سەلك ەتىپ، سەكەم الىپ قارادىڭ-اۋ،
قاي تاۋدىڭ كيىگى ەدىڭ، قاراعىم-اۋ!؟
توبەڭدە شىر اينالىپ بالا قىران،
مۇيىستە مەرگەنى بار قالا مىناۋ.
سوندىقتان سەكەم الىپ قارادىڭ-اۋ.
كەل،
مەنىڭ قاسىما كەل، قاسىما كەل،
جەڭدىرىپ ۇرەيىڭدى، باسىلا گور،
سۇلۋلىققا سۇقتانعان جات كوزدەردەن،
جالت ەتكەن جانارىڭدى جاسىرا بەر.
پانالا،
قاسىما كەل، كاسىما كەل.
وت-سۋى، وتاۋى ىرعىن جاتقان قىردان،
نەندەي كۇش سەنى مۇندا اتتاندىرعان؟!
ابايلاپ، ادىمىڭدى ساقتاندىرعان،
بۇل ماڭعا نەسىن كەلدىڭ قاقپان قۇرعان
ارمان عوي سەنى مۇندا اتتاندىرعان؟!
ءۇمىتىڭ، ارمانىڭ دا ءبارى قالىپ،
اۋىلدى ويلاپ قۇر بەكەر نالىمالىق.
...جەتكىزىپ تاستايىن با تاۋىڭا الىپ،
قۇنىڭدى، قۇرالايىم، تانى بارىپ.
قاراعىم-اۋ، قاي تاۋدىڭ كيىگى ەدىڭ؟!
سىرتىڭنان قارايمىن دا، سۇيىنەمىن.
عايىپ بولىپ قاي جاققا باراتىرسىڭ،
الدە ءبىر دومبىرانىڭ كۇيى مە ەدىڭ؟!

---