگەزدىكپەن جانىشتالعاننان كەيىن باسقا دا ۇستالعان 87 ادام قاتارىندا اسانوۆاعا ايىپ تاعىلىپ، قاماۋعا الىنادى.
1986 جىلعى 16-18 جەلتوقساندا الماتى قالاسىندا بولعان وقيعالارعا تۇپكىلىكتى باعا بەرۋ جونىندە رەسپۋبليكا جوعارعى كەڭەسىنىڭ ءتورالقاسى قۇرعان كوميسسيا مۇشەسى ف. يگناتوۆتىڭ مالىمەتتەرىنە قاراعاندا، ءلاززاتتىڭ ءمايىتى بىرنەشە كۇننەن كەيىن مۋزىكالىق ۋچيليششە جاتاقحاناسىنان تابىلعاندا، ول تۋرالى «جاتاقحانانىڭ بەسىنشى قاباتىنان قۇلاپ ولگەن» دەگەن قاۋەسەت تاراتىلعان. دەگەنمەن، اسانوۆانىڭ دەنەسىن تۋعان اۋىلىنا دەيىن ىشكى ىستەر مينيسترلىگى مەن مەملەكەتتىك قاۋىپسىزدىك كوميتەتىنىڭ قىزمەتكەرلەرى ارنايى قاراۋىلمەن اپارعان. وسىعان قاراعاندا، ول جازالاۋشىلار قولىنان قازا تاپقان. قازاقستان تاۋەلسىزدىك العاننان سوڭ عانا اسانوۆا جونىندەگى شىندىق قالپىنا كەلتىرىلە باستادى. ءلاززاتتىڭ ەرلىگىنە ارنالعان ءان («قاھارمان قىز — ءلاززات قىز». مۋزىكاسى — ج. تۇرسىنبايەۆتىكى، ولەڭى — ا. اسىلبەكتىكى) جارىق كوردى.
You Might Also Like
-
قازاق دالاسىندا عاسىرلار بويى ايتىلىپ كەلە جاتقان ەڭ ەسكى اڭىز-جىرلاردىڭ ءبىرى — قوزى كورپەش – بايان سۇلۋ. ولاردىڭ مازارى سەمەي وبلىسىنداعى اياگوز وزەنىنىڭ وڭ جاعاسىندا تاڭسىق اۋىلىندا ورن...
-
«زاڭنان اقىلدى بولۋدىڭ قاجەتى جوق» دەگەن ەكەن الەمگە ايگىلى فيلوسوف پلاتون. راسىندا دا زاڭ قوعامدى، وندا بولىپ جاتقان ءتۇرلى ماسەلەلەر مەن شيەلەنىسكەن وقيعالاردى شەشۋشى قۇرال. ياعني، بۇل ...
