InfoHub Logo

"قىمباتتى مەنىڭ مەكتەپ ءبىتىرۋشى قۇربى-قۇرداستارىم!
مىنەكي، ءبىز ءۇشىن قوڭىراۋدىڭ سيقىرلى دا سازدى اۋەنى سوڭعى رەت ءان سالماق. جانە ول ءان بارلىعىمىزدى سونىمەن بىرگە ءومىر دەپ اتالاتىن الىپ كۇرەجولدىڭ توسكەيىنە شىعارىپ سالار. ءبىزدى قانشاما جىل وقىتىپ، ءبىلىم بەرگەن، تاربيە بەرگەن اياۋلى انا مەكتەبىمىز بەن قۇرمەتتى ۇستازدارىمىز ىشتەي تىلەكتەستىك ءبىلدىرىپ، ءسات ساپار تىلەپ قالار..."

بۇل - قوجاباقى اۋىلىنداعى №25 مەكتەپتىڭ ءبىر كەزدەگى 48-تۇلەكتەرىنىڭ اۋىل ساحناسىنداعى وزدەرىنىڭ سوڭعى قوڭىراۋ سالتاناتىندا ۇستازدارى مەن مەكتەپ ءبىتىرۋشى قۇربى-قۇرداستارىنا ارناپ سويلەگەن ءسوزى ەدى. سونان سوڭ ولار سوڭعى قوڭىراۋ جايلى ولەڭ وقىدى:

ۇعىندى ما ارلىلىعىن، ءتاتتى ءومىردىڭ نار جۇگىن،
اق بانتيكپەن قوشتاسادى قىز بالا دا ءدال بۇگىن.
ءبۇر جاردى ما كەۋدەسىندە اساۋ سەزىم ەلىم دەپ،
ادۋىنداۋ ەركە ۇلدىڭ دا مۇرتى قاپتى تەبىندەپ...

قوجاباقى مەكتەبىنىڭ 48-تۇلەكتەرى مەكتەپتى 1997 جىلى تامامداعان. ولاردىڭ سوڭعى قوڭىراۋ سالتاناتى "بالا شاقتان - بولاشاققا" دەگەن اتپەن وتكىزىلدى.

قازىرگى قازالى اۋدانى قوجاباقى اۋىلىنداعى №25 ورتا مەكتەپ ءوزىنىڭ ورتا مەكتەپ رەتىندەگى تاريحىن 1947-48 وقۋ جىلىنان باستايدى. مەكتەپ بۇل كەزدە ماكسيم گوركيي مەكتەبى بولىپ اتالعان ەدى. سەبەبى قازىرگى قوجاباقى اۋىلى بۇرىنعى تاريحىندا ماكسيم گوركيي اتىنداعى كولحوز، سونان سوڭ ەنگەلس اتىنداعى سوۆحوز بولىپ اتالدى. ال قازىرگى قوجاباقى اۋىلىنا ىرگەلەس جاتقان اراندى اۋىلى بۇرىنعى تاريحىندا جدانوۆ اتىنداعى كولحوز بولىپ اتالسا، كەيىننەن ەنگەلس اتىنداعى كەڭشاردىڭ بولىمشەسى بولدى. بۇل ەكى اۋىل دا قازىرگى ۋاقىتتا اراندى اۋىلدىق وكرۋگىنە قارايدى. ورتالىعى - قوجاباقى اۋىلى.

"قۇرمەتتى مەكتەپ ءبىتىرۋشى تۇلەك! ءسىز ءۇشىن وسىناۋ كۇن ايشىقتى دا ايدىندى، مەرەكەلى دە مەرەيلى، تابىستى دا تولعامدى كۇنگە اينالىپ وتىر. ويتكەنى ءسىز ءدال وسىناۋ كۇنى ءوزىڭىزدىڭ قيماس ءبىر مەكەنىڭىزگە اينالعان، بالداۋرەن شاقتىڭ بالاۋسا قىزىعىن وتكىزگەن، ءسويتىپ بويىڭىزعا بىلىكتى ءبىلىم مەن ءتالىمدى تاربيە جيناعان مەكتەپ اناڭىزدان تۇلەپ ۇشقالى تۇرسىز. سىزگە ەندىگى ساتتە ءوز ءومىر ايدىنىڭىزدى قالاپ الۋعا تۋرا كەلەدى..."

بۇل - مەكتەپ ديرەكتورى ورىنباسارىنىڭ №25 مەكتەپتىڭ 49-تۇلەكتەرىنە مەكتەپ اكىمشىلىگىنىڭ اتىنان ارنالعان قۇتتىقتاۋ ءسوزى. 49-تۇلەكتەر مەكتەپتى 1998 جىلى تامامداعان.

1958 جىلى كولحوزداردى ىرىلەندىرۋ ساياساتىنا بايلانىستى ماكسيم گوركيي اتىنداعى كولحوز بەن جدانوۆ اتىنداعى كولحوز بىرىگىپ، ورتالىق جدانوۆ كولحوزىنا كوشىرىلەدى. وسى كەزدە مەكتەپ تە جدانوۆ اۋىلىنا كوشىرىلەدى. وبلىستىق اتقارۋ كوميتەتىنىڭ 1958 ج. 21 قاڭتارداعى قارارى بويىنشا وسى كەزدە مەكتەپكە جدانوۆ اتاۋى بەرىلەدى. مەكتەپ وسى كەزدەن باستاپ №25 جدانوۆ اتىنداعى مەكتەپ بولىپ اتالدى.

"ەلىمنىڭ كەڭەيگەندە كەرەگەسى،
جالعانسىن جاقسىلىققا ونەر كەشى.
بارشاعا، اعايىن-جۇرت، بولسىن قۇتتى
مەكتەپتىڭ ەلۋ جىلدىق مەرەكەسى!

جالعاسىن جاقسىلىققا تىلەكتەرىن،
تولتىرىپ قۋانىشقا جۇرەكتەرىن.
ەلۋگە كەلگەن شاقتا انا مەكتەپ
ۇشىردى ەلۋىنشى تۇلەكتەرىن.

ءبىلىمنىڭ بويعا شۋاق توككەن جەرى،
جىر بولىپ جازىلادى وتكەندەرى.
تاريحقا تاڭبالاندى مەكتەبىمنىڭ
ەلۋ قىس، ەلۋىنشى كوكتەمدەرى".

بۇل - مەكتەپتىڭ 1999 جىلعى 50-تۇلەكتەرىنىڭ ءسوزى. وسى جىلعى ساۋىردە "قوجاباقى مەكتەبىنىڭ ءۆالسى" ءانى ومىرگە كەلگەن ەدى. 50-تۇلەكتەر مەكتەپتەن 1999 جىلى قانات قاقتى.

1965 ج. قاراشانىڭ 1-ىندە مەكتەپ جدانوۆتان ەنگەلس اتىنداعى كەڭشارعا كوشىرىلەدى. 1989 جىلى مەكتەپتەن جدانوۆ اتاۋى الىندى. سودان بەرى مەكتەپ №25 ورتا مەكتەبى دەپ اتالادى.

"دارىندى عالىمدى
سان جىلدار مەكتەبى ساعىندى.
ەلىنىڭ تىرەگى،
مەكتەپتىڭ تۇلەگى
بۇل كۇندە ەل-جۇرتقا تانىلدى..."

بۇل - "الىستان اڭساي بۇگىن جەتكەن دارا، تۇلەگىن قارسى الدى مەكتەپ انا" دەگەن اتپەن مەكتەپتە ماۋسىم ايىندا وتكىزىلگەن الماتىدان كەلگەن قوناق، مەكتەپتىڭ 1957 جىلعى تۇلەگى، مەديسينا عىلىمدارىنىڭ دوكتورى، پروفەسسور بەگالى ايتپەمبەتوۆپەن 60 جاسقا تولعان كەزدەسۋ ساتىندەگى ورىندالعان ارناۋ ءاننىڭ ءسوزى. بۇل كەزدەسۋ 1999 جىلى وتكىزىلگەن.

ورتا مەكتەپ قۇرىلعاننان كەيىن ءوز تاريحىنداعى ءوزىنىڭ العاشقى تۇلەكتەرىن ۇشىرا باستادى. 1954 جىلى مەكتەپتەن العاشقى مەدال يەگەرى ۇشىپ شىقتى. ءدال وسى جىلى مەكتەپتى 16 تۇلەك بىتىرسە، سول تۇلەكتەردىڭ ىشىنەن ءابي داۋلەتكەرىموۆ مەكتەپتى كۇمىس مەدالعا ءبىتىرىپ شىققان ەدى. 1955 جىلى مەكتەپتىڭ تۇڭعىش التىن مەدال يەگەرى ۇشىپ شىقتى. وسى جىلى مەكتەپ بىتىرگەن 26 تۇلەكتىڭ ىشىنەن الپىسباي قارامولدايەۆ مەكتەپتى التىن مەدالعا ءبىتىرىپ شىقسا، ال مەكتەپتىڭ تاعى ءبىر تۇلەگى الماس جامانبايەۆ مەكتەپتى وسى جىلى كۇمىس مەدالعا ءبىتىردى. بۇل كەزەڭدە مەكتەپتى مەكتەپ ديرەكتورى باكەشوۆ قوجاباي باسقارعان.

"بولاشاقتىڭ جۇلدىزى
قولىن بۇلعاپ ۇنەمى،
ۇشتى ۇيادان ۇل-قىزى -
مەكتەبىنىڭ تۇلەگى.

سەزىم، سەزىم جۇرەكتەن
كوز جاسى بوپ تامادى.
بالالىق شاق تۇلەكپەن
قوش ايتىسىپ قالادى..."

بۇل - مەكتەپتىڭ 51-تۇلەكتەرىنىڭ سوڭعى قوڭىراۋ سالتاناتىندا ورىنداعان مەكتەپ بىتىرۋشىلەر ءۆالسى ءانىنىڭ ءسوزى. 51-تۇلەكتەر مەكتەپتى 2000 جىلى ءبىتىردى.

"ەلدىڭ ءبىر سالتى قاشاننان -
ونەرمەن باعى جانعان جەر.
توسىنەن ۇشقان تۇلەكتىڭ
ارمانى بيىك بولعان جەر.
ۇلاعاتتىڭ ۇلگىسىن
مەكتەبى جيىپ العان جەر.
سارقىلماس ءبىلىم بايلىعى -
ءتالىم مەن تانىم قونعان جەر..."

بۇل - سىردىڭ ماقامىنا سالىنىپ ايتىلاتىن مەكتەپتىڭ جىر-تەرمەسىنىڭ ءسوزى. مەكتەپ 1997-98 وقۋ جىلىندا 50 جاسقا تولىپ تۇرعان ەدى. وسىعان وراي، 1998 جىلى قىركۇيەكتە جازىلدى.

---