InfoHub Logo

بۇرىن ءبىر جەتىم قىز بولىپتى. ءبىر كۇنى تاڭعى الاڭ-ەلەڭدە بىرەۋدىڭ تەپكىلەۋىمەن قىز شىرت ۇيقىدان شوشىپ ويانىپتى. ورنىنان ۇشىپ تۇرىپ قاراسا، وگەي شەشەسى ەكەن. قورقىپ، دىرىلدەپ تۇرعان بيشارا قىزعا وشىگە قاراعان وگەي شەشەسى:

— جاتامىسىڭ، مىناعان تولتىرىپ بۇلدىرگەن تەرىپ كەل! —  دەپ اياعىمەن قاۋعا شەلەكتى قىزعا قاراي تەۋىپ جىبەرىپتى. قىز شەلەكتى الىپ تاۋعا كەتىپتى.

قىزدىڭ اكەسى كوشەتىن بولعان سوڭ، ءبىر كۇن بۇرىن جوعالىپ كەتكەن ەكى سيىرىن ىزدەپ كەتىپ، سول سيىرلارىن تاۋىپ، ەرتەمەن ۇيىنە كەلسە، ايەلىنىڭ ءۇيىن جىعىپ كولىكتەرگە ارتىپ-تارتىپ جاتقانىنىڭ ۇستىنەن تۇسەدى. كەلە سالا كوش قامىمەن بولىپ كوشتى جۇرگىزەدى. بالالارى كوپ بولعاندىقتان الگى قىزىن دا جوقتامايدى.

ولار جاڭا قونىسقا قونىپ سۋ اكەلۋگە قامدانعاندا، شەلەكتىڭ بىرەۋى جوق بولىپ شىعادى. سونان وگەي شەشەنىڭ قىلىعىن بىلەتىن قىز اكەسى زار يلەپ جۇرتقا شابادى.

ال قىزى الگى شەلەكتى ءتۇس اۋعاندا ارەڭ تولتىرىپ، اش قارىن سۇيرەتىلىپ ۇيىنە كەلسە، ك ۇلى شاشىلىپ جۇرتى جاتىپتى. قىز مۇنى كورىپ وگەي شەشەنىڭ قىلىعىن ويلاپ، ءوز شەشەسىن ساعىنىپ ەڭىرەپ جىلاپ وتىرعاندا، استىنداعى اتىن قارا تەر قىپ اكەسى جەتىپ، اتتان دومالاي ءتۇسىپ قىزىن قۇشاقتاپ، ەكەۋى بىردەي ەگىلىپ جىلايدى.

ءبىر قاۋىمنان كەيىن اكەسى: «ءجۇر، بالام، كەتەيىك» دەگەندە، جەتىم قىز جىلاپ تۇرىپ:

— بارمايىنشى، اكەم-اي، كۇن كورسەتپەيدى شەشەم-اي! — دە- گەن ەكەن.

بۇنى ەستىگەن ەلدىڭ قىزعا جانى اشىپتى.. ءبىر دومبىراشى وسىدان «مۇڭلى قىز» دەگەن كۇي شىعارىپتى.

---