InfoHub Logo

عالامتوردان نۇربولات ءابدۋلليننىڭ  كوزىنە جاس الىپ تۇرىپ ورىنداعان  «مەنىڭ اكەم -ەڭ جاقسى ادام!» دەگەن ءانىن ەستىگەندە ەرىكسىز مەنىڭ كوزىمە دە جاس كەلدى.  «مەنىڭ دە اكەم كەرەمەت ادام!»،-  دەپ ساحنادا ءان ەتىپ ايتا الماسام دا، سىرتقا شىعىپ تانىستارىما ايتىپ، ايقايلاپ ، بارىنە  ايتقىم كەلدى. بىزگە اتا-انا تۋرالى ايتىڭدار دەسە كوبىنە انامىزدى ءبىرىنشى ايتاتىنىمىز ايدان   انىق. وعان مەنىڭ قارسىلىعىم جوق. دەگەنمەن مەن ءۇشىن اكەمنىڭ ءسوزى، وتباسىنداعى ورنى،   اناما، اتا-اجەمە، بالالارىنا قامقورلىعى ەرەكشە.    اكەمىز كەيدە  ۇيدە بولماي جولاۋشىلاپ كەتسە، ونىڭ ورنى ەرەكشە ويسىراپ تۇراتىن.  ال انامىز بەن اكەمىز  قاتار وتىرىپ، بىرگە تاماقتانىپ، بىرگە اڭگىمەلەسىپ،  وي بولىسسەك مەن ءۇشىن ودان ارتىق باقىت جوق ءتارىزدى.   ءقازىر  باسقا قالادا وقۋدا جۇرگەن اپام مەن   اعام ءار تەلەفون شالىپ سويلەسكەن سايىن «اكەم  مەن انامدى رەنجىتپە، ايتقاندارىن ەكى ەتپەي ورىندا، سىيلا!» ،-دەۋمەن بولادى. مۇمكىن ساعىنىپ جۇرگەن بولار دەپ ويلايمىن كەيدە.  ال ءبىر ويىم ادام قاسىندا جۇرگەندە جاقىن ادامدارىنىڭ ءقادىرىن بىلمەيدى،- دەگەن ويمەن استاسىپ، ولار اكەم مەن انامنىڭ ءقادىرىن ەندى ءبىلىپ جۇرگەن بولار دەگەن وي  مەنى مازالايدى. ولار وقۋدان دەمالىسقا كەلىپ، قايتاتىن كۇنى بولعاندا - اناما تاڭەرتەڭگى شايعا بالالاردىڭ ءبارىن ويات، ءبارىمىز بىرگە اۋىزبىرشىلىك شايىن ىشەيىك، -دەيتىن. انام سول كۇنگە بولا تاڭەرتەڭ ەرتە ويانىپ، بار ءتاتتىنى ءپىسىرىپ، اۋزىمىزعا توساتىن. بۇل دا بولسا اكەمنىڭ بىرلىك پەن تاتۋلىققا شاقىرعان تاربيەسى دەپ بىلەمىن.   اكەمنىڭ اسىل  قاسيەتتەرىن اۋىزبەن ايتىپ جەتكىزە المايمىن. قانشا شارشاپ- شالدىقسا دا ۇيگە ۇنەمى كۇلىمسىرەپ كىرەدى. قۇشاعىن ايقارا اشىپ ، ءبىزدىڭ «اكەەەە!» دەپ جۇگىرىپ، موينىنا اسىلعانىمىزدى  ساعىنىپ كەلگەندەي بولادى. اكەم مەنىڭ وتباسىمنىڭ قامقورشىسى، قورعاۋشىسى، ارقا سۇيەرىم، اسقار تاۋىم! اكەدەن ءتالىم العان ءار بالانىڭ بولاشاعى جارقىن. مەن  اكەمنىڭ بويىنان نامىس- جىگەردى، بالالارىنا دەگەن ماحابباتتى، جارىنا دەگەن ادالدىقتى،  باۋىرلارى مەن تۋىستارىنا دەگەن قامقورلىقتى  بايقايمىن. كەيدە سىرتتاي قاتال كورىنگەنىمەن، ونىڭ ىشكى جان دۇنيەسى وتە جۇمساق. قاي كەزدە دە مۇڭايساق قۋانتۋعا، جىلاساق جۇباتۋعا، سۇرىنسەك  سۇيەۋگە دايىن تۇرادى.  ول ءبىزدىڭ جاقسى، باقىتتى، مۇڭسىز  ءومىر سۇرگەنىمىزدى قالايدى.    وسىنداي اكەمنىڭ بار ەكەندىگىنە مەن ماقتانامىن.  ءوزىم قاشان ادام بولىپ، اكە  قارىزىن قايتاراتىن جاسقا جەتكەنشە، ساحناعا شىعىپ ءان ارناۋعا ءالىم كەلمەسە دە، وسىلاي اكەمدى  باسقالارعا ايتۋعا شامام كەلەدى عوي،- دەگەن ويمەن جۇرەگىمنەن شىققان سوزدەرىمدى ايتقىم كەلدى، باسقالارعا جەتكىزگىم كەلدى. سوندىقتان  قاي كەزدە دە انامىز بەن اكەمىزدى قۇرمەتتەي بىلۋگە، ءقادىرىن جەتە تۇسىنۋگە دوستارىمدى، زامانداستارىمدى شاقىرامىن!

قىزىلوردا وبلىسى ، قازالى اۋدانى ، ايتەكە بي كەنتى، ى. التىنسارين اتىنداعى

 №204 مەكتەپتىڭ 9-سىنىپ وقۋشىسى قۇلباي اقەركە

---