InfoHub Logo

جۇرگىزۋشى ءمۇعالىم:

- بۇگىن بىزدە كوپشىلىككە تانىمال، ەلگە ەلەۋلى جان بەيسەنباي جۇمانىڭ كلاستاسى ايۋباي اتا قوناقتا وتىر. ايۋباي اتا، ءسىزدى بەيسەنباي جۇمانىڭ كلاستاسى دەيدى عوي، سول ءسوز راس پا؟

- بەيسەنبايدىڭ كلاستاسى ەكەندىگىم راس، - دەدى ايۋباي اتا. - بەيسەنبايدىڭ ءوزى بىزدەن بەس جاستاي كىشىلىگى بار بالا ەدى. ءوزىنىڭ زەرەكتىگىمەن، العىرلىعىمەن ءبىزدى قۋىپ جەتىپ العان عوي. ءوزى ءبىر كىپ-كىشكەنتاي، كوزى جىلت-جىلت ەتكەن سۇيكىمدى بالاتۇعىن. بەيسەنباي مەنىڭ ارتىمداعى پارتادا وتىردى، مەن بەيسەنبايدىڭ الدىڭعى جاعىنداعى پارتادا وتىردىم. مەنىڭ ساباق ۇستىندەگى ەرمەگىم سول - ءمۇعالىمنىڭ كوزىن الا بەرىپ، بەيسەنبايدى تاناۋدان شەرتەمىن عوي كەلىپ. ارتىما قارايمىن دا، بەيسەنبايدى تاناۋدان شەرتىپ كەپ قالامىن. كۇن ۇزاق ساباق ۇستىندەگى ەرمەگىم سول ەدى.

مۇعالىمدەر بىرىنە-بىرى قاراستى.

- راقمەت! - دەدى جۇرگىزۋشى ءمۇعالىم. - راقمەت، اتا، اڭگىمەڭىزگە! بۇگىن بىزدە قوناقتا بولعان...

- تۇرا تۇر، شىراعىم، اڭگىمەمدى ءالى ايتىپ بولعان جوقپىن، - دەدى ايۋباي اتا. -
سودان ۇزىلىسكە شىعامىز. ول كەزدە مەكتەپتە پەش جاعىلادى. ءبىر پەشىمىز بار ەدى، سۋ وتىن سالا ما، بىقسىپ جانباي جاتاتىن. سودان ۇزىلىستەگى قىلاتىنىم سول - بەيسەنبايدى الگى پەشتىڭ قۋىسىنا تاقاپ الىپ، مىتيمىن عوي كەلىپ. مىتيمىن بەيسەنبايدى...

- سىزدە ءبىر ءجونى ءتۇزۋ اڭگىمە جوق پا؟! - دەدى مەكتەپتىڭ ديرەكتورى وسى كەزدە. - بىلاي بالالارعا تاربيە بولارلىق، ۇلگى بولاتىن اڭگىمەڭىز جوق پا؟

- راقمەت! - دەدى تاعى دا جۇرگىزۋشى ءمۇعالىم. - راقمەت، اتا، اڭگىمەڭىزگە! بالالار، قول سوعايىق. بۇگىن بىزدە قوناقتا بولعان...

- تۇرا تۇر، شىراعىم، اڭگىمەمدى ءالى اياقتاپ بولعان جوقپىن، - دەدى ايۋباي اتا. -اقىرى كەزدەسۋگە شاقىرعان ەكەنسىڭدەر... سودان ۇيگە قايتامىز. بەيسەنبايدىڭ ءۇيى ءوزى ءبىزدىڭ ۇيمەن كورشى، ءۇي اراسىندا ءۇي جوق ەدى. بەيسەنبايدى جولدا جەلكەدەن ءتۇيىپ كەپ قالامىن. تۇيەمىن كەلىپ بەيسەنبايدى...

- ول بالانى نەمەنەگە ۇرا بەرەسىز؟ - دەدى وسى كەزدە گەوگرافيا ءپانىنىڭ مۇعاليماسى شىداي الماي كەتىپ. - ول بالا سىزگە نە جازدى سونشالىقتى؟

- ءىشىم باسىمنان اسىپ زەرىگىپ بارا جاتىرمىن عوي، - دەدى ايۋباي اتا. - مەنىكى تەك ەرمەك.

- ءوي، ءسىز دە ءبىر!

- سودان ۇيگە بارسام، شەشەم ءبىر قازان قىلىپ كەسپە كوجە دايىنداپ قويادى. سوعان قارنىمدى تىڭقيتىپ تويعىزىپ الامىن دا، تاعى دا بەيسەنبايدىڭ ۇيىنە بارامىن عوي...

- راقمەت، اتا! - دەپ شار ەتە ءتۇستى وسى كەزدە جۇرگىزۋشى ءمۇعالىم. - راقمەت اڭگىمەڭىزگە!

- تۇرا تۇر، شىراعىم، اڭگىمەمدى ءالى اياقتاپ بولعان جوقپىن، - دەدى ايۋباي اتا. -
سودان بەيسەنبايعا: "بەرى كەل!" - دەيمىن. بەيسەنباي جانىما كەلەدى. "بار دا ۇيىڭنەن بارىپ، كامپيت پەن اقشا الىپ كەل"، - دەيمىن.

- ءسىز ودان دا نەگە بەيسەنباي جۇمانىڭ ماتەماتيكانى قالاي وقىعاندىعى جايلى ايتپايسىز؟ - دەدى ماتەماتيكا ءپانىنىڭ مۇعاليماسى كەيىستىك تانىتىپ. - الگىندە عانا ءوزىڭىز بەيسەنباي جۇما بىزدەن بەس جاس كىشى ەدى، ءوزىنىڭ زەرەكتىگىمەن، العىرلىعىمەن ءبىزدى قۋىپ جەتىپ الىپ ەدى دەدىڭىز. ەندى بەيسەنبايدىڭ ماتەماتيكانى قالاي وقىعاندىعى جايلى بالالارعا ۇلگى ەتىپ ايتىپ بەرسەڭىزشى.

- وي، بىلمەيمىن ول جاعىن، - دەدى ايۋباي اتا. - مەنىڭ ءوزىم دە مەكتەپتە ءبىر جۇلىمىر بولعان بالامىن عوي. مۇعالىمدەردى زار يلەتىپ ءجۇرۋشى ەدىم. سول كەزدە مەكتەبىمىزدە ءبىر قالادان كەلىپ ان-كۇيدەن ساباق بەرىپ جۇرگەن ءمۇعالىم بولدى. ءوزى ۇنەمى كەشتەر وتكىزەتىن. سول ءمۇعالىم ايتتى ءبىر كۇنى: "بالالار سەندەر ەندى مەكتەپتى بىتىرگەلى جاتىرسىڭدار. كەيىن ەستەرىڭە الىپ جۇرەتىن ادەمى ءبىر كەش وتكىزەيىك"، - دەدى. بەيسەنبايدى ۇراتىنىم سول كەشتە. بۇل جولى وڭدىرماي سوققانمىن عوي بەيسەنبايدى. بالا دەگەن ەسىنەن تانىپ قالعان. اياق استىنان اۋدانعا اپاراتىن كولىك تابىلماي، ات-اربامەن الىپ كەتتى. دوعدىرلار ميى شايقالعان دەپ دياگنوز قويىپتى.

- راقمەت، اتا! - دەپ جۇرگىزۋشى ءمۇعالىم وسى كەزدە بەزىلدەپ كەتتى. - راقمەت اڭگىمەڭىزگە! قول سوعايىق، بالالار. ايۋباي اتانى قوشەمەتپەن شىعارىپ سالايىق.

- مىنانى كىم شاقىرىپ ءجۇر مەكتەپكە؟ - ديرەكتور جان-جاعىنداعى مۇعالىمدەرىنە قارادى.

- گۇلسىم مەن ناعيمانىڭ شاقىرىپ جۇرگەنى، - دەدى مۇعالىمدەر ەكى قىزعا قاراپ.

- قايدان بىلەيىك؟.. - دەدى ەكى مۇعاليما قىز. - بەيسەنباي جۇمانىڭ كلاستاسى دەگەسىن...

- ادام دەگەن ايتاتىن ءسوزىنىڭ رەتىن بىلمەگەنى قيىن ەكەن عوي، - دەدى ديرەكتور.

- قاراعىم، ءماجيت! - دەدى وسى كەزدە قارتاڭ مۇعاليما ديرەكتورعا. - ءوزى دە مەكتەپتە ءبىر جۇلىمىر بولىپ ەدىم دەپ مويىنداپ وتىر عوي. وسىنداي بالالار قازىرگى مەكتەپتە دە بار. ەرتەڭ ولار دا ايتاتىن ءسوزىنىڭ رەتىن بىلمەيتىن بولىپ وسەدى. مەكتەپتى ىرگەتاس دەپ بەكەر ايتپايمىز عوي. الدىمەن تاربيە دەپ شىرىلدايتىندىعىمىز سوندىقتان.

- ويباي، انا كىسى تاعى دا كەلە جاتىر! - دەپ، وسى كەزدە حيميا ءپانىنىڭ مۇعاليماسى شار ەتە قالدى. - مەكتەپتى جابايىق! جان-جاققا تارايىق!

- جو-جوق! - دەدى تاريح ءپانىنىڭ مۇعاليماسى. - قالپاعى قالىپ قويعان ەكەن. قالپاعىن الىپ بەرىڭدەر ايۋباي اتانىڭ.

مۇعالىمدەر ءبىر ءسات ءۇنسىز قالدى. سونان سوڭ بارىپ بۇگىنگى حالدەرى ەستەرىنە تۇسكەندەي، جامىراي كۇلىسىپ جىبەردى.

---