InfoHub Logo

بۇگىن، 19 مامىردا تۇركىستانداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە يۋنەسكو-نىڭ 2016 جىلدى «قوجا احمەت ياساۋي جىلى» دەپ جاريالاۋىنا وراي تۇركى الەمىنىڭ زيالىلارى باس قوستى.

تۇركى الەمىنىڭ ءتۇپ قازىعى تۇركىستان شاھارىندا وتكەن بۇل جيىننىڭ تۇركى الەمى ءۇشىن ماڭىزى زور. سالتاناتتى جيىن، تۇركياداعى «تۇركى الەمىنىڭ جازۋشىلارى جانە كوركەمونەرپازدارى قورىنىڭ» كەزەكتى «XX حالىقارالىق تۇركى الەمىنە ەڭبەگى سىڭگەن تۇلعالاردى ماراپاتتاۋ» راسىمىمەن باستالدى. ول «تۇركى تىلدەس رەسپۋبليكالاردىڭ تاۋەلسىزدىگىنە 25 جىل» اتتى عىلىمي جيىنعا ۇلاستى.

عىلىمي باسقوسۋدى حالىقارالىق تۇركى اكادەمياسىنىڭ پرەزيدەنتى دارحان ءقىدىرالى جۇرگىزدى. جيىنعا كەلگەن تۇركى الەمىنىڭ زيالىلارى، ق ر تاۋەلسىزدىگىنىڭ 25 جىلدىعى، يۋنەسكو بويىنشا اتالعان «احمەت ياساۋي جىلى»، ۋنيۆەرسيتەت قۇرىلۋىنىڭ 25 جىلدىعى مەرەيتويلارىمەن قۇتتىقتادى. ءارى بۇگىنگى 19 مامىر، تۇركيا مەملەكەتىنىڭ «اتاتۇرىكتى ەسكە الۋ جانە جاستار مەن سپورت كۇنى» مەرەكەسىمەن قۇتتىقتاپ، ىزگى تىلەكتەرىن ءبىلدىردى. زيالى تۇلعالار تۇركى حالىقتارىنىڭ تاريحىنا توقتالىپ، ورتاق ماقسات-مۇراتتار، الداعى اتقارىلار يگىلىكتى ىستەر جايىندا ءسوز قوزعادى.

بۇعان دەيىن الەمنىڭ لەفكوشا (كيپر)، باكۋ (ازەربايجان)، ۋسكۋف (ماكەدونيا)، نيۋ-يورك (اقش)، بىشكەك (قىرعىزستان) سياقتى قالالارىندا شىمىلدىعى تۇرىلگەن «حالىقارالىق تۇركى الەمىنە ەڭبەگى سىڭگەن تۇلعالاردى ماراپاتتاۋ ءراسىمىنىڭ» كەزەكتى جيىرماسىنشى ءراسىمىنىڭ تۇركىستاندا ءوتۋى كەزدەيسوقتىق ەمەس.

بيىلعى ايتۋلى شارانىڭ ماراپات يەلەرى قاتارىندا ازەربايجان مەملەكەتىنىڭ ساياساتكەرى، جۋرناليست گ.پاشايەۆا، قىرعىستان مەملەكەتىنىڭ تۇركياداعى بۇرىنعى توتەنشە جانە وكىلەتتى ەلشىسى ب.قالامبەكوۆا، ماكەدونيالىق ت.يبرايمي، احمەت ياساۋي ۋنيۆەرسيتەتى وكىلەتتى كەڭەسىنىڭ ءتوراعاسى، پروفەسسور مۇسا يىلدىز، الەم جانە تۇركى حالىقتارىنىڭ اقىنى، جازۋشى و. سۇلەيمەنوۆ جانە جازۋشى، حالىقارالىق الاش سىيلىعىنىڭ لاۋرەاتى م. بايعۇت بار. سونىمەن قاتار تۇركيانىڭ «گازيانتەپ»  ۋنيۆەرسيتەتىنىڭ رەكتورى، پروفەسسور م.يا.جوشكۋن، تۇركى الەمى بىلىمىنە ەڭبەك سىڭىرگەن ق.بۇلبۇل،  ترت-1 تەلەارناسىنىڭ ءجۋرناليسى م.بوزداع، پروفەسسور ح.كوشان، ءتىل  مامانى، جازۋشى يۋ.گەديكلي، قىلقالام شەبەرى، پروفەسسور ا.كاراوعلۋ، «انادولى اۋىل قورعاۋشىلارى جانە شەيىت وتباسىلارى كونفەدەراسياسىنىڭ» باسشىسى ز.سوزەن، تۇركى الەمى جازۋشىلار جانە كوركەمونەرپازدار قورىنىڭ ءتوراعاسى يا.اكەنگين،  جۋرناليست، جازۋشى، اقىن م.ۋ.يىلماز، سامسۋن قالاسى اكىمشىلىگىنىڭ مادەنيەت جانە الەۋمەتتىك دەپارتامەنتىنىڭ باسشىسى ن.چاماش قوردىڭ ارنايى ەستەلىك كادەسىيىمەن ماراپاتتالدى. مۇنىمەن قاتار تۇركى الەمى زيالىلارىنا ۋنيۆەرسيتەتتىڭ «ياساۋي جىلى» مەدالى دە تابىستالدى.

سونداي-اق، ۋنيۆەرسيتەتتىڭ 60-تان اسا ارداگەر وقىتۋشى-پروفەسسورلارى مەن قىزمەتكەرلەرىنە مەرەيتويلىق «25 جىل» جانە «ياساۋي جىلى» مەدالى سالتاناتتى تۇردە تاپسىرىلدى، دەپ حابارلايدى ۋنيۆەرسيتەتتىڭ باسپا ءسوز قىزمەتى.

---