ءمۇعالىمنىڭ تالابى
سىنىپقا ورتا بويلى، دەمبەلشە دەنەلى، ءساندى كيىنگەن قارا تورى جىگىت كىرىپ كەلگەندە، وقۋشىلار "بۇل كىم ەدى؟" دەگەندەي، بىر-بىرىنە تاڭدانىسىپ قاراپ قالدى. جىگىتتى سونان سوڭ بارىپ شىرامىتتى. بۇل كەلىپ تۇرعان مىناۋ ساباعىن باستاعالى تۇرعان جاس مۇعاليما ۇستازدىڭ جۇبايى ەدى. جىگىت جولداسىنىڭ جانىنا بارىپ تۇردى دا: "قايسىسى، قانە، تىنىش وتىرماي جۇرگەن؟!" - دەدى. بالالار بىر-بىرىنە قاراپ جىمىڭ-جىمىڭ ەتىستى. ماسەلە تۇسىنىكتى ەدى. بۇلار - ەرلى-زايىپتى جاس، تاتۋ وتباسىلار. ەكەۋى دە - جوعارى ءبىلىمدى مامان. دەمەك، سىنىپقا ساباق بەرەتىن جاس اپاي جولداسىنا سىنىپتىڭ وزىنە قيىندىق كەلتىرىپ جۇرگەندىگى تۋرالى از-ماز بىردەڭە ايتقان بولۋ كەرەك. ال جۇبايىن سىيلايتىن جىگىت ولاردى ەرتەڭ بارىپ تارتىپكە شاقىرىپ بەرگىسى كەلسە كەرەك. ءبىراق بالالار بۇل جىگىتتەن ىعىسقان جوق. سەبەبى ولار سىنىپقا ەشۋاقىتتا دا ءۇشىنشى ءبىر ادامنىڭ كىرىپ، ارالاسۋعا بولمايتىندىعىن جاقسى بىلەدى. سىنىپتا تەك ءمۇعالىم جانە وقۋشىلار بولادى. ءمۇعالىمنىڭ جۇمىسىنا ەشكىم كەلىپ سىرتتان ارالاسپايدى. مىسالى، مىنا جۇبايدىڭ جولداسى وسى جەردە ءمۇعالىم بولعان جاعدايدا دا.
راس، كەيدە ءوز ءمۇعالىمىنىڭ مۇددەسىن قورعاپ، سىنىپقا زاۆۋچ نەمەسە ديرەكتوردىڭ كىرەتىنى بار. بالالار مۇنىڭ ءوزىنىڭ دە ارتىق ەكەندىگىن ىشتەي سەزىپ وتىرادى.
سەبەبى سىنىپتا باستى تۇلعا - تەك ءمۇعالىمنىڭ ءوزى.
- قويساڭدارشى! - دەيدى مۇندايدا قىزدار. - جەتتى عوي قىلجاقتارىڭ! ءقازىر تاعى دا ديرەكتور كەلەدى ەندى.
سىنىپقا ديرەكتور كەلە جاتادى.
- قايسىسى، قانە، وتىرماي وتىرعان؟! ەدىلبايەۆ پا؟! بۇل كلاستا بىردەڭەنى باستايتىن ەدىلبايەۆ قوي؟!
- ءبارى، - دەيدى مۇعاليما ورامالىن كوزىنە اپارىپ. - ەر بالالاردىڭ ءبارى.
- مىناۋ دا ما؟! - ديرەكتور ساۋساعىمەن ءبىرىنشى سىنىپتىڭ بالاسىنداي بولىپ، پارتادان بويى اسار-اسپاس بوپ وتىرعان بالانى كورسەتەدى.
- ءاي، ساعان دەيىن دە باسىنايىن دەدىڭ بە ءبىزدى؟! بۇل سىنىپتىڭ ەر بالدارىن تۇگەلدەي كولونياعا جىبەرۋ كەرەك قوي. سوندا بىلەدى بۇلار ءمۇعالىمنىڭ تالابىنا باعىنباۋ دەگەننىڭ نە ەكەنىن! مەكتەبىن ساعىنىپ جىلايتىن بولادى ءالى! ءومىر سەنى باعىندىرادى! ءومىر دەگەن ساعان
مەكتەپ پەن ءمۇعالىم ەمەس، باسىڭنان سيپاپ وتىراتىن. ساباعىڭىزدى وتكىزە بەرىڭىز، - دەيدى ديرەكتور سونان سوڭ مۇعاليماعا. - بۇلارمەن جەكە-جەكە سويلەسۋ كەرەك.
سىنىپ سول كۇنى تىنىش وتىرادى. كەلەسى ساباقتا دا سولاي. ال ودان كەيىنگى ساباقتا باياعى اۋەنىن باستايدى.
ءمۇعالىمنىڭ تالابىنا باعىنباعان ءبىر بالا كەيىن ءوزى جىگىت بولىپ، اكە اتانعاندا: "سول كەزدەگىنىڭ ءبارى اقىماقشىلىق ەكەن. ءمۇعالىمنىڭ تالابىنا باعىنۋ كەرەك ەكەن. مەكتەپتە ون جىل وقيسىڭ با، ون ءبىر جىل وقيسىڭ با، سول ءوزىڭ وقىعان مەكتەپ ءوزىڭ جايلى ءبىر اۋىز جىلى ءسوز ايتپاسا، سول ۋاقىتىڭ بوسقا كەتكەنمەن بىردەي"، - دەپتى. ءوزى وقىعان مەكتەبىنىڭ ءوزى جايلى ءبىر اۋىز سىرتىنان ايتقان جىلى سوزىنە قۋانىپتى.
الگى جاس مۇعاليما كەيىن باسقا مەكتەپكە اۋىسىپ كەتسە كەرەك. ونىڭ ورنىنا كەلگەن ءدال وزىندەي جاس مۇعاليما سىنىپتى شىرق ءۇيىرىپ الىپ كەتىپتى.
You Might Also Like
