InfoHub Logo

بۇل تۋرالى Sputnik حابارلايدى.

الماتىدا جەرگىلىكتى بيۋدجەتتى ۇنەمدەۋدىڭ ارقاسىندا الەۋمەتتىك جاعدايى تومەن، سونداي-اق بيۋدجەتتىك جانە الەۋمەتتىك سالادا قىزمەت ەتەتىندەرگە سىياقى بەرىلەدى، — دەپ حابارلايدى الماتى اكىمى باۋىرجان بايبەك سەيسەنبى كۇنى “نۇر وتان” پارتياسىنىڭ قالالىق فيليالىمەن وتكەن كونفەرەنسيا بارىسىندا.

ونىڭ ايتۋىنشا، قالالىق بيۋدجەتتى وڭتايلاندىرۋدىڭ ناتيجەسىندە دارىگەرلەرگە، مۇعالىمدەرگە، تاربيەشىلەرگە، الەۋمەتتىك جۇمىسشىلار مەن الەۋمەتتىك جاعدايى تومەن تۇرعىندارعا سىياقى بەرۋ مۇمكىندىگى تۋدى. 2016 جىلى جەرگىلىكتى بيۋدجەتتەن 123 ميلليارد تەڭگە ۇنەمدەلگەن: جول اينالىمدارىن وڭتايلاندىرۋعا، قۇرىلىس نىساندارى مەن ۋنيۆەرسياداعا بولىنگەن قاراجاتتان 60 ميلليارد تەڭگە، الەۋمەتتىك نىساندارعا بولىنگەن قاراجاتتان 56،5 ميلليارد تەڭگە ۇنەمدەلسە، مەملەكەتتىك ساتىپ-الۋلار كەزىندە 6،5 ميلليارد تەڭگە ۇنەمدەلگەن.

“وسىنى ەسكەرە وتىرىپ، مەملەكەت باسشىسىنىڭ تىكەلەي تاپسىرىسىمەن قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي جەرگىلىكتى بيۋدجەتتەگى قاراجاتتان الەۋمەتتىك جانە بيۋدجەتتىك سالادا جۇمىس ىستەيتىن الماتىلىقتارعا ءبىر الاتىن ايلىعىنىڭ كولەمىندە سىياقى بەرىلسە، الەۋمەتتىك جاعدايى تومەن تۇرعىنداردىڭ ءارقايسىسىنا 50 مىڭ تەڭگە كولەمىندە سىياقى بەرىلەدى”، — دەلىنگەن باسپا ءسوز كونفەرەنسياسىنىڭ قورىتىندىسى بويىنشا تاراتىلعان حابارلامادا.

جالپى، سىياقى الاتىن الماتىلىقتاردىڭ سانى شامامەن 114،3 مىڭ ەكەن. ال بولىنەت قاراجات 6،2 ميلليارد تەڭگە بولىپ تۇر. “مەملەكەت باسشىسى مەن پارتيا كوشباسشىسىنىڭ مەرەكە قارساڭىندا كورسەتىپ وتىرعان كومەگى ولارعا ءبىرىنشى قاجەتتىلىكتەگى تاۋارلاردى ساتىپ الۋىنا، ازىق-تۇلىك ونىمدەرىن الىپ، كوممۋنالدىق قىزمەتتەرىن تولەپ، نەسيەلەرىن وتەۋگە كومەكتەسەدى دەپ سەنەمىن. ياعني، ەڭ قاجەتتى دۇنيەلەرىنە جاراتا الادى دەپ سەنەمىن”، — دەپ كەلتىرەدى بايبەكتىڭ ءسوزىن باسپا ءسوز قىزمەتى.