ءبىرجولا ولگەن ەسكى ءومىر تۇماۋراتقان،
ءبىرجولا وشكەن ەسكى جۇرت قىلاۋ جاپقان.
«اۋليە تاس» اتانعان جەرگە كەلىپ،
باسىن جاڭا قازاقتار قۇراپ جاتقان...
اسقار-اسقار تاۋلاردىڭ اراسىنا
اۋىل قونىپ، ءۇي تۇرىپ، جاراسۋدا.
جەردەن ءوسىپ شىققانداي جاپا-جالعىز،
الىن تاس تۇر دەگەنگە ناناسىڭ با؟
اتامزامان...
اتانىپ «ارۋاق قونعان»...
الىپ جارتاس ماڭگىلىك سالماقتانعان.
جۇدىرىقتاي قارت زەرگەر تاستى قاشاپ،
ءبىر تال ماساق ءمۇسىنىن سالماق بولعان.
ءبىر تال ماساق ءمۇسىنىن سالماق بولعان،
تاس اعاشپەن اينالا شارباقتالعان.
جۇدىرىقتاي قارت زەرگەر قۇلان ۇرىپ،
قۇلىپ مۇشەگە ورالىپ، ساڭلاقتانعان.
-مۇمكىن ەمەس!..
-مۇمكىن! مۇمكىن! - دەدى.
قايىسپادى قارت زەرگەر ىركىلمەدى.
تىرشىلىگىن توقىعان ورمەكشىدەي،
الىپ تاستىڭ توسىندە بۇلكىلدەدى...
ولشەۋسىز وتە بەردى اي، انتالار،
العان ءىسى بولمادى اياقتالار.
قالجىراعان قارت زەرگەر، قارا بالا،
قارا تاستى قاشادى، وياتتى ولار.
ال جىلدار وتە بەردى، وتە بەردى،
الىپتان ماساق جاساۋ بەكەر ەدى...
اكەسى مەن بالاسىن الايدا ءبىر
قۇدىرەت كۇش كۇن سايىن جەتەلەدى.
كۇن سايىن كۇن باتىرىپ، تاڭدى اتىردى،
كۇن سايىن جان اۋىرتتى، قان قاتىردى.
ماساق جوق.
الىپ تاستا بۇجىر-بۇجىر،
ءار جەرىندە انشەيىن تاڭبا تۇردى.
تالاي جىلدار جونەلدى، جوعالتىلدى،
تالاي قاشاۋ تاۋسىلدى، جاڭارتىلدى.
تىلسىم تاستى تىنشىتپاي، تىقىلداتىپ،
ادام تۇردى، بەرىلمەي ادام تۇردى.
-كەش كىردى عوي، قايتايىق، بالام، ەندى،
نەتكەن تۇنەك، نەعىلعان جامان ەدى،-
دەدى دە شال، شاعىرماق شاڭقاي تۇستە
كىرپىك قاقپاي تەسىلىپ قالا بەردى.
-كەش كىردى عوي؟! -
بالاسى جالت قارادى،
قارادى، جاماندىققا اتتامادى.
و، سۇمدىق!
قوس جانارى.... قوس جانارى...
قالدىرىپتى زەرگەردى، قارت بابانى.
شاڭقاي ءتۇس.
بالا ۇرەيلى، تاڭدانادى،
سوقىر دەۋگە قيمايدى، ارلانادى،
ەكى قولى ەربەڭدەپ، قايران كەۋدە
اتتاي الماي ادىم جەر قارمانادى.
-نەعىلدى، اتا، كورمەيسىڭ بە؟!
-نەعۋشى ەدى، بالام-اۋ، كورمەيسىڭ بە؟
باسىم مەنىڭ بارادى، كەلمەيسىڭ بە...
ماساق...
ماڭگى ماساق...
الىپ ماساق...
قور قىلعانى-اي ءتاڭىرىمنىڭ قالىپقا caپ.
ءۇھ!
جانىم-اي!..
ادامنىڭ قۇدىرەتىن
تۇلەي تاستىڭ الدىندا انىقتاساق...
تىڭدا، بالام...
ورىندا...
وسيەتىم...
وتىنەمىن...
بولماعىن باس يەتىن!..
تاس تا بولسا تانىسىپ كونەتىن، ءبىلسىن،
سەزسىن، كورسىن ادامنىڭ قاسيەتىن.
ۇرپاعىڭا ايت.
اكەڭنەن باستالعاسىن،
ءارى قاراي جالعانسىن. تاستالماسىن.
«اۋليە كەپ تۇنەگەن ورىن» ەمەس،
الىپ ءبىر ماساق بولسىن، تاس بولماسىن!
ۇرپاعىڭا ايت اياقسىز تاستالماسىن..
وتكەن جىلدار وشكەن جوق، سانادا تۇر،
تالاي ساۋىت توزدىردى دالا باتىر.
جالعىز قولدى قارت ادام تاسقا قاراي،
جالعىز ۇلىن جەتەكتەپ بارا جاتىر.
ءوزى تىرەپ تۇرعانداي اسپان، ايدى،
باياعىداي تاكاپپار تاس قارايدى.
جالعىز قولدى مۇگەدەك قارت زەرگەر ءجۇر
اماناتىن اتانىڭ تاستامايدى.
الىپ ءبىر ماساق جاساۋ ارمانى ەدى،
ءۇشىنشى ءۇرپاق اتا ءىسىن جالعادى ەندى.
ەكىنشى ۇرپاق ءبىر قولىن وق وتادى،
ءبىر قولىن تىنىشتىققا جالعا بەردى.
تاعى، مىنە، كۇن شىعىپ، تاڭ اتۋدا،
تاعى، مىنە، جاڭا ءومىر، جاڭا تۇلعا.
تىلسىم تاستى تىلگىلەپ، ماساق جاساپ،
ءۇشىنشى ۇرپاق ساۋساعىن قاناتۋدا.
...اسقار-اسقار تاۋلاردىڭ اراسىندا،
شاعىن اۋىل، شات تۇرمىس،باراسىڭ با؟
اسپانمەنەن تىلدەسكەن الىپ تاستى
ءالى كۇنگە قاشاۋدا...
ناناسىڭ با؟
الىپ ءدان باس الادى،
الىپ تاسقا جان ءبىتىپ، جاسارادى.
ادام مەنەن ەڭبەكتىڭ سيمۆولىنداي
الىپ ماساق قالايدا جاسالادى.
زەرگەردىڭ قۇدىرەتىنە سەنەمىن.
ۇرپاقتىڭ ادالدىعىنا سەنەمىن...

---