مەملەكەتتىك ءبىلىم بەرۋ جيناقتاۋ جۇيەسىنە سۇرانىس بار - سابيليانوۆ
ق ر پارلامەنتى ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.
«2013 جىلدان بەرى جۇمىس ىستەپ كەلە جاتقان مەملەكەتتىك ءبىلىم بەرۋ جيناقتاۋ جۇيەسى ءار ازاماتقا تەحنيكالىق جانە كاسىپتىك، ورتا بىلىمنەن كەيىنگى جوعارى، سونداي-اق جوعارى وقۋ ورنىنان كەيىنگى ءبىلىم بەرەتىن قازاقستاندىق وقۋ ورىندارى مەن شەتەلدىك ءبىلىم بەرۋ ورىندارىندا وقۋىنا اقى تولەۋ ءۇشىن اقشالاي قاراجاتىن ەكىنشى دەڭگەيلى بانكتەردەگى دەپوزيتتەردە جوسپارلى تۇردە جيناقتاۋعا مۇمكىندىك بەردى. ءبىلىم بەرۋ جيناقتاۋ سالىمدارى بويىنشا جيناقتالعان قاراجاتقا مەملەكەت تاراپىنان سىيلىقاقى جانە ەكىنشى دەڭگەيدەگى بانكتەر تاراپىنان سىياقى بەرىلەتىندىگى وتە ماڭىزدى. بۇگىنگى كۇنى مەملەكەتتىك ءبىلىم بەرۋ جيناقتاۋ جۇيەسىنىڭ قاجەتتىلىگى جانە وعان ازاماتتاردىڭ تاراپىنان سۇرانىستاردىڭ بار ەكەندىگىن سەنىممەن ايتۋعا بولادى. دەگەنمەن وزگەرىپ جاتقان جاعدايلار مەن ءارتۇرلى سالاداعى قازاقستاندىق زاڭنامانىڭ وزگەرۋىنە بايلانىستى وزدەرىڭىزگە ۇسىنىلىپ وتىرعان زاڭ جوباسىن ازىرلەۋ قاجەتتىگى تۋىندادى»، - دەدى دەپۋتات نۇرتاي سابيليانوۆ زاڭ جوباسىن تانىستىرۋ بارىسىندا.
وسى ورايدا ول زاڭ جوباسى «مەملەكەتتىك ءبىلىم بەرۋ جيناقتاۋ جۇيەسى تۋرالى» ق ر زاڭىنىڭ قولدانىلۋى اياسىنا كىرەتىن قاتىناستاردى قۇقىقتىق رەتتەۋدى جەتىلدىرۋ ماقساتىندا ازىرلەنگەنىن اتاپ ءوتتى.
بۇل رەتتە سالىمشىلاردى باسىم ساناتقا جاتقىزۋدى راستاۋعا ۋاكىلەتتىك بەرىلگەن مەملەكەتتىك ورگانداردىڭ تىزبەسىن كەڭەيتۋ ارقىلى باسىم سانات بويىنشا (جەتىم بالالار مەن اتا-اناسىنىڭ قامقورلىعىنسىز قالعان بالالار) مەملەكەتتىڭ سىياقىسىن الۋ قۇقىعىن ىسكە اسىرۋدى كوزدەيتىن قادامدار قامتىلعان. سونىمەن قاتار مەملەكەتتىك سىيلىقاقىسى تۇرىندە ەسەپتەلەتىن بيۋدجەت قاراجاتىن ءتيىمدى پايدالانۋ، سونداي-اق دۇرىس ەمەس مالىمەتتەر انىقتالعان جاعدايدا بۇرىنعى كەزەڭدەردەگى ارتىق ەسەپتەلگەن مەملەكەتتىڭ سىياقىلارىن بيۋدجەتكە قايتارۋ ەسكەرىلگەن.
«مەملەكەتتىك ءبىلىم بەرۋ جيناقتاۋ جۇيەسىنە قاتىسۋشى بانكتەرگە قويىلاتىن وبلىس ورتالىقتارىندا جانە استانا مەن الماتى قالالارىندا بانك فيليالدارىنىڭ بولۋى تالابىن الىپ تاستاۋ ارقىلى مبجج-گە قاتىسۋشى بانكتەردىڭ سانىن كوبەيتۋدى كوزدەيتىن وزگەرىستەر ەنىگىزىلدى. بۇل حالىقتىڭ ءبىلىم بەرۋ جيناقتاۋ سالىمىن اشۋىنا مۇمىكىندىگىن ارتتىرادى، قولايلى جاعداي تۋدىرادى»، - دەدى دەپۋتات.
You Might Also Like
-
الماتى وبلىسى، ۇيعىر اۋدانى №4 شونجى ورتا مەكتەبى سىنىپ جەتەكشىسى: كۋدجاكۋلوۆا الماگۋل 4 سىنىپ وقۋشىسى عالىم اقمارال
-
ۇيا سالدى كوكتەمدە، قوس قارلىعاش ۇشىپ كەپ. بىتكەنشە ۇيا تىنبادى، ارى-بەرى ۇشىپ كوپ.
