بەكبولات تىلەۋحان ۇبت سۇراقتارىنداعى كەمشىلىكتەردى اتادى
ءماجىلىس دەپۋتاتى بەكبولات تىلەۋحان ۇبت سۇراقتارىنداعى ورەسكەل قاتەلىكتەرگە جول بەرگەندەردى جاۋاپكەرشىلىككە تارتۋ بويىنشا ءبىلىم جانە عىلىم مينيسترىنە دەپۋتاتتىق ساۋالىن جولدادى، دەپ قازاقپارات حابارلايدى.
«بۇگىنگى دەپۋتاتتىق ساۋالىم ق ر ءبىلىم جانە عىلىم ءمينيسترى ەرلان ساعادييەۆكە باعىتتالعان. بۇل رەتتە ۇلتتىق ءبىرىڭعاي تەستىلەۋ ماسەلەسىنە نازار اۋدارعىم كەلەدى. وسى ۇبت-نىڭ توڭىرەگىندەگى الەمدىك تاجىريبەگە سۇيەنگەن رەفورمانىڭ جالپى باعىتى قولدارلىق. جالپى فورماتىنداعى وڭ وزگەرىستەر بارشىلىق. ءبىراق مۇندا باستى پروبلەما سۇراقتىڭ ساپاسىندا بولىپ وتىر. ءبىلىم سالاسىندا ءاربىر قادامنىڭ نەگىزگى كوزدەگەن ماقساتىنان بولەك، يدەلوگيالىق باعىتى، رۋحاني جۇگى ەشقاشان نازاردان تىس قالماۋى ءتيىس»،-دەپ توقتالدى تىلەۋحان ءماجىلىستىڭ جالپى وتىرىسىندا.
وسى ورايدا ول بۇگىندە ءبىلىم سالاسىنىڭ ەكسپەريمەنت الاڭىنا اينالىپ كەتۋى وتە الاڭدارلىق قۇبىلىس ەكەنىن اتاپ ءوتتى.
«نەگىزى، ءبىلىم سالاسىنا قاتىستى بىردە-بىر ماعلۇمات جاۋاپكەرشىلىكسىز جازىلۋعا ءتيىس ەمەس. ويتكەنى ونىمەن سۋسىنداعان بالانىڭ ەرتەڭگى ازاماتتىق ۇستانىمىنا، مەملەكەتشىلدىگىنە، ەلجاندىعىنا، تاريحي ساناسىنىڭ قالىپتاسۋىنا اسەر ەتەتىنىن ەرەكشە ەسكەرۋ مىندەت»،-دەپ ناقتىلادى دەپۋتات.
بۇل تۇرعىدا بەكبولات تىلەۋحان جاريالانعان ۇبت سۇراقتارى قوعامنىڭ ايرىقشا نارازىلىعىنا دۋشار بولعانىن جەتكىزدى.
«تەست سۇراقتارىندا ەرمەك تۇرسىنوۆ، بايان ەسەنتايەۆا، نۇرتاس ادامبايەۆ سياقتى جانە باسقا دا شوۋ-بيزنەس، ەسترادا وكىلدەرى ءجۇر. بۇگىندە ەلدىڭ پىكىرىن الەۋمەتتىك جەلىلەردەن بىلۋگە بولادى. بۇل پىكىرلەرگە قاراساڭىزدار، شىنىندا دا ەلدىڭ نارازىلىعى جويقىن. وندا «نە ۇلگىسى مەن ونەگەسى جوق ەسەنتايەۆا مەن تۇرسىنوۆتى ۇرپاققا ۇلگى قىلۋدان نە ۇتامىز» دەپ جازعان ءبىر ادام. ال كەيبىرەۋلەرى «فرەددي ءروۋچتىڭ (اقش بوكسشىسى) قاتىسى قانشا» دەپ ءۋاجىن جازعان. بۇل شىنىندا دا ءبىزدىڭ رۋحاني كودىمىزعا، بولاشاققا باعدارىمىزعا، رۋحاني جاڭعىرۋىمىزعا قاتىسى بار تۇلعا ما؟! جالپى، انايى پىكىرلەردە بار، سونىمەن قاتار دۇرىس ۇسىنىستار دا جەتەرلىك»،-دەدى دەپۋتات.
ونىڭ ايتۋىنشا، بۇگىندە تەست سۇراقتارىنا ەنگىزۋگە لايىقتى ۇلگى تۇتارلىق تۇلعالار مەن دەرەكتەر بارشىلىق.
«وسى كۇنى اكادەميالىق جازبالارعا سۇيەنبەي، ينتەرنەتتەن ماعلۇمات الا سالاتىن بولعان. ونى قىمسىنباستان، كادەگە جاراتۋدى كاسىبيلىك دەپ ايتۋعا بولا ما؟ بۇقارانىڭ سونشالىقتى نارازىلىعىنا سەبەپ بولعان، ءوز ىسىنە قاۋقارسىز جاۋاپتى تۇلعالار ءبىر جاۋاپكەرشىلىككە تارتىلا ما؟ ۇبت-داعى وسىنداي ورەسكەل قاتەلىكتەر جىبەرگەن تەستولوگتار قىزمەتىنەن بوساتىلا ما؟ بۇنداي كەلەڭسىزدىكتەرگە نەگىزگى سەبەپ جۇيەدەن دەپ ويلايمىز. سوندىقتان دا وقۋ باعدارلاماسى، وقۋلىقتار مەن ۇبت-نىڭ جۇيەسىنىڭ ساباقتاستىعىن قالىپتاستىرۋ قاجەت. ەكىنشى ماسەلەگە توقتالاتىن بولساق، وسىنداي اسا جاۋاپتى دۇنيە قوعامدىق تالقىدان ءوتۋ كەرەك. ەلباسىنىڭ تاياۋدا جاريالانعان ماقالاسىندا بولاشاققا باعدار، رۋحاني جاڭعىرۋ، ۇلتتىق كودىڭدى ساقتاۋ تۇرعىسىندا باعدار بەرىلىپ وتىر. ۇلتتىق كودىمىزعا، رۋحاني جاڭعىرۋىمىزعا قاتىستى تۇلعالار تۋرا وسى جەردەن كورىنۋى (تەستىدە) كەرەك. وسى ورايدا قوعامدىق تالقىدان، جاقسى سۇزگىدەن وتكىزۋدى قالىپتاستارىپ، ءتيىستى جۇيەنى ۇسىنۋدى تالاپ ەتەمىز»،-دەپ تۇيىندەدى ءسوزىن تىلەۋحان.
You Might Also Like
-
الماتى وبلىسىندا قىزدى پەدوفيلدەن قۇتقارعان وقۋشىعا وبلىس اكىمىنىڭ ءبىلىم گرانتى بەرىلەدى. بۇل شەشىمدى وبلىس اكىمدىگى قابىلدادى.
