مۇعالىمدەردىڭ جالاقىسى قانشاعا ارتادى - ءبىلىم مينيسترلىگىنىڭ جاۋابى
ق ر ءبىلىم جانە عىلىم ۆيسە-مينيسترى بيبىگۇل اسىلوۆا ورتا ءبىلىم بەرۋ جۇيەسىنىڭ جاڭارتىلعان باعدارلاماعا كوشىرىلۋىنە وراي مۇعالىمدەردىڭ جالاقىسى قالاي وزگەرەتىنىن ءمالىم ەتتى.
ۆيسە-مينيستردىڭ ايتۋىنشا، مۇعالىمدەردىڭ جالاقىسىن كوتەرۋ ءبىلىم بەرۋدىڭ جاڭا مازمۇنىنا كوشۋمەن تىكەلەي بايلانىستى.
2018 جىلدىڭ 1 قاڭتارىنان باستاپ ءبىلىم بەرۋدىڭ جاڭارتىلعان مازمۇنىنا كوشكەن 1ء-شى، 2ء-شى، 5ء-شى جانە 7ء-شى سىنىپ ۇستازدارىنىڭ لاۋازىمدىق جالاقىسى كوبەيەدى. ال قىركۇيەك ايىنان باستاپ، 3ء-شى، 6-شى جانە 8ء-شى سىنىپ مۇعالىمدەرىنىڭ جالاقىسى كوتەرىلەدى. وسىلايشا، 2019 جىلدىڭ قىركۇيەگىندە 4ء-شى، 9-شى جانە 10-شى سىنىپ ۇستازدارىنىڭ جالاقىسى ارتسا، 2020 جىلى 11-سىنىپ مۇعالىمدەرىنىڭ ەڭبەكاقىسى جوعارىلايدى.
"ۇستەمەاقى كولەمى مەملەكەت باسشىسى ءوز جولداۋىندا ايتقانداي، 30 پروسەنتتى قۇرايدى. مىسال كەلتىرەر بولساق، 15 جىلدىق ەڭبەك ءوتىلى بار 1-ساناتتاعى قالا ءمۇعالىمىنىڭ جالاقىسىنا 24 مىڭ تەڭگە قوسىلادى. ءدال وسىنداي ەڭبەك ءوتىلى بار 1-ساناتتاعى اۋىل ءمۇعالىمىنىڭ جالاقىسىنا 25 860 تەڭگە قوسىلادى"، - دەپ اتاپ ءوتتى بيبىگۇل اسىلوۆا ۇكىمەت ۇيىندە وتكەن باسپا ءسوز ءماسليحاتىندا.
اتاپ وتىلگەندەي، ءۇش جىلدىق ءوتىلى بار، ەش ساناتى جوق مۇعالىمدەردىڭ لاۋازىمدىق جالاقىسى 56 مىڭ تەڭگەنى قۇرايدى. وعان داپتەر تەكسەرگەنى جانە كابينەتكە جەتەكشىلىك ەتكەنى ءۇشىن 22 مىڭ تەڭگە ۇستەمەاقى قوسىلادى. ياعني، قازىرگى ۋاقىتتا ولاردىڭ جالاقىسى 78 مىڭ تەڭگەنى قۇرايدى. ءبىلىم بەرۋدىڭ جاڭارتىلعان مازمۇنى ءۇشىن ۇستەمەاقى قالا دەڭگەيىندە - 16 مىڭ، اۋىل دەڭگەيىندە 21 مىڭ تەڭگەنى قۇراماق. ياعني، ءۇش جىلدىق ءوتىلى بار، ساناتى جوق مۇعالىمدەردىڭ جالاقىسى قالا دەڭگەيىندە - 96 مىڭ تەڭگە، اۋىل دەڭگەيىندە 115 مىڭ تەڭگە بولماق.
ەگەر 25 جىل ەڭبەك ەتكەن جوعارى ساناتتى مۇعالىمدەردىڭ قازىرگى جالاقىسى 83 مىڭ تەڭگەنى قۇرايتىن بولسا، وعان 25 مىڭ تەڭگە كولەمىندە ۇستەمەاقى جانە جاڭارتىلعان ءبىلىم بەرۋ باعدارلاماسى ءۇشىن تاعى 24 مىڭ تەڭگە قوسىلادى. وسىلايشا، ەڭبەكاقىنىڭ جالپى سوماسى 133 مىڭ تەڭگە بولماق.
سونىمەن بىرگە، بعم وكىلدەرىنىڭ ايتۋىنشا، بيىل مۇعالىمدەردىڭ بىلىكتىلىك دەڭگەيىن انىقتاۋ ارقىلى قوسىمشا اقى تاعايىندايتىن جاڭا جۇيە ەنگىزىلەدى.
"جاڭا جۇيەگە سايكەس، ۇلتتىق بىلىكتىلىك تەستىن تاپسىرىپ، ءوز دەڭگەيلەرىن راستاۋ ارقىلى مۇعالىمدەر جالاقىلارىن 20-50 پروسەنتكە دەيىن كوتەرە الادى. ماسەلەن، ءبىر ساتى جوعارىلاعان 15 جىلدىق ەڭبەك ءوتىلى بار 1-ساناتتاعى قالا ءمۇعالىمىنىڭ ەڭبەكاقىسىنا 28 مىڭ تەڭگە قوسىلسا، اۋىل ءمۇعالىمىنىڭ جالاقىسىنا 36 مىڭ تەڭگە قوسىلادى"، - دەدى ۆيسە-مينيستر.
ايتا كەتەيىك، بيىلعى جولداۋدا ق ر پرەزيدەنتى نۇرسۇلتان نازاربايەۆ مۇعالىمدەردىڭ جالاقىسىن كوتەرۋدى تاپسىرعان ەدى.
"جاڭارتىلعان مازمۇن دەگەنىمىز - حالىقارالىق ستاندارتتارعا ساي كەلەتىن جانە نازاربايەۆ زياتكەرلىك مەكتەپتەرىندە بەيىمدەلۋدەن وتكەن زاماناۋي وقۋ باعدارلامالارى. بۇلار ءبىزدىڭ بالالارىمىزعا قاجەتتى فۋنكسيونالدىق ساۋاتتىلىق پەن سىني تۇرعىدان ويلاۋ قابىلەتىن دارىتادى.
سونىمەن قاتار 2018 جىلى كاتەگوريالار اراسىنداعى الشاقتىقتى ارتتىرىپ، مۇعالىمدەر ءۇشىن بىلىكتىلىك دەڭگەيىن ەسكەرەتىن ساناتتاردىڭ جاڭا كەستەسىن ەنگىزۋدى تاپسىرامىن. كاتەگوريالاردى بۇكىل الەمدە قولدانىلىپ جۇرگەن ۇلتتىق بىلىكتىلىك تەست ارقىلى بەرۋ كەرەك. بۇل پەداگوگتاردى وزدەرىن ۇدايى جەتىلدىرۋگە ىنتالاندىراتىن بولادى. ناتيجەسىندە، مۇعالىمدەردىڭ جالاقىسى بىلىكتىلىگىنىڭ راستالۋىنا بايلانىستى تۇتاستاي العاندا 30 پروسەنتتەن 50 پروسەنتكە دەيىن وسەدى. بۇل ءۇشىن بيىل قوسىمشا 67 ميلليارد تەڭگە ءبولۋ قاجەت"، - دەلىنگەن جولداۋدا.
قازاقپارات
You Might Also Like
-
بعم مەكتەپكە دەيىنگى جانە ورتا ءبىلىم بەرۋ دەپاراتمەنتىنىڭ ديرەكتورى شولپان قارينوۆا قازاقستاندىق وقۋشىلاردىڭ وقۋ ماقساتىمەن ۇيالى تەلەفوندى قولدانۋى جونىندە ءوز پىكىرىن ءبىلدىردى.
