مۇعاليمانىڭ ءىزى
- نە بولدى، جانىم؟! تاعى دا تۇسىڭنەن شوشىدىڭ با؟! تاعى دا سول تۇسىڭە قىزدارىڭ كىردى مە؟! كىشكەنە دەمالشى، جانىم!
- ۇيىقتاي المايمىن، بەردەن! ۇيىقتاي المايمىن! وسى ءبىر ون ءۇش قىزدى ۋايىمداپ ۇيىقتاي المايمىن ەندى! ءجۇرشى، اۋلاعا شىعىپ كەلەيىك! جۇرەگىم ءبىر ءتۇرلى بولىپ تۇر، بەردەن!
***
- مىنە، كوردىڭ بە، جانىم؟ كوشە دەگەن تىم-تىرىس قوي.
- سوندا دا كوشەنى ءبىر جاعالاپ قايتايىقشى، بەردەن!
- جانىم-اۋ، وسىلاي كۇن سايىن ۇيىقتاماي كوشە جاعالايمىز دا جۇرەمىز بە؟!
- رەنجىمەشى ەندى، بەردەن!
- جانىم-اۋ، ول قىزداردى نەسىنە ۋايىمداي بەرەسىڭ؟! جانىندا مامالارى بار ەمەس پە؟
- مامالارعا سەنۋگە بولمايدى، بەردەن! قىز دەگەن شىعىپ كەتەيىن دەسە، تەرەزەنىڭ كوزىنەن دە شىعىپ كەتە بەرەدى. اناۋ نە، بەردەن؟! اعاراڭداپ تۇرعان اناۋ نە، بەردەن؟!
- مىناۋ ما؟! جانىم-اۋ، ەسەك ەمەس پە؟! مىنە، جارىقتى جاعىپ كورسەتەيىن بە؟ اق ەسەك ەكەن. جانىندا قودىعى دا بار.
- قۇدايىم-اي! كوزىمە اق فارتۋك ەلەستەپ كەتكەنىنشى!
- جانىم-اۋ، قىزدار تۇندە اق فارتۋك كيىپ جۇرمەيدى عوي؟
- سەن ولاردىڭ نە كيىپ جۇرەتىنىن قايدان بىلەيىن دەپ ەدىڭ، بەردەن؟!
- جانىم-اۋ، وسىلاي تۇنىمەن جۇرە بەرەمىز بە ەندى؟ ساعان ۇيىقتاۋ كەرەك قوي! ازاندا ساباعىڭ بار ەمەس پە؟
- التى ساباعىم بار، بەردەن.
- انە، كوردىڭ بە؟! ساعان ۇيىقتاۋ كەرەك. بۇلاي جالعاسا بەرەتىن بولسا، دەنساۋلىعىڭدى قۇرتاسىڭ عوي.
- دەنساۋلىقتى ويلايتىنداي بولىپ ءجۇرمىن بە، بەردەن؟ كوزىمدى جۇمسام بولدى، ون ءۇش قىزىم بىرەۋمەن كەزدەسىپ تۇرعانداي كورىنەدى.
- سوندا دا ساعان كوز شىرىمىن الۋ كەرەك، جانىم!
- جارايدى، بەردەن! رەنجىمەشى ەندى! مەنى ءسۇيىپ قوسىلدىم دەپ ەدىڭ عوي؟
- ءسۇيىپ ۇيلەندىم دەدىم عوي، جانىم! ءسۇيىپ ۇيلەندىم!
***
ارادا ۋاقىت وتەدى. باياعى ون ءۇش قىز 10، 20، 30 جىلدىققا كەلەدى.
- ءوي، بار بولعىرلار! كەلدىڭدەر مە؟ ون ءۇشىڭ دە تۇگەل كەلدىڭدەر مە؟ باياعىدا سەندەردى ۋايىمداپ ءولىپ قالا جازدايتىن ەدىم.
- ءبىزدى نەسىنە ۋايىمداي بەردىڭىز، اپاي؟ جىگىتپەن جۇرگىزبەيتىن ەدىڭىز عوي؟
- جىگىتپەن ءجۇرىپ نەعىلايىن دەپ ەدىڭدەر؟! بالەنىڭ ءبارى سول جىگىتپەن جۇرۋدەن باستالادى. ءبىر ۇلى پەداگوگ ايتقان: "ماحاببات دەگەن ءسوزدى ەستىگەندە باسقا قىز-كەلىنشەكتەردىڭ جۇرەگى تولقىنىستان ءدىر ەتە قالاتىن بولسا، مۇعاليمانىڭ جۇرەگى قورقىنىشتان ءدىر ەتە قالادى" دەپ.
- ءبىتىرىپ كەتكەن ۇلدارمەن سويلەسىپ تۇرعانىمىزدى كورسەڭىزدەر، جينالىستان
جينالىس.
- بالەنىڭ ءبارى سول ءبىتىرىپ كەتكەن ۇلداردان كەلەدى عوي ءوزى.
- ءوزىمىزدىڭ كلاستىڭ ۇلدارىمەن دە سويلەستىرمەيتىن ەدىڭىزدەر؟
- ولارمەن نە سويلەسەيىن دەپ ەدىڭدەر؟ وتىرعان جوقسىڭدار ما ءبىر كلاستىڭ ىشىندە اتىسىپ-شابىسىپ، بىر-بىرلەرىڭە قاعاز لاقتىرىسىپ ويناپ.
ماعان سىيلىق اكەلدىڭدەر مە؟ وزدەرىڭ شەت ەلگە شىعىپ، كەلىپ ءجۇر ەكەنسىڭدەر.
- اپاي، سوڭعى قوڭىراۋداعى اندەردى ايتايىقشى!
- ايتامىز! نەگە ايتپايدى ەكەنبىز؟!
- اپاي، سوڭعى قوڭىراۋدا قۋانىپ ءجۇردىڭىز عوي؟ بىزدەن قۇتىلعانىڭىزعا قۋانىپ ءجۇردىڭىز بە؟
- سەندەردەن قۇتىلعانىما قۋانىپ نەم بار؟ جاۋاپكەرشىلىك دەگەن بولادى.
- بىزگە ەش ۋاقىتتا ءمۇعالىم بولما دەۋشى ەدىڭىز عوي؟
- سونى سەندەر تىڭدايتىن با ەدىڭدەر؟ بولىپتى عوي مىنا قىز! سەن قىز ءمۇعالىم بولىپسىڭ عوي؟
- اپاي، ءىزىڭىزدى قۋىپ ءجۇرمىن عوي.
- مەنىڭ ءىزىمدى نەسىن قۋاسىڭ، قاراعىم؟! مەنىڭ ءىزىم وسى اۋىلدىڭ كوشەسىندە قالدى عوي. سەندەر ءۇشىن ءتۇن ۇيقىمدى ءتورت بولگەن اپايمىن مەن.
You Might Also Like
-
الماتى وبلىسى، كەربۇلاق اۋدانى، ءشيلىسۋ اۋىلى «ءشيلىسۋ نەگىزگى مەكتەبى» كمم–ءسىنىڭ 4-سىنىپ وقۋشىسى: ەرداۋلەت قىزى شايميرا جەتەكشىسى: بيليبايەۆا قارلىعاش ۋرامبايەۆنا
-
ق.ۇكىبايەۆ اتىنداعى جالپى ورتا مەكتەبى كوممۋنالدىق مەملەكەتتىك مەكەمەسىنىڭ 3 دەڭگەيلى سەرتيفيكاتتالعان بيولوگيا ءپانىنىڭ ءمۇعالىمى: تاشماتوۆا بيبىگۇل رامانقۇل قىزى
