ءمۇعالىمنىڭ قۋلىعى
ءبىر اڭگىمەدە ءمۇعالىمنىڭ قۋلىعى جايىندا ايتىلادى. وندا سىنىپقا كىرىپ ساباققا قاتىسقان ديرەكتور سىنىپتان تاڭدانىپ شىعادى. سەبەبى سىنىپ تىم بەلسەندى بولىپ كەتكەن ەدى. انىعىندا بۇل سىنىپ مەكتەپتەگى ەڭ ەنجار سىنىپ بولاتىن. ال بۇگىنگى ساباق ۇستىندە ولار ءجۇز پايىز قول كوتەرۋدەن ءبىر تانعان جوق. "اعاي، مەن ايتايىن! مەن ايتايىن!" جانە ءمۇعالىم "ال، قانە، ايتىپ جىبەرە عوي" دەگەن وقۋشى ورنىنان تۇرىپ سۇراقتىڭ جاۋابىن ايتىپ جىبەرىپ جاتىر. ديرەكتوردى تاڭداندىرعان وسى جاعداي. ءبارىن قويشى، ەڭ الدىمەن، سىنىپ نەعىپ بەلسەندى بولىپ كەتكەن؟ ولار نەعىپ قانداي سۇراق قويىلسا دا، ءبارى تۇگەل قول كوتەرگىش بولىپ الدى؟ ولارعا مۇنداي ءبىلىمدارلىق قايدان كەلە قالدى؟ ديرەكتور وسى سۇراقتاردىڭ جاۋابىن تابا الماي باسى قاتادى. سويتسە، گاپ مۇعالىمدە ەكەن. مەكتەپ ديرەكتورىنىڭ ءوزىنىڭ ساباعىنا كىرگەلى تۇرعانىن 5 مينۋت بۇرىن عانا بىلگەن ءمۇعالىم دەرەۋ سىنىپقا جۇگىرىپ كەلەدى دە، بىلاي دەيدى:
"بالالار، ءقازىر ساباققا ديرەكتور كىرەدى. سەندەر مەن قانداي سۇراق قويسام دا، بىلسەڭدەر دە، بىلمەسەڭدەر دە، قول كوتەرە بەرىڭدەر. تەك مەن كىمنىڭ ءبىلىپ، كىمنىڭ بىلمەي وتىرعانىن اڭعارۋىم ءۇشىن، بىلەتىندەرىڭ وڭ قولدارىڭدى، بىلمەيتىندەرىڭ سول قولدارىڭدى كوتەرىڭدەر".
انىعىندا قۋلىقتىڭ ءبارى ۇنەمى وسىلاي ءوتىپ كەتە بەرمەيدى عوي. مىسالى، مىنا ساباقتا...
ءمۇعالىم ساباق ءوتىپ جاتىر. سىنىپتا ءمۇعالىم مەن وقۋشىلاردان باسقا دا ساباققا قاتىسىپ وتىرعان ادامدار بار. ۇستاز ءۇي تاپسىرماسىن تاقىرىپشالارعا ءبولىپ سۇراي باستايدى. الدىڭعى ەكى تاقىرىپشا بويىنشا، تياناقتى جاۋاپ الىنادى. وسىعان كوڭىلدەنگەن ءمۇعالىم: "بالالار، كەلەسى تاقىرىپشا قانداي ەدى؟" - دەي بەرگەنى سول ەدى، الدىڭعى پارتادا وتىرعان ۇل بالا ۇشىپ تۇرەگەلەدى دە تاقتاعا شىعادى.
سىنىپتاعىلار اڭ-تاڭ. سويتسە، ءمۇعالىم قۋلىق جاساپ، وسى بالانى ءۇشىنشى تاقىرىپشانى ايتۋعا دايىنداپ قويعان ەكەن. ءمۇعالىم "بالالار، كەلەسى تاقىرىپشا قانداي ەدى؟" دەگەننەن كەيىن، بالالار تاقىرىپشانىڭ اتىن ايتۋ كەرەك ەدى دە، ءمۇعالىم سونان سوڭ بارىپ قانا: "قانە، وسى تاقىرىپشا جونىندە كىم سويلەيدى؟" - دەگەن سياقتى بىردەڭە ايتۋ كەرەك بولاتىن. وقۋشى سودان كەيىن بارىپ قانا "مەن ايتايىن" دەپ قولىن كوتەرۋى كەرەك ەدى. ءبىراق وزىنە جۇكتەلگەن تاپسىرمادان قاتتى قوبالجىپ وتىرعان شاكىرت ءمۇعالىمنىڭ: "بالالار، كەلەسى تاقىرىپشا قانداي ەدى؟" - دەگەن سوزىنەن كەيىن-اق، تاپسىرمامدى ەرتەرەك ايتىپ قۇتىلا بەرەيىن دەپ، تاقتاعا قاراي ۇمتىلا بەرسە كەرەك.
You Might Also Like
-
ق ر پرەمەر-مينيسترىنىڭ ورىنباسارى داريعا نازاربايەۆا مەكتەپتەر اسحانالارىن جالعا بەرۋ ارقىلى ەلەۋلى تابىستان قاعىلىپ وتىرعانىن ايتتى.
